1971: Discours par lé Sieur Jean Le Maistre

 L'Assembliée d'Jèrriais:

 

Discours par lé Sieur Jean Le Maistre

 

Passant chent membres lu rêunitent vendrédi, l'29 d'octobre, dans la Salle Pârouaîssiale dé St Jean.

 

Lé rapport des mais d'juillet et août et la visite des Dgèrnésiais au mais d'septembre fûtent lius et acceptés. Chînq nouvieaux membres fûtent êlus et la correspondance fut liue.

 

Les affaithes finies, lé Président, l'Sénateu P.J. Romeril, d'mandit au Sieur Jean Le Maistre d'donner san discours.

 

Lé Sieur Le Maistre r'mèrcyit, pour l'honneu qui li'avait té fait en lî d'mandant dé faithe chu discours sus sa visite en Israël, etc.

 

Comment qué l'Sieur Le Maistre fut chouaisi pour aller sus chu viage? I' fallait preunmiéthement pâsser un examen posé par l'Association dé Rotary.

 

L'année pâssée y'eut eune visite par un groupe dé jannes d'Israël en Angliéterre et ch'tait ichîn la visite dé r'tou. Lé groupe consistait dé chînq jannes et un pus ancien.  Iun 'tait un Professeur à l'Université à Portsmouth, un êtudiant d'la Louai, un înginieux, un bantchi, un înspecteux d'police et un janne fèrmi d'Jérri qu'était appelé dans chu pays-là un Kiboutznik. Un Kiboutz est une fèrme où'est qué pèrsonne né sont payis. Tous d'meuthent à la même pliaiche et i' n'y'a pas bésoin d'mannier d'sou.

 

La visite duthit 56 jours, et eune visite dé onze difféthentes pliaiches fut faite, et lé groupe viagit huit mille milles. La pus grand' partie du temps lé groupe restit auvec des Rotariens, mais à tchiques hôtels et collèges étout.

 

Lé béthe national

 

Chent souaixante-siex visites officielles fûtent faites à plusieurs pliaiches coumme par exempl'ye des manufactuthes, écoles, fèrmes, prisons, musées et monuments historiques. Lé parti arrivit en Tèrre Sainte à onze heuthes lé sé et auprès aver pässé la douanne i' fûtent èrchus dans eune salle et sèrvis auvec des frâses et l'béthe national, d'l'orange.

 

Auprès eune démi'heuthe en vouaituthe lé groupe arrivitent à Jérusalem iou qu'i' restitent à un p'tit collège sus l'haut du Mont Sion.

 

Israël est deux fais la grandeu dé Galles, population dé trais millions et d'mi. I' fait eune chaleu tèrribl'ye, auvec eune tempéthatuthe dé 100 dégrés.

 

Lé moderne et l'ancien travaillent bein ensemblye; les chameaux et l's ânes et les motos. Nénante du chent des gens sont des Juis, mais lé grand problème est la langue.

 

Les motos couôtent chi, £2,550, eune télévision £500, les maisons auvec deux chambres vîngt à trente mille louis. Lé mangi n'est pas si chi. L'hospitalité est mèrveilleuse et lé groupe fut èrchu coumme des rouais.

 

Un Arabe sus eune fèrme a sept femmes et l' les seurveil'ye dans les clios en travas. Nénante pèrsonnes sus chent feunment, mais I n'bèvent pas d'alcool.

 

Un jour à Jerusalem

 

Le Sieur Le Maistre donnit eune exempl'ye d'un jour à Jérusalem qui c'menchait à siex heuthes et d'mie lé matin jusqu'à minniet lé sé.

 

Dèjeuner à sept heuthes, auprès ch'la eune marche dé trais milles au Y.M.C.A. pour neuf heuthes. Eune visite d'eune înprînmthie dé quatre mille pèrsonnes, d'ichîn a un hôpita pour eune visite qui duthit eune heuthe et d'mie. Auprès, mangi. L'arlévée, visite d'une synnagogue et au “Garden Tomb”, eune station d'Police, pis auprès un r'pas et une séthée d'films et rencontrer d'autres êtudiants.

 

Auprès un mangnifique discours lé Sieur Le Maistre montrit des portraits prins duthant lé viage. D'Angliétere dans un avion dé 150 pèrsonnes, un viage dé quatre heuthes et d'mie. Tout 'tait hardi vert en Israël pour lé mais d'mars. Dans lé “Dome of the Rock” ch'tait tout tapis et i' fallait haler ses souliés. Lé haut du “Dome” est couvert d'or. Sus l'haut du Mont des Oliviers et à L'Eglyise dé Marie de Magdala. La Tombe a Hérode, où'est qu' y'a plusieurs appartéments. À Bethléhem, les liefs sont pliats. Les membres vitent lé d'dans dé l'Églyise dé la Nativité. La Mé Morte peut vos aveuglier pour deux ou trais jours si nou-s-a l'malheur d'en aver dans l's ièrs. I' faut mett' des souliés pour marchi d'dans. La Mé est 1,291 pids souos l'nivé. A Jérusalem y'avait eune marche auvec vîngt-deux mille pèrsonnes à prendre part. I' marchent vîngt milles par jour pour trais jours, eune procêssion dé deux heuthes et d'mie.

 

À Athènes où'est qu'y'eut les “Olympiques” en 1886, Lé Palais des Nations a Génève, et dé si bieaux parcs, et l'grand théàtre, et tchiques portraits d'Hollande et, à fini, la Baie d'St. Ouën au couochant du solé.

 

Les robes

 

Lé Sieur Le Maistre èrchut dé grands appliaudiss'ments bein méthités pour tout san travas á prépather chu discours et les bieaux portraits. Lé Président donnit ses félicitations d'la part dé L'Assembliée et les danmes du Conmité Exétchutif sèrvîtent eune tâssée d'thée et des galettes à tous; et les robes dé L'Assembliée fûtent montrées.

 

Lé Président fit les annonces suivantes: Lé 18 dé décembre un Sèrvice de Neu Léçons dé Noué dans la Chapelle Méthodiste de Ebenhézer et auprès dans la Salle Pârouaîssiale dé St. Jean.

 

Lé Président èrmèrcyit lé Conmité Exétchutif pour lé souper et lé Connétabl'ye pour la salle et tous pour ëtre v'nus.

 

1971