1972: L'passé et l'actualité

 L'passé et l'actualité

 

Le Ménage ès Feuvres,

St. Ouen.

  

Lé 17 dé juin, 1972.

 

Moussieu l'Rédacteu,

 

Ch'est mangnifique d'èrvaie les vièrs accoints quand nou veint en Jèrri et d'pouver bailli d'sa becque en Jèrriais auprès aver ieu à pâler en Angliais pour siex mais d'temps dans l'Nouvieau Monde. Et ch'est pliaîsant quand nou s'èrtrouve auve des Jèrriais tchi d'meuthent, comme mé, à l'êtrangi, et tch'ont adonné à v'nîn visiter l'Île en mème temps qu' sé. L'aut' sémaine j'eus l'pliaîsi dé r'vaie Madanme Veuve Lydia Ritzenthaler, née Sarre, tchi d'meuthe à Obernai, en France. Eune charmante danme tch'est Jèrriaise jusqu'à la moelle des os. Ouaithe qu' oulle a pâssé la grand' partie d'sa vie hors-pays ou n'a pon oublié un mot d'san Jèrriais, et ch'est un pliaîsi d'convèrser auve lyi. Ou fut ieune des preunmiéthes à jouaindre L'Assembliée d'Jèrriais. Iun d'ches jours ou s'en r'va à Obernai et j'm'en r'ithai en Améthique, mais les pensées et les bouans souv'nîns unissent les Jèrriais tchi d'meuthent dans difféthentes parties du monde, êlouangnis l's uns d's autres mais liés par la langue matèrnelle et la connaîssance dé la vie en Jèrri dans l'temps jadis.

 

Et l'absence d'un tas d'anmîns qu' nou-s-a connus et tch'ont pâssé l'pas vouos fait penser au passage du temps et ès mots dans La Litourgie tchi nouos disent : “ L'homme est de courte vie. Il sort comme une fleur, puis il est coupé, et il s'enfuit comme une ombre qui ne s'arrête point!” Quand j'pâssais dans l'chînm'tchiéthe pârouaîssial à matîn j'en viyais-t'-i', des noms sus les tombieaux, qué j'connaîssais! Et j'tais étonné d'vaie tant d'Feuvres mentionnés sus ches tombieaux. Y'en avait-i', dans l'temps, d'chu nom-là à St. Ouën! A ch't heu, j'sis l'seul dé ma sorte dans l'coin nord-vouét d'la pâraisse, et i' n'y en a pon un seul quand j'sis hors-Jèrri!

 

Quand nou y'est, hors-Jèrri, nou pense qué si janmais nou-s-a la chance dé r'visiter l'Île au r'nouvé, nou pouôrra s'régaler d'fricots d'nouvelles patates - les miyeuthes au monde - et mangi des pihangnes, des baînis et des v'licots. Nou s'rappelle qué Manman disait, quand nou-s-était mousses, tch'i' fallait les laissi dans lus sau eune fais tchuits pour tch'i' saient pus tendre. Véthe, nou crait qu' nou-s-îtha pâsser un tas d'temps au rotchi et qu' nou s'en r'îtha à la maîson atout des pann'lées d'ches bouans baînis et v'licots-là comme nou l'faîsait y'a eune septantaine d'années! Mais quand nou s'y trouve, en Jèrri, nou vais qu' les gens n'y vont pus, ès bainis et ès v'licots, et qu' la mâjorité des jannes n'en ont janmais gouôté! Sans doute, nou peut, aller ès pihangnes si l'temps est propice, mais i' n'y en a pon tant comme i' y'en avait l'temps pâssé.

 

Nou pense qué nou-s-îtha ès ormèrs, étout, au s'tembre. Nou n'peut sénon s'ramémouaither tch'i' n'y a rein d'miyeu au monde à mangi. Nou n'en vait janmais sus la tabl'ye en Améthique à mains qu' nou' sait en Califournie. Là, nou-s-en vait tchi sont grands comme des castchettes, et iun est assez pour rassâsier deux pèrsonnes!

 

Enfîn, l'temps veint qu' nou s'y trouve, en Jèrri, mais ch'n'est pon l'Jèrri du temps jadis, et nou-s-oublyie les bainîs en voulant marchi les vielles rues si bein connues dans san janne temps, et pis quand les motor vouos pâssent - à quarante milles à l'heuthe - i' faut s'fouôrrer dans l'fossé dêliêment pour n'êt' pon abattus ou fichis en biheinedaine! Et acouo Mait' Jean Cliément n'est pon d'avis qu' nou dév'thait lînmiter la vitesse à mains d'quarante milles dans cèrtaines routes!

 

J'sai bein qu' un tas d'pèrsonnes, autrément qu' lé Sieur Cliément, n'sont pon dé m'n avis, mais, comme j'l'ai souvent mentionné, “Jo di è dirai” (comme disait Maistre Wace) acouo eune fais, qué 40 milles à l'heuthe est eune vitesse folle dans les p'tites routes, et il est grand temps qu' les Connêtabl'yes faichent comme lé Connêtabl'ye L'Breton d'St. Sauveux et forchi les motoristes à réduithe la vitesse à 20 et 30 milles à l'heuthe dans cèrtaines rues. J'ai tréjous admithé l'Connêtabl'ye L'Mèrquand de St. Pièrre pour aver ieu l'couothage dé l'faithe, dans sa pâraisse, ouaithe qué j'sis l'seul tchi pathaît y prendre avis et réduithe vitesse accordamment quand j'pâsse par là. J'en pâlis à un ex-Offici d'Connêtabl'ye un jour. “S'i' fallait arrêter les cheins tchi dêpassent les 20 milles à l'heuthe,” i' m'dit, “i' faudrait eune deuxième P'tite Cour pour les présenter, et il en couôt'tait trop à l'Île!” Eh bein, j'avons deux Magistrats salariés à ch't heu, et i' trouvethaient l'temps.

 

Dans touos les cas, pourtchi tant d'vitesse? Jèrri n'a qu' eune douzaine dé milles dans toute sa londgieu! Nou comprendrait s'i' fallait cachi 50 milles pour aller en travas, mais j'en doute si pèrsonne a à cachi pus d'six ou sept milles à y'aller! Pourtchi cachi si vite? La vitesse est la cause dé la maîntchi d's accidents qu' nou vait dans la gâzette touos les sièrs, et ch'est à cause dé la vitesse tch'il en couôte tant à r'graie les motos endommagis!

 

 

George d'La Forge.