1923: La Liberté de l'Homme

 La Liberté de l'Homme

 

Ous avez sans doute ouï pâler, toutes ches années ilo des "Drouaits d'la Femme" de s'n "Emancipâtion," et de toute sorte d'niollin comme ch'la.

 

Ous avez ouï tout l'tintamarre qu'oulle a fait pour aver vouaix dans l's Assembliées et dans l's Elections.

 

Eh bain, acheteu qu'oulle a gâgni san point, criyous qu'oulle est satisfaite?

 

Pas du tout.

 

Oulle a l'affront de protester qu'i' n'y a pas assez d'êgalité entre les deux sexes.

 

1920: L'Enlouoge qui s'dêrouti

 L'Enlouoge qui s'dêrouti

 

Les siens qu'aithaient 'té dans l'gardin à Mait'e Daniel Tourgis, iun des sétchestres de la Chapelle de St.-Julien, à onze heuthes et d'mie, un certain Dimanche au sé, aithaient veu un grand long maigre individu ouvri la f'nêtre d'la tchuisine bain douochement et introduithe, sans l'moindre brit, sa mêchante carcasse dans la maison dudit Daniel.

 

En le r'gardant d'bain près ils aithaient r'connu Joe Passepartout.

 

Joe dit à li-même. "Quand l'vier Dan me dit l'aut'e jour qu'i n'fallait jamais ermettre le pid sus san pas-d'porte, i' n'fit autchune mention des f'nêtres, ch'est pourtchi, ou mains, je n'sis pas à violer ses instructions en entrant comme chennechin. Mais je n'sais si la Mêrienne tcheindra à sa pathole! Ou m'avait dit qu'ou veindrait, et j'n'ose pas rêmouer de peux de m'trébutchi par sus tchique escabelle et rêvilli les vieilles gens. Ah! la v'chin qu'ou veint!"

 

Et en effet, la hardelle dévalli les d'grès avec un "smile" sus sa fache et un changlyi et une bouaîtée d'allumenttes à la main.

 

Mai 1975: Choses et Autres

 Choses et Autres

 

Trenton,

Michigan

U.S.A.

Lé 24 dé mai, 1975

 

Moussieu l'Rédacteu,

 

Tch'est tch'i' faut faithe pour pèrsuader la gâzette dé donner lus vrai noms ès pliaiches et rues Jèrriaises? J'tais d's'appointé d'vaie dans la gâzette du dgix d'Avri qué dans l'articl'ye dé Sue Le Ruez oulle appelle La Mathe au Seigneur ''St Ouen's Pond'' et qu'ou dit ''Five Mile Road'' pour La Grand' Route des Mielles. Dépis qu'oulle admet dans s'n articl'ye qu'ou connait l'vrai nom d'La Mathe, pourtchi faithe sèrvi l'mênom dé ''St. Ouen's Pond'' comme titre? Auve san bouan vier nom Jèrriais dé Le Ruez ou dév'thait saver mus!

 

En pâlant des mielles, j'liêsais dans eune des aut' gâzettes qué les gens a j'va sont à les dêtruithe. Tchi vie d'nouos jours ! Les autorités veinnent dé prendre les m'suthes nécessaithes – et v'la tchi dait aver couôté chi – pour empêchi les motos d'les sacagi. À ch't heu ch'est la j'vaûch'chie tchi s'abûse à les galvaûder et l's avraûner. I' n'y a pon mouoyen, les gens d'à ch't heu n'pathaissent aver autchun sens d'responsabilité ni d'ordgi au sujet d'la consèrvâtion des bieautés d'la natuthe. Pourtchi qu' les j'vaûcheurs ne vont pon sus les courses quand i' veulent galoper ? Pouorre vier Jèrri ! Auve maisons, motors, j'vaûch'chie, tourisme et mouvements souô-disant démocratiques, i' finnitha par êt' engliouti par l'esprit destructif offrun et finnancyi dé nouot' êpoque. I' faut féliciter l's autorités pour aver r'fûsé d'en sacrifier eune aut' chentaine dé vrégies d'ches belles mielles, pour agrandi l'êtendue du club dé golfe.

 

Avri 1975: Choses et Autres

 Choses et Autres

Trenton,

Michigan

U.S.A.

Lé 26 d'avri, 1975

Moussieu l'Rédacteu,

 

M'èrvélà dans l'Êtat d'Michigan. Ch'est comme si j'tais dans un aut' monde. Dans la ville dé Fort Lauderdale, à vîngt-deux milles dé Miami, en Floride, la tempéthatuthe 'tait dans les huiptante à nénante degrés Fahrenheit touos les jours. Ichîn, en Michigan, ch'est eune affaithe dé quarante dégrés, pus  ou mains, et ouaithe qué ch'n'est rêellement pon fraid, la difféthence est assez pour donner l'împression, v'nant des chaleurs, tch'i' fait fraid !

 

Deux gâzettes dé Jèrri m'attendaient ichîn, les cheinnes du six et treize dé mar, et la preunmié chose qué j'ai fait en arrivant 'tait d'les liéthe tout l'travers. Dans l'annonces des décès, j'ai veu l'trépas d'un vier anmîn, lé Sieur Francis Andrew L'Mèrquand d'Gros Nez, à l'âge dé huiptante-siex ans, et j'veurs faithe mes condoléances à Mdle. Eva, sa soeu. Ch'est seux qu'ou s'en va s'trouver seule et qu'ou s'en va l'mantchi hardi. Lé Sieur Fraînque Le Mèrquand 'tait un charmant vièr Landîn. Consèrvateur et Jèrriais dans l'âme, et nou peut dithe qué né v'la acouo un mio d'Jèrri dispathu. Un autre anmîn – et vaîsîn – dispathu dreinement est l'Sieur Arthur (''Artie'') Vibert, des Palliéthes, iun des bouans corps dé la vie, tréjous riant et prêt à faithe un pliaîsi, et j'fais mes condoléances à sa danme étout. ''Artie'' Vibert avait 'té à la Côte dans san janne temps pour les Robîns, et il avait eune bouanne mémouaithe pour s'èrsouv'nîn des garçons tch'étaient là en même temps qu'li. Il 'tait hardi întérêssi à saver tch'est tch'en 'tait dév'nu, d'ieux, auve lé passage du temps, et La Côte 'tait souvent l'sujet d'convèrsâtion quand j'lé rencontrais. I' s'en vont à grands pas, les vièrs Landîns. Y'en a tréjous tchi manquent quand j'arrive en Jèrri. Et j'vais tréjous pus d'noms Jèrriais parmi les décès dans la gâzette qué parmi les naîssances.

 

1933: Cliément d'Caen va au lanchon

This 1933 story about sand eel fishing raised some questions, so we asked participants at this morning's café chat about memories of cooking/eating sand eels. We also asked about the traditional remedy for des pitcheûthes dé vithelîn (weever fish stings), and participants confirmed what we thought the article was hinting at!

Cliément d'Caen va au lanchon

 

Maît'e Cliément d'Caen était l'aut'e jour à cherfouollyi parmi ses vieillâquethies pour trouver des morciaux d'bouais pour ergraie ses casses a patates, quand i' trouvi parmi aut'es choses san vier râté à lanchon qu'i' n'avait pas fait servi pour au mains une douzaine d'années.

 

I's'mins à l'examiner et v'là qui li ramémouothi les nombreuses bordées de pêque qu'il avait fait à La Rocque le temps passé et i' n'pouvait pas comprendre comment qu'il 'tait v'nu à en perdre l'habitude.

 

I' fut prins subitement d'un envie d'y raller sustout comme i' réalisi qu'acheteu i' y avait bain pus de c'modités pour s'y rendre.

 

Conserving the Past – Sustaining the Future

In honour of International Geodiversity Day on Sunday, October 6th, 2024, aspiring Jersey Island Geopark invites local poets and writers to participate in a special project celebrating our Island’s rich geodiversity. This year’s theme, ‘Conserving the Past – Sustaining the Future,’ aligns perfectly with aspiring Geopark’s mission to protect and promote our unique heritage as we pursue UNESCO Global Geopark status.

We welcome poetry or prose in English and Jèrriais.

Find out more details on how to submit an entry here:

1979: Couôteunmes du temps jadis

 Couôteunmes du temps jadis

 

Trenton,

Michigan,

U.S.A.

Lé 10 d'novembre, 1979

 

Moussieu l'Rédacteu,

 

"J'tais ravie d'vaie la fanmil'ye Choutchet à prendre lé deu à l'Églyise dé St. George dînmanche au sé," Missis Sprague dît à Manman quand j'la rencontrînmes dans La Rue à La Pendue en r'vénant d'la boutique, à La Fontaine, quand j'tais mousse.

 

"Bon!", Manman lî dît, "et pourtchi? Nou-s-a couôteunme dé prendre lé deu l'preunmié Dînmanche auprès l'entèrrement quand y'a d'la mort dans la fanmil'ye."

 

"Sans doute," s'fît Missis Sprague. "Jé l'sai bein, mais les Choutchets sont d'la Chapelle à ch't heu. Y'a dêjà longtemps tch'i' sont Méthodistes Wesleyens, et j'éthais creu tch'il' éthaient prîns l'deu à la chapelle dépis qué l'bouanhomme Choutchet est entèrré là."

 

1932: Lé Spring Cleaning (2)

  (siette et fîn)

Siez Rachel Larbalestchi san bouan suit a tai trébutchi; oul avait ieune femme a yaidyi et oulle avait emmnait san mousse avec yi. Tandi qui taient a essecoué l'tapis; l'mousse trouvi eune pottais d'peinture et un pisciaux et peignit l'suit. Quand y r'vindre dessecouer l'tapis l'mousse tait d'ouoyi d'pis la tête es pis; et l'suit tout ruinait. Missis Larbalestchi failli sesvenni, ou faisait pitchi.

 

* * *

 

Siez not' neveu Clem, yen eu du tripo a lus spring cleaning; les filles dirent à lus memmée: faut avé Jane a nos aidji a not' spring cleaning, chest là la hardelle pour vos touanné un mainsnage, not'r' spring cleaning n'sait pas long. Nen, d's'esfants, mais y pouaurrait être bein large. Jane est trop brusque. Enfin, faites coumme ou souhaitrez, s'fit la bouonne femme.

 

Au jour dit, Jane arrive. Allons! s'fit Jane, faut s'y mettre, pas d'lendottis.

 

La bouonne femme dits a Jane: faudra ergardait bein a ma bouonne armoithe française, tu vé bein Jane les biaux panniaux kerevais. Sus un pannait "le déluge" et sus l'autre "l'Arche d'Noé." Faut ergardait bein d'n'pas la grimmé. Jane dits: j'allons la viedji, et touos l's habits et l'grand portrait d'acotait, j'allons mettre tout sus l'liet; et couvri tout avec un lincheu, et pis j'la carrerons pour netti et esposté l'szérangnis endriéthe.

 

1932: Lé Spring Cleaning (1)

Lé c'menchement d'un texte dé Jean Maûgi:

 Lé Spring Cleaning

 

Ses avantages et ses d'savantages

 

Quand dans l'mais d'Avri l'coucou fut oui, l'mais d'Avri dit: j'men vais parti car l'spring cleaning s'en va q'menchi, et j'veurt pas m'y touillyi. Dans onze mais j'rvaindrai vos r'vais.

 

A peine l'mais d'Avri parti n'vla l'spring cleaning q'menchi. D'pis l'lundi jusqu'au samedi, l'esprit des femmes est surchergi, ch'est l'spring cleaning qui s'en va l'sotchupai, d'pis l'matin jusqu'au sé, dans la niet l'dormi lus est enl'vait, et l'spring cleaning s'présente a yieux, avec eune table, des vaissiaux et d'long ridjiaux, d'sérognies et des tapis.

 

A peine l'jour q'menchi l'esprit q'menche a travailli, faut vite sé l'vé, pour tout tchulbutai, les tapis, les liets, l's'armoithes à habits, peinture à lavai, pianchais à scrobbai. L's'hoummes n'savent pas iou lus coulai, et lus mettent a murmurai, y s'rai prêts en enviai tout a barteni-bay pour jammais n'lervais.

 

1980: À l'êcole

 À l'êcole

 

Moussieu l'Rédacteu,

 

"Tch'est qu'tu'as apprîns à l'êcole aniet?" Papa mé d'mandit quand j'tions assis au pid du feu auprès l'thée.

 

"Pon grand' chose qué jé n'savais pon d'vant," j'lî dis.

 

"Ch'est drôle, pourtant," i' m'dît, "car même quand nou-s-est vièr nou-s-apprend tchiquechose touos les jours. J'ai apprîns dans la forge à matîn qué v'là tchi n'paie pon dé donner à crédit à un ivrouangne, car quand il a tchiques sou dans sa pouchette i' les met à acater eune boutelle dg'ieau-d'vie pûtôt qué d'payi san compte dé forge."

 

"Véthe," j'lî dis, "jé l'sai bein, mais les maitrêsses à l'êcole sont pus bête qué poule. I' n'savent pon comment d'mander des tchestchions raîsonnabl'yes. À matîn la maitrêsse m'a dit: 'Viyant qu'tan P'pèe et tan Papa sont forgeurs et fétheurs dé j'vaux j'm'en vais té d'mander des tchestchions qu'tu peux rêpondre aîsiement. J'veurs qué tu prenge avis à chein qué j'té d'mandes, car lé Canon Luce, Recteu d'St. Sauveux, s'en va êt' l'Înspecteux tchi veindra la s'maine tchi veint, et j'té d'mand'dai les mêmes tchestchions quand i' s'sa là à înspecter la clâsse. Né v'chîn la preunmiéthe: Si tan P'pèe prend vîngt minnutes à féther l'pid d'un j'va, combein d'temps tch'i' lî faudra pour féther les quat' pids?'

 

1980: Dans l'Nouvieau Monde

 Dans l'Nouvieau Monde

 

San Antonio,

Texas, USA.

 

Lé 25 d'octobre, 1980

 

Moussieu l'Rédacteu,

 

Ch'n'est pon aîsi d'rêaliser tch'i' n'y'a qué quat' jours dépis qué j'tais en Jèrri à vailli d'ma becque en Jèrriais d'un temps péthissabl'ye. Ch'tait probabliément du temps d'même tchi fit Napoléon Bonaparte appeler iun des mais d'san calendri républicain "Pluviose". À ch't heu, m'èrvélà au Texas en Améthique où'est qué jé n'oui qué d'l'Angliais à la mode Améthitchaine mais où'est qué j'peux joui d'eune tempéthatuthe dé septante-deux dégrés Fahrenheit à l'ombre, et du bieau solé.

 

Eune chose tch'est bein cèrtaine: I' travaillent bein dû à londgieu d'jour et niet, ches mangnifiques nosses. I' sont dévouées à lus tâche dé souangni et d'soulagi les malades, et i' n'y'a rein tchi né f'thont pon dans l'couothant d'lus jour et niet d'travas, et ch'n'est pon eune aîsie tâche dé souangni un tas d'vieillards tchi n'peuvent à peine bouogi et tchi sont tchiquefais roupilleurs. Et pis y'a l'affaithe dé faithe et r'dêfaithe un tas d'lyits touos les jours viyant qu'les malades vont et veinnent tout l'temps. ch'est r'mèrtchabl'ye dé vaie deux d'ches nosses, ieune dé châque côté, faithe un liet dans un clyîn d'yi, nou peut dithe. Criyiz-mé, bouannes gens, i' méthitent bein lus gages, ches bouannes nosses. À m'n idée, i' n'peuvent pon êt' payies d'trop.

 

J'ai r'gret d'n'aver pon ieu l'temps d'êcrithe à r'mèrcier touos l's anmîns tchi m'envyîdrent de flieurs, des cartes et des présents quandi qué j'tais dans chutte mangnifique hôpita, mais y'en avait tant qué j'n'en éthais janmais finni en temps pour lé r'tou en Améthique. J'mîns eune annonce dé r'mèrcîments dans la "Post" et j'espéthe qu'ou fait lieue par touos ieux. Et j'vouos r'mèrcie acouo eune fais, mes chièrs anmîns, pour vouot' générôsité, vouot' bouanté et vouot' întéthêt à m'n êgard, et j'vouos asseûthe qué j'en sis bein èrconnaîssant.

 

Tch'est tchi s'pâsse en Jèrri?

 Tch'est tchi s'pâsse en Jèrri?

 

Ottawa,

Ontario,

Canada

Le 21 d'avri, 1979

 

Moussieu l'Rédacteu,

 

La gâzette du preunmyi d'mar veint d'arriver. En r'gardant les décès, j'vai qué Moussieu l'Révérend John dodds, dé la Chapelle Wesleyenne, n'est pus. J'veurs exprînmer mes r'grets et condoléances à Mde. Dodds. Un charmant moussieu, l'Révérend Dodds. J'les rencontris, li et sa danme, siez l'Sieur Le Bro, ès Potithons à Ste. Mathie, et j'ai tréjous r'tîns un bouan souv'nîn d'lus expressions d'bouanne av'nue, prîncipalement comme j'tais un êtrangi. J'sis seux qué l'trépas d'Moussieu Dodds est eune séthieuse pèrte pour les congrégâtions Méthodistes Wesleyennes.

 

Eune întérêsante gâzette, la cheinne du preunmyi d'mar. À c'menchi, j'vai qué sus treize annonces dé naissances i' n'y'a pon un seul vièr nom Jèrriais, et i' n'y'a pon un nom Jèrriais dans les huits pèrsonnes des quat' engagements annoncés. Né v'là acouo eune aut' preuve qué les Jèrriais dispathaîssent à grands pas dans l'Île.

 

J'vai, étout, qué les grôsses têtes dé conmèrce sont d'avis qué ch'n'est pon logique d'êtablyi des pèrmîns d'travailli. J'avais pourtant pensé qué v'là tch'éthait empêchi las populâtion dé continnuer à augmenter, mais i' faut qué j'èrconnaîsse qué jé n'sis pon à même d'en jugi comme i' faut, n'étant pon sus les lieux.