1963: Toutes sortes de changements

Toutes sortes de changements

 

à Portinfé, Saint Ou.

          Vendrédi au sé

 

 

Moussieu l'Editeu,

 

Ou m'dithez que je m'pliains tréjous du temps, mais agniet j'crais que j'ai une bouonne raison. Hier au sé j'pus rester dans l'gardin, assis dans ma grand'tchaise, jusqu'à pâssé huit heuthes, et j'me disais que l'êté était v'nu à la fin. Mais à matîn i' s'est mînt à tchais d'la plyie, et l'jour a 'té hardi mouoillyi. Demain i' pouôrrait r'faithe bé, mais nou n'peut pas s'y fier. Comme bein d'autres choses, il a empliéthi.

 

Ch'n'est pas tout, Moussieu, car dans bein d'autres manièthes i' n'y a pas l'pliaisi dans la vie tchi y'avait. Par exemplye, j'ai veu sûs la gâzette agniet tch'il est propôsé d'abandonner le service par baté à Saint Malo ch't hivé. Et pourtant, Moussieu, dans les vièrs temps nou pâssait d'bouons jours à Saint Malo. J'n'ose pas en pâsler à la Merrienne, car oulle est persuadée que quand j'y allais je n'me comportais pas comme un homme mathié et un bouon Méthodiste. Ch'est drôle, Moussieu, mais les femmes de Jèrri n'ont pas la confiance dans lûs hommes tch'i' dév'thaient aver!

 

Deux bouons Jèrriais ont dispathu pour, nou-s-espèthe, un miyeu pays - le bouonhomme John Baudains et l'Clem Mallett. Le John avait fait un bouon Chantgni et Connêtablye à Saint Louothains. I' pouvait être un mio têtoigne et même roupilleux par bordée, mais i' 'tait un bouon citoyen et un honnête homme. Quant au Clem Mallett, i' tait hardi d'même étout, mais i' 'tait un titheux au blianc de preumié clâsse, et, drôlement assez, sa femme tithait raide bein étout, et y'a ocquo deux membres d'la famille tchi font des “bulls” comme i' veulent. Pas comme mé, tchi mithait pour l'blianc et capuchait contre les Ecréhos!

 

Nou peut vaie à ch'teu que nos hôteliers et d'autres tchi vivent sûs l'commerce des touristes qu'menchent à réaliser que Jèrri n'a pas assez d'attractions pour le jour d'agniet. Ils ont fait une dêmarche pour bâti un casino et bein d'autres choses sûs l'haut du Fort Régent. J'avais dit, Moussieu, y'a longtemps, tchi veindrait, chu casino, et sans doute, étout, chonna s'sa app'lé du progrès.

 

À ch'teu, Moussieu, i' pathait que bétôt quasi toutes les boutiques en Ville restéthont freumées le sam'di l'arlévée, mais s'sont ouvertes le jeudi. Je n'crais pas que les campagnards s'en vont approuver d'chonna. Ils ont tréjous 'té en Ville le sam'di pour vaie lûs amîns et accater chein tchi lûs fallait, et ch'ne s'sa pas du tout la même chose le jeudi. La Merrienne et mé, j'sommes tout à fait contre, et j'espéthons que j'pouôrrons ocquo trouver chien tchi nos faudra le sam'di. Y'a une chose tchi m'console un mio, et ch'est que, si je n'me trompe pas, les auberges restéthont ouvertes pour des rafraichissements à des pouôrres balloques comme mé, tchi souffrent d'une sé prêsque permanente.

 

À Saint Jean, le rât a 'té hauchi de siez sous par quartchi pour des changements et additions à la Salle Parouaîssiale, pour le bénéfice des femmes. Mais nou n'entend rein d'la dispute entre le Clifford Le Vesconte et l'Recteur.

 

Ma Merrienne me crie pour une bouochie d'soupé et une tâsse de tais. J'espêthe de vos r'êcrithe la s'maine tchi veint.

 

PH'LIP.

1963