1963: Ph'lip Est Bein Mârri

 Ph'lip Est Bein Mârri

La Merrienne À Une Idée

 

à Portinfé, Saint Ou.

Vendredi au sé.

 

Moussieu l'Éditeu,

 

J'si un homme bein mârri, et j'm'en vais vos dithe pourtchi.

 

 Mêcredi matin j'm'en fus en Ville avec une p'tite cherge de patates. J'eus un assez bouon prix, et j'trouvis tchiques vièrs amins tchi n'avaient autchune objection d'aver un p'tit lermin avec mé. Mais, Moussieu, ch'n'est pas pour dithe que quand j'mé décidis d'prendre la route pour Portinfé, j'tais caud d'bèthe. Même à m'n âge i' faut pûs que chonna pour me châtchi, et j'savais tout à fait bein chein que j'faisais.

 

 J'prins la route de haut jusqu'au Bel Royal, avec l'intention de ramonter Bieaumont, mais j'fus forchi d'prendre la vallée d'Saint Pièrre par des hommes tchi 'taient à dirigi l'trafic, et je qu'menchi à me d'mander tchès-que chonna voulait dithe, car, dans man temps, nou prenait la route que nou-s-avait chouâisi. Y'a deux auberges dans la Vallée, et je qu'menchais à aver sé, mais quand j'voulis r'prendre ma route, j'eus à r'touônner, et, pour en fini, i' 'tait un mio tard quand j'me r'trouvis siez mé. J'tâchis d'explitchi à la Merrienne, ou s'mint dans la tête que je n'tais pas sobre, et ou n'voulit pas m'écouter. Dépis chonna, Moussieu, ou n'm'a prèsque dit un mot, la vielle pihagne. Si j'en avais l'pouvé, Moussieu, j'n'éthais rein sûs la route que des vans et des hèrnais, quant ès autos j'en f'thais une fouée au chinq dé novembre.

 

 Le terme de Moussieu Mouothant, le Connêtablye d'Saint Sauveux, s'en va expither et à s'n âge nou n'peut pas s'attendre tch'i' voudrait r'prendre pour un autre trais ans. Il a fait un raide bouon Connêtablye, mais sans doute les pâraissiens trouv'thont d'autres tchi voudront le poste.

 

 Le nouvieau Juge n'a pas 'té difficile à trouver, car le Sieur de Faye, pas un mio dêcouothagi par sa défaite la preumié fais, n'eut pas d'oppôsition. Aut'fais, étout, un homme pouvait êprouver pûs d'une fais d'vant y v'nîn. Le Sieur le Cornu, par exemplye, êprouvit quatre fais. I' fit un bouon Juge, et d'vînt Lieutenant-Baillyi sûs ses mérites. Mais dans chu temps-là le poste de Juré-Justicier avait bein pûs d'responabilité qu'au jour d'agniet, et j'me r'souveins que quand j'en rencontrais yun j'li hallais tréjous man chapé.

 

 Nou-s-a veu dans la gâzette, Moussieu, de chute grôsse somme qu'a 'té gagnie dans un sweepstake. Y'a d's années que j'dis que nou dév'thait aver tchiquechose de la sorte ichîn en Jêrri. Ch'est la vraie manièthe de péyi nos dettes.

 

 La Merrienne, ayant décidé tchèsque nou dév'thait faithe avec le surplus d'femmes en Jèrri, s'est minse à ch'teu' à caltchuler le nombre d'hommes dans l'Île, et est v'nue à la conclûsion que y'en a bein trop. Ou m'en dit autant hier au sé, et me d'mandit m'n opinion.

 

 J'li dis que, à ma veue, i' n'y en avait pas assez, et j'li d'mandis tout net et cârré tchèsque ou voudrait faithe avec le surplus, si ses chiffres 'taient correctes.

 

 “Je trouv'thais du travas pour les siens tchi voulaient travaillyi, mais un pièrcheux ithait en bouâite pour au mains un mais,” ou dit, “pour li apprendre. Si chonna n'prouvait pas, j'l'enviêthais en Russie pour vaie tchèsque nou fait dans chu charmant pays-là ès pièrcheurs.''

 

 “Une raide bouonne idée, ma vielle,” j'lis dis.

 

Ph'lip