1963: Ph'lip et l' “show” d'l'Ile

 Ph'lip et l' “show” d'l'Ile

 Une clâsse tch'i' voudrait aboli

 

à Portinfé, Saint Ou.

Vendredi au sé

 

Moussieu l'Editeu,

 

La charmante dame royale, tch'est v'nue nos vaie, est r'horte. mais oulle a laissi des mémouaithes tchi restéthont avec nou longtemps. Ou n'eut pas grand r'pos du qu'mench'ment jusqu'à la fin d'sa visite, mais j'ai ouï dithe que quand, à la fin, ou s'en fut, ou n'pathaissait pas un mio lâssée. Ch'n'est pas êtonnant, Moussieu, que la famille royale est si populaithe et si estimée dans lûs pays tandis que dans tant d'autres, ch'est à ch'teu des républyiques et des révolutions. Il est à espéther que l'Angliéterre restétha fidèle à ses royautés, et que, comme dans tant d'autres choses, ou montrétha tréjous un bouon exemplye au reste du monde.

 

En Améthique, tchi n'a jamais yeu un rouai, y'a tréjous du brit tchique bord, et l'pouôre Président est tréjous à tâchi de préserver la paix d'un bord ou d'l'autre. Au moment, ch'est dans l'sud, ouèsque la populâtion est mêlée, qu'est l'pièthe, et i' s'en va faller toutes le qualités que la Providence a donné au Sieur Kennedy pour restaurer la paix. Quant à mé, je n'voudrais pas sa djobbe pour toutes les richesses du Pérou.

 

J'eus la chance d'être transporté au grand “show” d'l'Ile après diné, et j'si content de n'l'aver pas mantchi. Y'avait du bieau solé, mais étout un mio d'vent tchi n'tait pas bein caud. Quand je r'vins, la Merrienne voulit tout d'suit saver tchèsque j'avais veu.

 

“Eh bein, bouonnefemme,” j'li dis, “j'ai veu de bouonnes bêtes, mais étout hardi que j'trouvais médiocres. À l'prendre tout travers, j'dithais que j'ai veu miyeu, sinon pour des bêtes comme la vaque au Sieur Rondé, le vièr bœu à Francis Le Ruez, et parmi les pûs jeunes une doûzaine ou d'même que nou pouvait admither. I' m'semblye, quand-méme, que les clâsses de g'niches r'nouv'llées et des jeunes vaques n'étaient pas numétho yun, avec tchiques exceptions. J'si persuadé que j'verrons un miyeu 'show' au mais d'octobre, car ch'est généralement d'même d'nos jours.”

 

Quant à la vente, mêcredi, je n'm'êtonne pas que tant d'bêtes ne fûtent pas vendues, car les frais sont trop hauts, et un fermyi tchi vend sa g'niche séptante louis, fais une perte une fais tch'il a péyi les dèpenses. Mais, après la vente, i' s'trouvit d's ach'teurs, et après tout, nou n'peut pas dithe qu'ou n'fut pas utile à tchitchun. Pâslant ocquo du “show” j'ai ouï que l'bœu à Francis Le Ruez est prèsque seux de s'en aller au Sud d'l'Afrique, mais j'n'ai pas yeu une chance de li d'mander si ch'est vrai. Y'a une autre chose. Plûsieurs personnes tchi n'avaient pas 'té au “show” des Trais Pâraisses, m'ont d'mandé si j'criyais que la jeune vaque, tchi fit l'championnat là, et 'tait morte le préchain matin, éthait battu la vaque au Sieur Rondé. Eh bein, Moussieu, pour compather une vaque à une autre i' faut les vaie ensemblyes, mais, franchement, je n'crais pas que la jeune vaque éthait peut l'faithe, car l'autre n'a jamais pathu mûs qu'ou n'fait à ch'teu'.

 

Y'a ocquo une chose, Moussieu, et ch'est la compétition pour la coupe donnée pour la miyeu bête sûs l'têrrain. J'dis à la Merrienne tch'il 'tait grand temps que chutte compétition là fut abolie. “Et pourtchi?” ou d'mandit. “Parsque,” j'li dis, “le bœu n'a autchune chance. Dans l'couothant de toutes les années tch'ont pâssé, j'crais qu'un bœu a gâgni la coupe seulement une fais, et ch'tait après que les juges avaient consulté le 'referee', un vier garçon tchi n'aimait pas les femmes. S'i' voulaient changi chonna, et donner la coupe pour la pûs belle personne sûs l'têrrain, che s'sait difféthent, car dans chu cas-là l'homme s'sait tréjous le gâgnant.”

 

“Jamais d'ta vie!” ou s'fit, “car y'a tréjous pûs d'femmes que d'hommes ès 'shows' d'l'Ile.” “Vèthe, ma chièthe,” j'li dis, “mais hardi des femmes donn'aient lûs vouaix à l'homme et chonna parsque les femmes sont jalouses par natuthe, et y'en éthait hardi tchi n'voudraient pas vaie yunne de lûs sexe exaltée en d'sûs du restant.”

 

Tout ch'que la bouonnefemme dit là-d'ssûs ch'tait que j'raisonnais comme un achocre, et j'nos mimes à pâsier d'autres choses. Ou qu'menchi par me d'mander pourtchi que les Améthitchains 'taient si ordgilleux du fait que yun d'lûs experts avait fait l'tou du monde pûs d'vingt fais dans une machine tch'avait couôté des millions et tch'avait print au mains deux ans a fabritchi.

 

“Damme!” j'li dis, “j'n'ai autchune idée, pas pûs qu'té, tchi bein que chonna a fait à personne. I' m'semblye qu'au jour d'agniet, quand y'a dans l'monde des millions d'monde tchi sont affamés, les sous éthaient 'té mus dêpensés en lûs donnant d'la nouôrrituthe, mais si nou lûs disait chonna i'nos enfreum'thient dans tchique âsile pour aver perdu la tête.”

 

La Merrienne hallit un long soupi, épis, “J'crains hardi que ch'est la véthité, mais as-tu veu dans la gâzette à ces sé, Ph'lip, que l'Révérend George Dorey est mort?”

 

“Oui,” j'li dis. “Je l'connaissais quand, y'a bein d's années, i' tait dans l'office à Giffard. I' faut admettre que dans chu temps-là j'n'éthais jamais creu tch'i' s'sait dév'nu Pâsteur, mais sans doute i' fut converti par le George Whitley ou le Charles Binet, et décidit que pour un jeune homme sérieux il avait êtudié la louai dans Hill Street assez longtemps. Enfin, il est hors à explitchi chonna ouèsque i' dév'thait trouver d'autres Pâsteurs tch'avaient qu'menchi d'même. Nou n'craithait pas que l'Fred et l'Joe, tchi restent éthaient yeu l'George pour lûs frèthe, mais y'a de bein drôles de choses que nou trouve dans hardi de familles en Jèrri.”

 

Nou-s-est content d'saver, Moussieu, que man vièr amîn, lé Connêtablye d'Saint Cliément, est un mio mûs. J'espèthe de le r'vaie sûs ses pids tchique jour, car ch'est un homme que j'ai tréjous admithé, et j'avons 'té d'bouons amîns pour bein d's années.

 

Ph'lip.

1963