1974: Historique

 Historique

 

Le Ménage ès Feuvres,

   St. Ouën.

Lé 21 septembre, 1974.

 

 

Moussieu l'Rédacteu,

 

Ch'est bein intérêssant d'liéthe, dans l's almonnas d' “La Nouvelle Chronique”, la “Récapitulation des principaux événements” tch'ont lieu avau l's années, et, pour mé, l's êvénements d'l'année mil huit chent nénant'tch-ieune – l'année d'ma naîssance – ont un intéthêt tout spécial. Sus bein des sens i' y'en eut d'assez împortants ch't' année-là. Jé n'voudrais pon prétendre, sans doute, qué ma naîssance fut d'autcheune împortance pour lé publyi, mais oulle 'tait d'grande împortance pèrsonnelle pour mé!

 

Pour les Méthodistes Wesleyens, ch'tait l'preunmyi d'mar qué l'sujet des sèrmons dans lus chapelles 'tait l'Révérend John Wesley, viyant qué l'préchain jour, lé 2 d'mar, 'tait l'chent'naithe dé san décès. Pour l's Anglyicans, ch'tait l'ouvèrtuthe et consécrâtion d'la neuve Églyise dé St. Paul. Lé Très Révérend George Orange Balleine, Douoyen d'l'Île, prêchit l'sèrmon. San texte fut : “La Maison de Dieu est l'Église du Dieu vivant, la colonne et l'appui de la vérité”. Un texte tch'est tout aussi vrai au jour d'aniet comme en mil huit chent nénant'tch-ieune.

 

Jé n'pouorrais pon vouos dithe quantchi qu' la preunmié pièrre dé la preunmiéthe Églyise dé St. Paul fut pôsée, mais l'églyise mème fut ouverte lé 14 dézembre, 1817. I' faut penser qu' oulle avait dêtérioré hardi auve lé pâssage du temps, car dévant sa nouvelle consécrâtion en 1891 oulle avait 'té r'bâtie ès frais d'sa congrégâtion au montant de £4,200. La grand' vèrrinne fut présentée par Madanme Millais, veuve dé Thomas Millais, Êtchuyer. P't-êt' la mème fanmile du fanmeux peintre? Mais quand nou pense : Eune églyise èrbâtie pour £4,200!  Ch'est à peine si nou pouorrait bâti l'consistouaithe pour chu prix-là au jour d'aniet.

 

Ch'n'est pon seulement d'nouot' temps tch'i' y'a ieu tchestchion dans L's Êtats d'mett' les Recteurs dé pâraisses à la porte. Lé 9 dé dézembre, 1890, lé Député Durell présentit un projet de louai à la Chambre pour les expulser, mais l' deux d'févri, 1891, lé Juge Falle présentit un projet contre lus expulsion, et eune assembliée des constituants d'Ste. Mathie donnit l'mandat à ses r'présentants d'voter contre étout. Auprès eune grand' distchussion dans L's Êtats la décision fut r'mînse à un aut' jour, et l' 19 dé févri l'projet du Député Durell fut réj'té par 32 vouaix contre 10. Les Recteurs restîdrent don siégis jusqu'à la souô-dîsante réforme de 1948.

 

Ch'tait l' 26 d'janvyi qué L's Êtats adoptîdrent la louai tch'êtablyit l'vote au scrutîn dans l's êlections par 28 vouaix contre 12. Ch'tait étout en 1891 qué nouot' belle langue Jèrriaise c'menchit à en perdre officiellement. Lé 22 d'janvyi, lé Recteur dé Grouville propôsit ès États qu' à l'av'nîn les membres aient la libèrté d'faithe lus discours dévant la Chambre en Angliais, mais i' pèrdit san projet lé 9 d'avri par 22 vouaix contre 12. V'la tchi montre quand mème qué l'idée 'tait dêjà dans la tête dé cèrtains membres. Ch'tait finnalement l' 8 dé févri, 1900, qué L's Êtats adoptîdrent lé projet d'pèrmett' l'ûsage dé la langue Angliaiche dans la Chambre.

 

I' pathaît qu' les Français dans l'Île en 1891 né lus comportaient pon aussi bein comme les Jèrriais. D'après l'rapport du Conseil dé la Prison, présenté l' dgix d'mar, sus 58 crinminnels condamnés par La Cour Rouoyale, 43 'taient d'nationalité Française. Appathemment la bouaisson, comme au jour d'aniet, 'tait hardi la cause dé mauvaîtchi, car septante-chînq pour chent des condamnés 'taient en prison pour aver bu trop. Mais la Justice 'tait pus sévéthe dans chu temps-là qu'ou n'l'est à ch't heu, car lé 14 dé mar un “gamin du nom de McCrum”, trouvé coupabl'ye d'vol, fut' condamné à trais s'maines dé prison et “six coups de verge”. I' n'avaient pon d'peux d'publiyer les noms des mauvais individus ayant mains qu' 20 ans, ni d'faithe sèrvi la badgette. Un bouan exempl'ye tchi s'sait utile dé siéthe à ch't heu qué j'sommes embêtés par eune racachie d'rôdeurs dé bas-âge.

 

I' faut penser qu' les Jérriais lus sont tréjous butés sus lus pids d'driéthe pour consèrver lus drouaits et privilèges, et tant en fut en 1891 quand un Ordre du Conseil dé Sa Majesté annoncit qué l'Gouverneux s'en allait rempliaichi l'Bailli comme Président du Conseil dé la Prison. Lé 19 d'octobre eune délégâtion fut env'yée à Londres par L's Êtats pour protester contre un Ordre tch'avait 'té donné sans consultâtion auve l's autorités d'l'Île, auve lé rêsultat qué, lé 27 juin, 1894, l'Ordre du Conseil dé Sa Majesté fut rappelé.

 

Mème lé temps n'fut pon normal duthant l'hivé d' 1890-1892. Lé 22 d'novembre, 1890, l'almonnas nouos dit qu' “Une violente tempête se déchaine sur l'Île”. Lé 17 dézembre l'hivé dév'nait d'piéthe en piéthe. I' g'lait touos les jours, et tout l'monde 'tait à patinner partout. Lé 5 dé janvyi, 1891, tout 'tait couvèrt dé né et nou viyait des trainés partout dans les rues. Lé 17 tout 'tait couvèrt dé glace et l'almonnas nouos dit qué ch'tait l'piéthe temps connu d'pis quarante ans, et l'31 (dé janvyi) ou nouos dit “L'hiver règne avec une sévérité inoule” et qu' la g'lée avait duthé deux mais sans r'lâche!

 

 

George d'La Forge