1974: D'èrtou en Améthique

 D'èrtou en Améthique

 

 

 

Trenton, Michigan.

   U.S.A.

 

Le 26 d'octobre, 1974.

 

Moussieu l'Rédacteu,

 

M'èrvélà acouo eune fais dans l'Nouvieau Monde et parmi fréthes et soeu. Ch'est presqu'încriyabl'ye que mardi matîn j'tais à dêjeuner à man tout seu au Ménage ès Feuvres, à St. Ouën, et qué l'sé du mème jour j'tais à souper siez man fréthe Fraînque en Améthique! Pourtant, j'l'ai fait tant d'années d'affi qué j'dév'thais y'êt' accouôteunmé.

 

Comme il en est tréjous l'cas, j'tchittis Jèrri sans aver ieu l'temps, à la dreine minnute, d'aller dithe à la prechaine à un tas d'anmîns. Chutte fais ché n'tait pon entchiéthement d'ma faute. J'attrapis eune suée d'fraid au c'menchement d'ma dreine sémaine dans l'Île, et jé n'voulais pon aller la donner à mes anmîns. Et pis l'mauvais temps n'm'aidgit pon. Janmais j'n'avais veu du vent, d'la fraid et d'la plyie duther si longtemps, jour auprès jour, dans lé s'tembre, et i n'y faithait nu d'êt' par les c'mîns. Mais les manques dé visites né veulent pon dithe qué l's anmîns sont dans l'oublyi. Mes pensées s'envolent souvent en Jèrri et j'pense en ieux et à la beinv'nue tch'i m'accordent tréjous quand j'y arrive au r'nouvé, à lus hopitalité quand j'sis là et au souhait d'êrvénîn au pus vite tch'i' m'donnent quand j'les tchittent pour m'en r'vénîn ichîn. Lé bonheu d'aver d'bouans anmîns est un bonheu qué j'possède et qu'j'apprécyie. J'ai tréjous affirmé qué chu bonheu-là est un grand privilège dans la vie d'autcheune pèrsonne.

 

Lé viage par avion d'Jèrri à Londres et d'là en Améthique fut doux, calme et rapide, à trente mille pids en l'air. J'tais dans iun d'ches grands navithes dé l'air à “réaction” appelé un “jumbo jet” en Angliais, et comme il 'tait liain d'êt' pliein y'avait tout l'run voulu pour confort. J'avais mème deux sièges à man tout seu et j'pus dormillonner à man tchèr content en c'mîn. Lé temps 'tait bé quand j'arrivînmes à Londres, et auprès l'vent et la plyie qué jé v'nais d'tchitter en Jèrri, la chaleu du solé 'tait la beinv'nue. À m'suthe qué j'feûnmes en d'ssus des nuages, ch'tait sa lueu tchi dominnait souos l'ciel et les nuages formaient un bieau blianc tapis souos nous et jé n'pouvais sénon penser au dgiex-neuvième Psaume, tchi nouos dit : “Les Cieux racontent la gloire du Dieu fort : et l'étendue donne à connaître l'oeuvre de Ses mains!”

 

La grand' partie d'mes viages par avion m'avaient porté à Boston, demesne des fanmeux Cabots prov'nus d'Jèrri tch'étaient dév'nus si hautains, étant d'race Anglo-Nouormande, tch'i' n'pâlaient qu'au Bouan Dgieu, mais comme dans toutes choses dé nouos jours, mème l's avions changent dé course. L'année pâssée ch'tait à Philadelphie, en Pennsylvanie. Ch't' année ch'fut à Washington, la belle capitale des Êtats-Unis, qué j'arrêtînmes en c'mîn pour Detroit, dans l'Michigan. Ch'tait un mangnifique spectacl'ye dé vaie, des airs, la Capitol, comme il' appellent lus maîson d'parlément, la Maison Blianche, l'Obélisque d'Washington et l'Pavillon d'Abraham Lincoln, en pâssant en d'ssus et à côté d'la ville.

 

J'eûnmes a bein près eune heuthe d'attente à Washington dévant r'prendre lé vol pour Detroit à quatre heuthes et d'mie d'lus temps (ch'tait neuv heuthes et d'mie du sé en Jèrri), où'est qu'j'attérrinmes à un quart dé chînq auprès un vol de dgiex heuthes un quart - neuv heuthes un quart en l'air dépis l' “dêcollage” à Londres, et eune heuthe à Washington.

 

En arrivant à Detroit j'eus l'pliaîsi et l'bonheu d'vaie l'souôri sus la fache à man fréthe Fraînque tchi m'attendait là. Ch'est bein pus pliaîsant d'vaie tchitch'un à vouos attendre en arrivant d'tchiquebord qué d'y trouver fache dé bouais! Et j'avais ocouo la pliaîsante mémouaithe dé la veue dé mes bouans anmîns, l'Docteu Fraînque Le Maistre et d'sa danme et du Député Jean, tchi m'avaient fait l'honneu dé m'condithe à l'aéroport en Jèrri, et tchi mé l'vaient acouo la main au moment d'monter à bord dé l'avion là.

 

Arrivé siez Fraînque, jé n'mé sentais pon à l'êtrangi, car sa bouannefemme avait fait eune bouanne bollée d'soupe dé caboche pour célèbrer man r'tou en Améthique, et i n'y a rein tchi peut m'faithe pus d'pliaîsi comme fricot. Comme nouos l'dit l'Docteu L'Maistre dans san fanmeux dictionnaithe : “Du lard et d'la caboche, feunmants, dé d'dans la chaudgièthe; né v'la d'tchi bouan pour un homme tch'a faim!”

 

Eh bein, ouaithe qué j'n'ai 'té qué quat' jours en Améthique, j'ai bavardé tout pliein en Jèrriais auve Fraînque, et en Angliais auve li et mes fréthes Percy et Jim tchi sont dêjà v'nus m'vaie et tch'avaient envie d'ouï les dreines nouvelles dé Jèrri. I' m'ont bombardé d'tchestchions, man bouanhomme, car i' n'ont pon la chance dé y'aller touos l's ans comme mé, en Jèrri. Mais y'ayant 'té eune fais i' y'ont prînt goût, et l'pays et touos les bouans Jèrriais tch'il' ont rencontré là lus pâssent près du tchoeu à ch't heu, et j'sis prié d'vouos faithe bein lus complyiments à tous!

 

George d'La Forge.

 

Docteu Fraînque Le Maistre