1934: Chutte histouèthe est la vérithè

 

Chutte histouèthe est la vérithèt. Vous pouorrez en craithe la maintchi, le touot ou pon du touot, quant à mé j'vos dis que ch'est la vérithèt. Et ch'est en ville que chunna s'passi.

 

Un jeune mesnage vivait heureux et content, autant qu'nous peut l'être sus chutte terre de minsèthe. Et couomme nos gens avaient du cliou rein ne mantchait pouor lus plaisi. Dans l'pasleur y avait un biau wireless, des tchaises bein confortables, des canapés, en un mot touot l'confort possible. Nos jeunes gens avaient éttouot un motor pouor les proum'né.

 

L'homme, ly était otchupé dans une office de dièz heuthes du matin à quatre de l'arlevée et quasiment touos les jours nos jeunes gens allaient passer la séthée ès pictures ou bein à la danse au Pavillon de West Park.

 

L'Dimanche ch'tait une proum'nade en motor avec thée dans ieun d's hotels d'la campagne.

 

L'Frainque faisait touot chein qui pouovait pour faithe plaisi à Mary, sa Missis, et tréjous nous les viyait ensemble couomme de jeunes amoureux.

 

N'v'la qui durait d'pis quasiment deux ans et ils avaient fait un trip de tchinze jours à bord d'ieun des grands batiaux, étaient restés à lus proum'ner dans Paris pouor une autre tchinze jours et lus viage de neuches fut à Londres et en Ecosse.

 

Eh bein, malgré touot, Mary s'ennièth et d'pis un p'tit temps avait l's'esprits bas par bordées. Dans des bordées d'même l'wireless l'énervait, la danse la fatiguait, les pictures la faisaient douormir d'but et l'motor restait au garage.

 

L'Frainque n'savait tchi faithe pour reviletonner un miot sa Mary, rein n'ly faisait plaisi. Son buanhomme d'pèthe ly dit : Y faut qu'oulle s'otchuppe à tchique chose et p't'être bein qu'un car f'rait un grand changement dans la maison.

 

Frainque, ly, n'viyait pon couomment qu'un cat pouorrait avèr dithèt effet, mais au mespé y s'décidi à en aver ieun, un nièrr pour bouanne chance.

 

Quand l'p'tit cat fut apporté, Mary en fut dans la jouaie. Chu p'tit cat fut nommé Billy et ch'tait Billy par ichin, Billy par illo.

 

Quand vint un temps y fut décidi qu'il s'rait mus d'empêcher “Billy” de couorre car un mâle cat n'est pas anima à rester à la maison et ch'est qu'la pouore Mary avait grand peur d'l'perdre. Oulle y avait même acaté une collet et mins s'n'adresse d'ssus. Une nièth que Billy était hors, Mary et Frainque passites d's'heures à appeler chu Billy. Ch'est d'antchi quant y r'vint au matin y fut décidé que chutte fais nos gens iraient l'conduire sièz Miss Wilson pouor faithe l'nécessaithe pour l'empêchi d'couorre.

 

Notre Billy fut mins dans un pagni et l'Frainque l'mins dans son motor, puis cachi tout drait dans St. Saviour's Road oprès que Mary ly eut dit : J'espèthe bein qui n's'en vont pas ly faithe du mâ a chu pouore Billy.

 

Dièz minutes oprès l'Frainque était d'r'tour sièz ly avec l'cat et bein vite Mary accouorri, mais nous juge de sa surprinse quand l'Frainque ly dit qu'il n'y avait pas ieut d'opération en touot viyant que Billy était une catte!!

 

N'v'la qui fu tune autre affaithe, car couomme s'fit Mary : Une catte! mais tchèsque j'f'ront si jamais oulle a des p'tits? Tchi qui voudra les nyié? Et encouore une fais Mary était au mespé.

 

Chutte catte a ieu des p'tits qu'nous a nyiés sans que chunna fasse une mie d'ergret à Mary, qui achteu est enjouée et n'a jamais l's'esprits bas, mais est tréjous dans la jouaie et chunna viyant que d'pis deux ou trais mais il y a un biau p'tit ouineux qui l'otchupe à longueur de jouor et tchique fais la nièt, et pouor seur sus chier esfant est un autre Billy que l'prumi.

 

Caouain

1934