1972: En Floride

 En Floride

 

Fort Lauderdale, Florida, U.S.A.

Lé 4 dé mar, 1972.

 

Moussieu l'Rédacteu,

 

M'èrvéla dans les chaleurs, où'est qué l'sablion est blianc comme la né et qu' là grève est si longue qu'oulle est à pèrte d'veue et qu'la mé est quâsi tchiede. Lé grand dêpiet est qu'la ville est gâtée par trop d'motos par les c'mîns. Lé nombre grandit à grands pas touos l's ans, et i' n'y a pus d'pliaîsi à en cachi iun sé-mème. Les boulevards et grand' rues en sont si encombrés tchi'i' sont, nou peut dithe, patte à coue (“bumper to bumper” en Angliais), et si nou-s-est prêssis pour aller d'tchiquebord nou va pus vite en prannant les rues d'drièthe. Mais ch'est l'mème tripot dans les grand' villes partout en Améthique ches jours, p't êt' un mio piéthe ichîn car touos les cheins des êtats du nord tchi peuvent y'affaurder veulent vénîn y pâsser au mains un mais pour raccourchi l'hiver siez ieux où'est tch'i' y'a d'la né et d'la glace à la pliaiche dé la chaleu du solé.

 

J'veins d'aver l'pliaîsi d'èrchéver la gâzette dé Jèrri du 7 dé janvyi dé ch't année. Ch'es vrai qu'les nouvelles sont quâsi deux mais en r'tard, mais i' n'en sont pon mains les bienv'nues. Ieune des choses tchi m'a fait pliaîsi est d'vaie qu' les St. Ouënnais ont r'nouvelè l'ancienne couôteunme dé sonner la clioche dé l'églyise parouaîssiale lé Jour dé Noué. J'ai connu l'son d'chutte clioche-là dès mes p'tites jours, et ch'tait un son bein solonnel pour mé car j'la ouïyais sonner au pas d'entèrrement chaque fais qu' un membre d'nouot' fanmile allait à sa dreine démeuthe dans l'chînm'chiéthe. Chu son-là, et la lectuthe du tchînzième chapitre dé la preunmiéthe êpitre dé St. Paul ès Corîntchiens par Moussieu Pépin, tchi la liêsait tréjous monté dans La Tchaîthe, m'împressionnait hardi. Moussieu Pépin avait eune bouanne vouaix, et l'sérvice 'tait en Français dans chu temps-là.

 

I' m'sembl'ye aver connu les fréthes Rom'thi tch'étaient à présenter la couleu ès anciens combattants a un dîner à Victoria dans La Colombie Britannique. Lé Majeur W. Rom'thi et san fréthe Alfred tch'a nénant'tchieune ans, sont, si jé n'mé trompe pon, les fis du défunt Maît' John Philippe Rom'thi tchi soulait d'meuther à Oaklands au Coin Vathîn à St. Pièrre dans l'temps qué j'tais ségrétaithe du Connêtabl'ye (pus tard Juge) Francis Vibert Le Feuvre. Lé Sieur Rom'thi et sa danme (née Mlle. Mathet) 'taient, comme touos les bouans vièrs Jèrriais, hardi hospitalyieurs, et j'allais souvent siez ieux pâsser la séthée. Si les Mêssieux Rom'thi à Victoria ou Vancouver r'chévent la gâzette dé Jèrri et tch'i' vaient chutte lettre ichîn, jé s'sais content d'saver si jé n'mé trompe pon.

 

Comme j'l'ai mentionné d'vant, jé n'connais rein entouor lé Marchi Commun, mais jé n'peux sénon admither la magnifique lettre du Révérend Peter Manton, datée du 27 dézembre, 1971. J'peux bein comprendre sén îndîngnation au sujet d'l'abandon des rélâtions commèrciales entre les pays du Commonwealth et d's Êtats-Unis par l'Angliétèrre pour s'associer auve les Français et aut' êtrangièrs du Continent. Comme Moussieu Manton, j'ai ieu j'honneu d'aver la compangnie des soudards du Commonwealth, et comme Moussieu Manton nouos l'dit, i' sembl'ye qué ch'est honteux d'rompre les lians d'ches bouannes gens-là et la “mère patrie” pour s'associer auve des nations tch'ont 'té ses ennemîns traditionnels. Sans doute, ch'n'est pon les Jèrriais tch'ont engendré l'idée d'entrer dans l'Marchi Commun, et i' faut penser qu' les mêssieux du Conmité “ConCom” ont fait d'lus mus, et ch'est probaliément un bouan “mus”, pour l'întéthêt d'Jèrri quand l'Marchi s'sa en allant.

 

J'tais amûsé d'liéthe qué l'hauchissement d'la valeu des tîmbres pour env'yer des lettres en Angliétêrre n'est pon, d'après lé Maître d'Poste, un problème. P't êt' pon pour li, mais v'la tchi dait être un problème pour la pouchette des cheins tch'ont à payi la hauche!

 

Ch'est tèrribl'ye d'vaie l'nombre d'îndividus présentés d'vant Justice pour êt' en possession d'cannabis et aut' drogues. J'espéthe qué l's autorités s'en vont continnuer à d's'encouothagi l'trafi des drogues et punni les cheins tch'en sont en possession car ch'est pour lus bein. I' veinnent bein vite êbédés s'i' continnuent à feunmer chutte mauvaise hèrbe-là.

 

Et ch'est honteux d'vaie tch'i' y'a ieu trais chents huiptante-quatre condamnâtions par la Justice pour aver cachi des motos en étant souos l'înfluence dé la bouaisson duthant 1971. Tchi travas qu' tout chutte baithie-là donne à la Police et au Juge dé La P'tite Cour! J'mé d'mande tchiquesfais, quand j'vai la mînséthe qué l'ivrouangn'nie amene, comment qu' un homme peut aver la conscienche dé garder aubèrge!

 

 

George d'La Forge.