1960: Un jour de surprînses

 Un jour de surprînses

La jeunesse triomphe

 

 

à Portinfè,

    Saint Ou.

 

(Samedi matin)

 

 

Moussieu l'Editeu,

 

Eh bein, à la fîn, nos y v'là, et j'savons ouèsque j'en sommes. La niet pâssée, la Merrienne a dormi trantchillement pour la preunmiée fais pour des s'maines, et j'n'ai pas attrapé un seul co-d'pid dans l'dos.

 

Hier, dans la matinée, j'm'en fus jusqu'à Saint Piêrre pour châtchi d'main avec les deux candidats et un nombre de mes vièrs amins. Par chein qu'nou m'dit, ch'tait l'opinion générale que la mâjorité d'un bord ou d'l'autre né s'sait pas bein grande, mais, comme mé dit un Prîncipa d'Pâraisse, avec tant d'femmes sûs la liste êlectorale de nos jours, nou n'peut jamais saver ouesque nous en est.

 

En r'venant j'criyis à la Salle ichîn pour vaie comment qu'tout allait. Y'avait déjà yeu un bouon nombre dé voteurs, et nou m'asseûthit que probablyement neuf chents ou d'même hors des douze chents sûs la liste veindraient voter. Lé temps 'tait doux et bé, et à ch't heuthe-là nou n'ethait pas soupconné que quand veindrait l'sé j'éthions d'la plyie à vêrse.

 

Des trais candidats, le sien tchi pathaîssait l'pûs heutheux ch'tait l'Sieur Tchéthée. Lé Mâjeur, au contraithe, pathaîssait un mio mînséthablye, mais, l'ayant veu d'même bein des fais, j'n'y prîns pas d'attention. Quand je r'vîns j'dis à la Merienne que j'criyais que l'Sieur Tchéthée avait la miyeu chance.

 

I' furent bein longtemps a conter les vouaix, ichîn à Saint Ou et à Saint Piêrre étout. En Ville nou s'y attend, mais dans la Campagne chonna n'prend pas longtemps d'habitude. La Merrienne mé dit en b'vant l'tais qu'oulle avait voté pour lé Mâjeur, et, pour dithe vrai Moussieu, j'fis la même chose, hors de sympathie. Mais j'avais l'idée que l'Sieur Hyslop éthait hardi d'vouaix, car nou m'avait dit que y'avait au mains trais chents Angliais sûs la liste. J'sais à ch'theu que je m'trompais, et li étout.

 

Quand, sûs l'tard, j'avions r'chu touos les r'sultâts, j'nos mîmes à les considéther. J'avions r'gret pour lé Mâjeur, car nou n'lé r'vêrra pas dans l's Etats, et i' s'sa mantchi là, car i' 'tait l'seul de sa sorte, un Jêrriais d'la vielle trempe, avec des idées un mio drôles tchiquefais, et par bordee érratique. Mais i' n'tait pas dépenseux et quand il avait formé s'n opinion, i' n'changeait jamais. Quant au Sieur Hyslop, i' peut refliéchi qu'à Saint Ou, même quand nou-s a 'té là pour une douzaine d'années, nou-s est p't'être un bouon Angliais, un bouan Ecossais, un bouon Iraindais, mais nou n'est pas ocquo un bouon Ouënnais. Tch'i' r'éprouve à chînquante ans d'ichin, et sans doute i' f'tha mûs!

 

Mais, Moussieu, tchèsque nou peut dithe du r'sultât à Saint Piêrre? Le Clifford Egré, tchi m'avait dit que l'êlection pouôrrait être décidé par deux ou trais vouaix, n'en n'tait pas d'lien. Ch'est bein seux que les vouaix furent contées pûs d'une fais, mais heutheusement pour l'autre les chiffres né changîtes pas. Et quand l'Sieur Simon s'en r'fut siez-li, j'si persuadé tch'i' n'savait pas actuellement pourtchi que tant des êlecteurs, et parmi yeux hardi d'gens tch'i' considethait ses amîns, avaient touône contre li. I n'est pas l'seul d'un biau but tch'a apprînt que l'homme tchi sert le public sert un îngrat.

 

La grande surprînse dans l'Numétho 1 en Ville ch'tait la victouaithe par tant d'vouaix de l'Avocat Sowden, et chein tch'arrivit au Député Hettich, fichu à la porte après tant d'années. J'éthais creu tch'i' 'tait prèsque seux d'battre lé Député Smale, et j'avais même pensé tch'i' s'sait v'nu traisième. Mais, Moussieu, pûs d'yun d'ses amîns li avaient donné un avis de se r'tither pûstot que d'ristchi une dêfaite. Même à s'n âge, et l'support de la “Post” i' s'fiait que l's êlecteurs se r'souveindraient du bouon travas tch'il a fait dans l'couothant dé tant d'années, mais nou peut vaie à ch'teu par chein tchi s'arrivit ichîn et dans l'District Numétho 2, que la pliupart des êlecteurs de Saint Hélier veulent d'la jeunesse dans l's Etats et pas des vieillards. I' n'y'avait rein entre le Député Dupré et l'Sieur Tanguy, tchi dans m'n idée j'avais mîns preunmyi et deuxiéme, et nou peut s'fier que chais deux-là s'sont bein utiles dans l's Etats.

 

Dans l'Numétho 2, lé Bill Perchard fit raide bein en v'nant deuxième, mais tchêsque éthait jamais creu que l'Sieur Tomes éthait battu tout l'restant? Quant à mé je n'li éthais prèsque pas donné une chance d'être dans les preunmié quatre, chein tchi montre que dans d'pathelles êlections nou n'peut pas s'fier trop sûs chein qu'nou-s entend.

 

Dans l'District Numétho 3, les Députés Venables et McCarthy eurent pûs d'vouaix tchi n'lûs fallait, et les deux Chantgniers, Barette et Goodsman, s'en vont s'trouver à ch'teu dans l's Etats et les Villais éthont à trouver deux nouviaux Chantgniers. Nou m'a dit, sûs chu point-là, que l'ex-Chantgni Knight voudrait bein r'venîn dans la police, et j'ai ouï étout que l'Chantgni Richardson étha un autre candidat quand l'temps veindra. Je n'sais, Moussieu, entre nous, si l'John Richardson est content ou mârri que l'Chantgni Barette est hors de sa vaie, car ch'est possiblye que, par chein qu'nou m'dit, y'étha une êlection pour la djobbe de Connêtablye de Saint Hélier, et j'm'attends que l'Sieur Richardson n'dithait pas nennîn s'i' 'tait d'mandé d'prendre. Mais tchêsque lé Connêtablye Podêtre ditha d'chonna j'n'y connais rein.

 

Assez pour agniet, Moussieu, la Merrienne vos fait ses complyiments.

 

 

Ph'lip.