1950: Flip et Merrienne vont en visite

 Flip et Merrienne vont en visite.

 

 

 

Quant Flip Larbalestier fut payi sa ferme, son proprietaithe l'y d'mandi d'ly faithe un plaisi et ch'tait de v'nin siez li prendre un r'pas avec la Merrienne et la mousse. Quant y vint siez l'y y dis a Merrienne qui s'naler pas y'aller. La Merrienne se butti sus son gethait d'riethe et l'y dis : J'allons y'aller, grand begos, maniethe de fousno p'tetre bein qui craient qu'ai sommes des p'tits fermiers et qui sont milleurs que nous, j'allons lus montrer.

 

La mousse dis a sa methe “faudra que pépés prenne sa grand boule à soup.”

 

Le grand jour vint et quant y rentrirent siez l'Moussieu, nathutellement d'vant diné y d'mandi a Flip si voullait prendre un aperitif. Comme d'habitude la Merrienne mal comprins et ou dis : Nonnin, y n'a pas besoin, y prins des salts hier au sait, mais quant ou vi que ch'tait chique'chose d'une grand' bouteille. Oh! oudis, j'en aithait bein un p'tit lermin mai meme!

 

Le Flip tremblait comme une fielle, et en mettant son bras sus une amouaithe y mins sa main par accident sur une bouteille d'encre et ne v'la tout dans l'air. Y ramassi son beaue mouché d'soie pour essuyé le pitait, et l'ermins bein vite dans sa pouchette.

 

Ch'tait là le c'menchement d'une séthée tragique. Quant Flip vit le ptit goutin d'soupe de tomates dans l'fond de s'n assiette y dis a l'y même : y n'en a pas assez pour nié une puche, ch'est pas la peine de faithe servi une cueiller, et s'mins a bèthe a même. La Merrienne l'y bailli un coup avec son couté, que l'Flip laisse tout courre et envie tout sus ses braies. Flip resti la plianté justement comme une canotte a pondre. Comme se fis la mousse : 'Garde mémés, pépés a des rouges braies!

 

Chez qu'ou ethaites fait vous dans un cas d'même. Chez qu'ou criez quai la Merrienne fis, ou l'y frotti l'dos. Comme se fis l'Flip après, aussi bein m'envier un coup d'pi. Mais la Merrienne eut son tour. Y'avait des patates roussies, et ou volli d'sus comme un cat sus une southie. Mais hélas, un coup la patate dans la bouche ou brulait, ou n'pouvait pas l'avallé ou bein oulle ethait brulé son gozi, ni ou n'pouvait pas la renvie dans l'assiette.

 

Le Flip aperchu un verre avec chique'chose dedans et la Merrienne l'avalle dans un seul coup, mais ch'tait l'eau d'vie, et ou mantchi d'estouffer, et l'affaithe l'y sorte par le nez et la bouche. La sueur l'y boulle ava la fache, et Flip ra masse son mouché pien d'encre et l'y frotte la fache; oulle avait une fache justement comme le dos d'un zebra. Les hardelles riaient comme des boussus, même le Mousieu en avait ma dans l'corps, car il voullait rithe etout.

 

Chenna fini le r'pas. Commes les grandes dames font après dîné, ou d'mandit a Merrienne si ou voulait lave ses mains; ou fut bein enorphentée et ou dis bein sèchement : Nonnin, mercis, je l's ait lavées d'vant mon v'ni.

 

En conversation la Merrienne dis qu'oulle tait bein contente qu'ai les villais avais a payi pus pour eaue, chenna les sert bein, y veullent tout pour rein. Ou n'tait pas du tout en faveur d'avait une femme dans la police.

 

Avec touos chez chant'niers là, y sont tous comme des p'tits coqs bontins. Dans l'entre temps Flip tait avec le Monsieur et comme y'avait tout pien a béthe, mon Flip en profitti, mais quant vint un temps y n'avait deux brins dans l'nez, et le v'la excité.

 

La Mousse s'en vint couthant a sa mèthe, et l'y dis : Pépés est sous, il est a chanté. Il entrit dans l'parleux crollant et riant et chantait : “Nou est-ti bête quant n'ou est sous, j'ai perdu Merrienne en pliantant des chours.” La Merrienne, pus en rage que d'peine s'engroutti a plieuthé et dis : J'avons tait mathiés pus d'vingt ans, jamais j'l'avais veu d'même devant, j'ai l'tchoeu rompu.

 

Chenna finit la séthée, et y s'en furent bein vite siez yeux. Et en s'en r'allant la Merrienne y'en chanti a chu pouorre megean, mais t'en pus qu'ou gronnait tant pus y riait; il tait accou blindé. Mais helas, y'a tréjous le matin d'après, et quant Flip se resveillit y plianni de mal a tête. Merrienne pensi : ch'est là mon temps et vos y'en chanti et l'y dis. Ah! mon pendloc, lève-tait, en travas, va t'en plianté des chours, la Merrienne est er'trouvée. Mais y sont bein décidée qui vaut bein mus vivre dans lus p'tit tripot que faithe comme les grands gens, et mai-même je crait qu'ils ont raison, et accou 'près tout en sont t'y pus heutheux!

 

(SP Le Ruez?)

1950