Dinmanche le 25 de Fevri 2000

 Dinmanche le 25 de Fevri 2000

Aniet Dinmanche le 25 de Fevri l'année 2001, et chés Clifford Laisney tchi vos souhaite le bouonjour en vos presentant la Lettre Jerriaise.

 

Chaque matinée entre neuf et dgiex heuthes quand j'nai pas trop a m'otchupé l's'idées apart de liethe mon papi nationale, chés mon pliaisi d'ecouter a Radio Jerri. Ch'est interessant d'entendre les contributions que les auditeurs du radio presentes envers toutes sortes de topics tchi les interessees. Y'a des gens tchi grémule sus l'transport, la condition d'nos routes, la disette de maisons, sustout pour les jeunes gens, dreinment y'a ieu hardi d'correspondence envers la pouorre tchian tch'a 'tait bliéssé si cruellement par tchique malfaiteur tch'a besoin d'etre corrigi pour ses actions, mais le sujet tch'a produit l'ous d'intèthet dreinment est l'sujet du Rapport Clothier.

 

Ch'est un sujet d'importance tch'affectetha l'peuplye que s'sait jeunes ou anciens pour des années a l'av'nin, et ch'est hardi important tchi'l est bein etudier d'vant l'accepter. J'men vais pas entrer en distchuission a matin envers le pour et l'contre des changement tch'ont 'tait proposées pour le reformation des Etats, mais sans doubte i'a hardi a d'sither dans la fachon que bein des decisions et la manniethe sécretif que la louai est administrée.

 

La dernier Reformation des Etats eur lieu en 1948, quand 12 Senateurs, 12 Connétablyes et 28 Deputees futent elus. Ch'tait a chu point d'temps que les Juges, les Recteurs et l'Vicompte abondonnites lus pliaiche dans la Chambre d'Gouvernement. Ne v'la passant 50 ans de ch'la. Les conditions onts changi en 50 ans, et sans doubte il est temps pour un certain changement.

 

Dans ches temps la, le principa moyen d'ervenu monetaire etait d'l'Agricultuthe, suivi par le Tourisme chi c'mmenchait a faithe s'n'appathence dans l'ile. Aniet, tout ch'la a 'tait renverser, l'Agricultuthe est en detresse, le Tourisme a perdu s'n'appel, et pour le present la Finnance est l'seul moyen d'ertou tch'a appathence de supporter l'ile. Ches hardi important que la finnance continue a produithe par-ce-que si janmais j'viyons l'jour d'une décadence dans chu quartchi, j'me d'mande, auve tuous les projets a maint'nin que l's'Etats ont entreprins duthant chés dernier années, comment qu'janmais que j'arriv'thaimes a l's'entret'nin.

 

Le Rapport tchi fut c'mmander par les Etats i a tchique années passées, a 'tait prepather par dgiex personnes auve experience dans chutte ligne de gouvernement, auve contributions d'une section du peuplye. J'espethe qu'ou prennrez l'embarras d'etudier les recommendations proposées. J'sis seux qu'ou s'avez tous vos differentes opinions comme tchi l'implimenter. La s'm'naine passée j'fut a la SLa Salle Paroissialle en ordre d'entendre le discours presenté entre les r'presentants d'la Paraisse et les Paroissiains. Une sethée hardi interessante.

 

I'a un programme sus la television chaque arlevée a chinq heuthes et un quart sus BBC 2 tchi s'appelle 'The Weakest Link', hardi bein presenter par une dame tchi n'a pas d'peux d'offenser les membres du Panné. A la fin de chaque touonnée d'tchestchions, les huit contestants, iun par iun accordant a lus abilité ou inabilité sonts eliminées d'la lutte. Le gagnant est l'candidat tchi reste dans la lutte jusqu'a la fin. J'compathaits chu programme a la Chambre des Etats. J'avons des r'presentants tchi sonts bein capablye, mais étout y'en a tch'il est temps d'lus dithe 'A BETOT'. Che'st patheil comme des melles d'une chaine. Si i'a des faiblyes melles, la chaine ne tch'endra pas et cass'tha.

 

Le Rapport Clothier est p't'etre l'opportunité d'nos assuther que les melles de la nouvelle chaine sethoints capablyes de resister toutes les callenges tchi sont certaines de lus presenter dans l's'années a l'av'nin.

 

J'vos souhaite a tous une bouonne semaine, et a tuous les malades et gens en detresse, j'vos envie mes sentiments espethont que la route d'érgèthisson setha pavée d'bouonté et d'une érprinse d'encouogagement.

 

A LA PRECHAINE. 111

 

*Premièthement, une announce envers L'Assembliée d'Jerriais.

Le Diner Annuelle autha lieu Samedi le 24 de Mai, a l'Hotel Ambassadeur. Billets peuvent etre reservées en donnant un coup d'telephone a M et Mde Harold Perrée, numétho 861155.

 

Clifford Laisney