Lettre Jerriaise Le 1 d'Févri 2003

 Lettre Jerriaise Le 1 d'Févri 2003

Ch'est l'pliaisi d'Clifford Laisney d'vos addrechi naniet Samedi l'1 d'Févri 2003 en vos présentant la Lettre Jerrsiaise. Ne v'la déja siez s'm'naines depis l'pus court jour de l'année, et les gens tchi sont révilyis d'un heuthe réspectablye prendent avantage de 25 minutes du solé l'vant, et 50 minutes du solé couochant. OUI, l'printemps est en veue, car tchinze jours passé hier sus iune de mes prom'nades, j'tchilyi mon premier touffé d'p'tites bounnefemmes. Un vrai signe que l'hiver est drièthe nous, j'vos entends dithe. Ne seyiz pas enchaillis d'chutte certain'té. I i'a acquo deux mais d'dangi, et j'crai que l'temps est èchu pour nos faithe rammemouaither d'la séverité d'hivers que j'avons connu.

 

A matin, j'veurts reminiscé auve vous envers un programme que j'entendi sus Radio Jerri i'a une tchinzaine de jours passé. Ch'tait concernant un caractêthe bein connu en Jerri sustout parmi les compagnards. Moussieu Pike de Perry Farm l'aute coté des Sts Germains a St Louaithains. I faut értchulé l'houologe cinquante années. Le sier Pike avait acater la ferme et s'n'intêthet 'tait d'collécté d'l'hâsi, et avaut l'temps i transformi les batisses et l'pré au d'vant d'la maison auve une collection d'materiels tch'authez pas déhonté un musée. Il allait es vendues a l'encân et acater toutes d'sortes d'affaithes que d'autes gens y prennais intêthet. Si y avait des lôts tch'in attractées pas d'acteurs, l'encanteux disait, 'Moussieu Pike', et i s'trouvait chèrgi d'affaithes que personne voulaits. Mais, l'homme n'etait pas si bête comme peut etre mal habillyi, car le temps arrivi que les gens traversaits l'ile pour acater et souvent par tchuthiousité payaits une visite a sa menâg'gie. Ch'tait un rendezvous pour fermiers dans l'temps qu'lés ouvriers v'naits pour siez s'm'naines dûthant la saison d'patates. Que s'fusse liets, lincheurs, casseroles, tchaises, armouaites, n'importe tchi fallait, une visite siez Pike etait nécessaithe pour fourni les besoins d'accomodation. Même les gens dans la construction, sustout les 'Do it Yourself', comme j'les app'lons manque d'un meilleu nom dans l'vocabulaire trouvez toutes sortes d'affaithes, portes, f'netres, ôtis etc. Souvent ch'tait une tchestchion d'bardginner auve le moussieu pour tchiquechose tchi couoté qu'des capeurs.

 

J'comprends qu'le sier Pike est acquo vivant et plein d'vie dans sa d'meuthe dans sud d'l'Anglieterre, et tch'il est acquo collecteu, pas 'tant l'hâsi mais d'motobikes, et actuellement il en a chents dans sa collection. Un vrai carâctethe tcha 'tait mantchi et est difficile a rempliaichi. Ch'tait interessant d'entendre dans l'histouaithe sus Radio Jerri les differents accomtes des gens du vaisinné exprinnons lus memouaithes de li. J'li souhaittons bouonne jouaie et santé dans l'êve de ses jours.

 

Est ce qu'on pensées pas tchi y'avait pus d'carâctethes parmi nous dans l'temps d'not jeunesse. Depis la dernier dgerre, j'avons veu une v'nue graduel de gens d'hors pays. Depis la dgerre la population a augmenter de vers trente milles, et comme ch'la le vrai jerriais a perdu sa significance dans l'ile. Etout, j'avons veu la demise de pauvre'té, la modernisation d'couteûnmes, et tout ch'la a contribuer a classer iun auve l'autre., resûltant dans une societé d'egaleité. Et d'même comme tuous changements le carâctethe dispathe.

 

Ch'èst auve grand r'gret et sympathie que' je r'cordons le decés de Juge Max Lucas. Un vrai moussieu jerriais tch'a contribueur hardi a l'ile. Sécretaithe de la Paraisse de St. Ouen pour bein d's'années, pus tard Juré Justicier de la Cour Royale, un grand contribueur et Officyi du Don Balleine, et dreinment joint rédacteu des Mille Ditons en Jerriais. Chés gens jerriais sonts difficile a rempliaichi, et l'ile est la pus pauvre pour sa passée. Son respé `tait refletchi par la grand congregation assembliée dans l'Eglyise de St Ouen Lundi passé a s'n'enterrement. J'envions nôt sympathie sincethe a Phyllis, Raoul et Helier.

 

J'finis ma présentation sus une note pus joyeuse. Complyiements a Jack et Eileen Le Sueur tchi veins de celebrer soixante chinq années d'mathiage, tout a fait une baille. Félicitations d'la Reine, le Baillyi, Connétablye et une abondance d'anmins contribuites a chutte occasion spéciale tchi termini auve une bouonne sethée d'celebrations parmi tuous lus accountances a l'Hotel Ambassadeur. Je souhaittons bouonne santé, jouaie et tuous les beins a un couplye si charmant et aimablye.

 

Mercie pour m'aver écouté. J'vos souhaite tous une bouonne semaine. A la prechaine.

 

Clifford Laisney