Lettre Jersiaise Dinmanche le 28 de Decembre 1997

 Lettre Jersiaise Dinmanche le 28 de Decembre 1997.

Aniet le 28 de Décembre 1997, le dernier Dinmanche de l'année, chais Cliford Laisney tch'a l'pliais de presenter la lettre Jerriaise.

J'espêthe qu'ou s'avez tous rejoui d'un bouon Noué et qu'ou n'avaits pas souffri trop a cause des fêtes, Noué est un temps d'grands prepathations, et pour des s'm'naines en avanche les boutiques nos announce l'av'nin en orde d'encouothagi les gens d'depenser comme si l'argent s'nallait hors de faichon. Malheuthesement, y'a des gens, principallement parmi la jeunesse tchi n'ont pas trop d'controle envers lus finances, et auve l'aide de lus cartes plastic, depense en d'ssus d'lus môyens et auprés toutes les fêtes passées, une p'tite env'lope du porteu d'lettres les informe de la position d'la balanche en main, une chose tchi n'ést pas trejous érchue auve pliaisi.

Les fêtes de Noué sonts une occasion pour fanmillyes, vaisins et anmins de sont'rencontrer en orde de lus entre souhaiter l'bonheu et bouonne santé a l'av'nin.

A m'seûthe que nou veillyis, y nos r'semblye qu'el temps s'passe pus vite que dans nôt jeunesse. Quand j'étions acqo mousses j'attendaimes auve emoué l'arrivée de Noué, et un coup passé, ch'tait une longue attente j'usqu'a les fêtes de Paques.

Quand j'erfliechons sus l'anée tchi vint d'se passé, j'avons tous de differentes pensées envers les evenments tchi nos ont concernées l'pus. Bein seux y'en a d'nous tch'ont souffert la perte de fanmillyes tchi nos étaits prés, et d'autres se sonts rejouies d'la nouvieauté d'éfants et d'p'tits éfants.

1997 ne s'est pas passer sans catastrophes. Differents regions du mode ont souffert a cause de trembliement d'terre. Y'a ieut plusiers volcans, (des montagnes brûlantes). J'entendons acquo des rapports des éffets d'gere en Yugo-Slavie, y'a ieut étout plusieurs avaries d'avions auve perte de vie en bein des cas. La Fanmillye Royale étout n'a pas ecapper d'peine. J'nos souv'nons tous bein d'la tristesse quand la Princesse Diana perdit sa vie en accident dans l's'alentours de Paris. La majorité d'gens tchi suivites l'enterrement sus la television se rappel'thons trejous du triste spectaclye de vaie une jeune vie emportée si soudainement souos d's'evenements si tragique.

1997 a veu étout un changement d'gouvernement en Anglieterre. Auprés 18 ans souos un gouvernement Conserveteau l's'electeurs ont dit Assez est Assez, faut élithe l'opposition.

Même dans nôt ile j'avons veu des changements. Dans l's'alentours des cauchies et d'l'Esplanade, J'avons veu l'installation de chutte fanmeuse hâlouoge de suage. J'avons veu l'ouvertuthe du café "La Fregate" et j'avons veu etout la manniethe que nos sou sont enforcées dans la cave souos la ville.

Une chose d'importance a 'tait l'ouvertuthe du Musée Maritime auve les magnifiques examplyes des Tapiss'sies tchi décrithe les chinq longues années souos l'otchupation de l'ennemin. Viagons en ville ou compagne j'en pouvons sêlon nos apperchever des changements causées par les nouvieux batisses tchi appathe.

Sus l'sujet d'sport, Jerri a pâyi hôte es iles du monde en t'nons les jeux d'iles dans l'nouvieau thîatre de sport a Springfield. Y faut saluet Eric Blakely tcha accomplyi succés dans s'n'ambition de vaincre la montagne Everest. Ch'nna na pas 'tait accomplyi sans peine, et j'le felicitons d'etre le premier Jerrais d'entreprendre une telle tâche enorme.

Dernierement, j'avons suivi la course entreprince par les trais Jerriais tch'ont nagi lus baté de Tenerife jusqu'a Barbados. Une distance de 3000 mille milles a traversa l'Atlantique est une experience que seulement le pus brave voudrai considether. Nos felicitations es trais de vous.

Sans doubte y'a bein d'autres evenements tchi lus sonts passées tchi methites mention, mais les chinq minutes accordées a matin nos permette pas d'exprimer l'sujet.

Bouonne Gens, acquo une fais j'tapons sus l'porta d'une nouvelle année. Dgieu seulement connaits l'av'nin. Ch'est a nous d'augmenter nôt fouai et d'li d'm'ndait tchi nos conduithera dans l'inconnu et tchi nos protegetha du malheu.

Veronica m'joins en vos souhaittons tous une bouonne année, bouonne santé, et bouon viage a tuous temps.

A LA PRECHAINE.

Clifford Laisney