1974: L'forgeux s'enrichit pon!

 L'forgeux s'enrichit pon!

 

Fort Lauderdale, Florida, U.S.A.

Le 2 d'mar, 1974

 

Moussieu l'Rédacteu,

 

Ch'est presqu'încriyabl'ye combein qu'tout a renchiéthi auve lé pâssage du temps. Par exempl'ye, sav'ous combein qu'un forgeux chèrge pour fether un j'va ches jours? Jé n'lé sai pon mé-mème. I' dait êt' bein connu en Jèrri, où'est tch'i' n'y a pon mal de j'vaux par les c'mîns. Mais j'peux vouos dithe qué dans l'année 1889 quat' fièrs né couôtaient qu'un êtchu !

 

Încliu dans eune lettre èrchue d'l'Avocat J. J. L'Mèrquand 'tait un compte dé forge, êcrit par man P'pèe dans ch't' année-là, pour du travas d'forge fait pour lé Sieur Philippe George Powell, dé La Pointe, a St. Ouën, qué j'connaissais quand j'tais mousse. Il 'tait lé p'pèe a Philip Powell, décédé lé 11 septembre, 1972. L'Avocat L'Mèrquand, agissant pour l's héthitchièrs, trouvit l'compte parmi les papièrs dé la succession, et i' li donnîdrent gràcieusement pèrmission dé m'l'env'yer.

 

Eune compathaison entre les prix d'chu temps-la et les cheins d'à ch't heu est si întérêssante tch'i' vaut la peine dé les r'corder. Né v'chîn don l'détail du compte.

 

“Dt. Philippe G. Powell à George Le Feuvre. 1889

Juil. 4. 2 Coutures 6d -

Août 16. 2 fers, 2 coutures 1/9.

Sept. 24. 1 Couture 3d -

Oct. 7. 2 Fers. 2 Coutures 1/9 -

Oct. 31. Une charrette réparée 6d. -

Nov. 2. 2 Coutures 6d. -

Nov. 7. Une Pointe 1d. -

Nov. 16. 2 Fers 1/3. -

Nov. 25. Une fourche réparée, une bigorne reserrée 1/6. -

Nov. 26. 2 Fers 1/3 -

Dec. 1. Un manche de fourche, et la fourche réparée 1/3 -

Total: 10/7.”

 

Quand nou pense qu' eune “couture”, probabliément un rassembliément d'deux fethâles dé tchéthue ou eune partie d'tchiquechose rompue, né couôtait qu'siex sou, et qu' deux fièrs à j'va n'couôtaient qu' un ch'lîn trais pénîns - un êtchu pour les quatre - nous-s-a d'la peine à s'înmaginner comment qu'un forgeux pouvait faithe sa forge payi auve des prix d'mème, mais i' n'faut pon oublier qu' tout est rélatif et qué l'couôtement d'la vie a r'doublié bein des fais d'pis l'année 1889. Comme j'lai mentionné d'vant, man Papa avait tout pliein d'travas dans la forge et éthait 'té bein s'il avait r'chu touos les sou tchi il'étaient deues. Mais la grand' partie des gens n'payaient qu'eune fais par an, à la fîn d'la saîson d'patates, et quand la saîson 'tait mauvaise et tch'i' y'en avait tchi n'pouvaient pon payi, i' n'éthait janmais pensé d'lus env'yer bille ou d'lus faithe dé la peine. Né v'la l'prîncipe de nouos vièrs! I'n'y a pon d'doute qué la vie était duthe dans ches temps-là, mais les Jèrriais 'taient dueurs étout, et il' avaient du natuthé et vivaient pus heutheusement qu'au jour d'aniet.

 

J'sis r'connaissant à l'Avocat L'Mèrquand pour aver prins la peine dé m'êcrithe et d'm'env'yer chu compte là, viyant qué j'sai bein tch'il est pus embarrassé qué l'dgiâbl'ye sus eune chiviéthe, comme nouos dîsaient l's anciens quand j'tais mousse. Ch'nest pon seulement l'suffat d'eune grand' clientèle dans san travas juridique tchi li pèse sus l's êpaules, mais ch'est san travas comme champion des drouaits des gens du commun et d'la libèrté des Jèrriais en général dans sa fonction d'Senateu dans L's Êtats.

 

Un fanmeux Jèrriais, l'Sénateu, Y'en a sans doute tchi n'l'aiment pon, et y'en a tchi dithont tch'il a la tête cratchie, mais quand j'ouai d's expressions d'mème v'la tchi m'fait toute suite penser qué né v'la un homme d'esprit extraordinnaithe, car nou n'éthait janmais pensé d'dithe d'ité d'un homme ordinnaithe.

 

Y'a eune chose bein cèrtaine: “J.J.”, comme il est affectuesement connu par touos ses anmins en Jèrri, a du couothage et du sang-fraid à gogo. J'm'èrsouveins qué quand l'Socialisme c'menchit à faithe sén appathence dans l'Île et qu' l'affaithe d'asseûthance “Sécurité Sociale” vint d'vant L's Êtats y'a eune vîngtaine d'années ou pus, j'tais iun des spectateurs dans la gal'lie publyique et j'n'ai janmais ouï un homme êt' crititchi (j'allais quâsi dithe “blégèrdé!) comme i' l'fut auprès tch'il avait pâlé contre l'adoption.

 

Dans chu temps-là, comme à ch't heu, L's Êtats 'taient composés d'eune douzaine, pus ou mains, dé membres-orateurs et l'restant d'membres presque silencieux. Nou pâle dé couoyer - ches'là couoyissent tellement lus vouaix tch'i' n'font sèrvi qu'un mot par discours, lé mot “Pour” ou “Contre”. Eh bein, châque membre-orateur crititchit “J.J.” à san tou, et j'pensais qué v'la tchi s'en allait lî faithe ma et lé d's'encouothagi d'janmais opposer autcheune chose dans la Chambre à l'av'nîn, mais à ma grande surprînse, quand i' s'mâtit sus ses pids d'drièthe pour rêpondre a ses advèrsaithes, il 'tait si calme et seux d'lî-mème qué nou-s-éthait pensé à l'ouï tch'il avait 'té loûsé à la pliaiche du contraithe.

 

A m'n idée, s'n attitude et san comport à ch't' occâsion-là aîdgit hardi à assolider sa carriéthe politique tch'est si bein êtablyie à ch't heu.

 

George d'La Forge.