Lettre Jersiaise Dinmanche le 7 d'Avri 1996.

 Lettre Jersiaise Dinmanche le 7 d'Avri 1996.

 

Aniet Dinmanche de Paque 1996, chés Clifford Laisney, tchi vos présente la lettre jersiaise.

Ne v'la deja un an que j'sommes a d'meuthai a not nouvelle demeuthe ichin dans la paraisse de St Sauveur, mais j'en me sis pas acquo fanmilyi d'l'accentd'l'ést. Etant né a St. Ouen, mais ayant passer mes années d'jeunesse a St. Jean ch'fut tout a fait une entreprinse de crouaîsi la frontchiethe sepathant l'ést du Ouest. Jeu mercie, je sis acquo accepter parmi les gris ventres sans aver l'embarras d'presenter mon passe-port.

 

Quouaiqu'j'n'avons pas ieu un hiver mouilli, il a 'tait fraid auve des vents d'l'ést pour une bounne partie du temps. Les mais d'novembre à avri peuvent etre sombre et d's'encououragent, mais chaque année suivant un temps quand la nathûthe a 'tait en r'pos, soudainement, j'viyons un éclat d'nouvelle vie. Les fossés erverdisse, les p'tites bouonnefemmes, les belles toutes-nues, les g'zettes lus revillyes toutes en s'séppanisant. Les arbustes reveinnes en bouton, les parterres d'herbe verdisse, et l's'herbes fraiche fauchies offre un parfum si pliasant. Les patates font appathance auprés aver dormi souos-terre pour trais ou quatre semaines. Le p'tit beulement d'la jeune brebis tchi resonne sa naissance. Et meme l'heûthe change, j'alloignons la cliarté du jour d'un heuthe.

 

Toutes ches choses nos announce la nouvieauté, la nouvelle vie.

 

Aniet l'Dinmanche de Paque est la fête la pus importante dans l'calendrier Chrêtien. Pour le chrêtien chès l'changement de nier a blianc. J'announcons la résurrection du Christ not Saûveur. Jesus tchi fût condanmé a mort par Pilate l'empereur de Rome, ayant 'tait faussement atchûsé a cause de nous est résusité. Tch'il assûthance que j'avons d'penser qua tuous temps j'pouvons touounner a not Saveur pour renseignment, encououragement, et la satisfaction d'saver qu'un jour j'le rencontrerons fache a fache.

 

Malheuthesement, dans chés temps, hardi d'gens n'realise pas la singnification de Paque. Ch'ést si importantd'compter chutte celebration un temps d'échangie d'cartes, de donner d's'oeus d'chocolat es éfants, une occasion d'faithe des merveilles, prendre une vacance, aûtchun chose sêlon l'importance de la vraie celebration.

 

Oui, j'pouvons etre hardi érconnaisons, et dans s'eglyises et chapelles partout l'monde j'allons celêbrer et ermercier Djieu pour la sacrifice tch'l fit pour nous sus la croaix a Golgotha. Mais les bouonnes nouvelles sont qu'el traisieme jour i surveint d'la mort, et i nos promins tch'il sêtha trejous auve nous j'usqu'a la fin du monde.

 

J'espethe que l'effort de vôt presence aniet au tchulte sethat une grande benediction.

 

Acquo une fais tchique membres de nôt gouvernement veulent nos presenter l'opportunité de nos enrichi vite et au cououtage de not prechain. J'pasle a la tchestchion du casino qua 'tait proposer. Malgré que j'avons not châre de violence et d'meché, en comparison auve d'autres parties du monde, nôt ile de Jerri est acquo connuecomme une pliaiche de trantchilité, mais comme le reste j'en sommes janmais satisfées. Deja, j'avons pus que not châre d'auberges, de boutiques a gazalles, de clobes ouverts une partie d'la niet, et la draine chose est d'ouvrir un casino. Criyous qu'un casino sont va attither la sorte de touriste que j'devraimes attracté. J'm'en doubte. J'nai jamais entrer dans une telle pliaiche, mais accordant es raports que j'liet dans les gazettes, ch'n'est pas la sorte d'attraction que j'avons besoin en Jerri. Les gens tchi hante ches premises peuvent bein afforder d'viaigi hors pays s'il veulent s'accoster du privilege.

 

Une chose mêne a l'autre. Les autorités ont toup t'chil peuve faithe pour controller le probleme de droges dans l'ile, et ouvrant un casino sêtha acquo une ouvertuthe que j'pouvons menagi sans.

Bouonne gens, j'vos prie d'faithe vot possiblye pour opposer un casino, et une manniethe qu'ou pouvez montrer vôt resistance est d'signi la petition organisée pour l'opposé.

 

J'vos souhaite a tous les benedictions d'la saison d'Paque.                   

 

                                                                      A LA PRECHAINE

Clifford Laisney