Lettre Jerriaise Dinmanche le 2 d'Aout 1998

 Lettre Jerriaise Dinmanche le 2 d'Aout 1998

 

 

Etes-ous tous bein réveillyis? Aniet Dinmanche le 2 d'Aout 1998, ch'est un pliasi pour mé Clifford Laisney d'vos presenter la Lettre Jerriaise.

 

Premiéthement, felicitations es paraisses et individuels tch'ont prins part dans les competitions d'été envers les decorations d'flieurs de paraisses et d'gardins.

 

Ch'ést vraiment pliaisant de traverser la compagne et ville en admithant l's'éfforts des gens tchi passe tant d'temps et d'intethét a améliorer l's'entouothages du vaisiné et d'lus gardins. Tous n'peuvent pas accliamer l'preumyier prix, mais sans les competiteurs i'n y'aurait pas d'competition.

 

Ch'ést étout la saison d'l'année quand les gens mettes lus gardins a la disposition des touristes et habitants, et souvent ch'est une mannièthe d'augmenter les fonds de differentes charitées.

 

J'prins l'opportunité d'visiter iun d'ches gardins i'a tchinze jours passé.

 

Au bût d'la Vallée d'Bellozane dans La Rue de Moulin de Fliquet, a St. Hélie i s'trouve une maisonette tchi s'appelle 'Kaduna'. Mad'mouaiselle Sheila Baudains acati la propriété en 1985. Le terrain vis-a-vis 'tait a l'abandon et servait comme haûgard de matchiethe de batisseux. Travaux sus l'parterre d'herbe et l's'alentours c'mmenchites en 1995, et dgiex-huit mais pus tard, le cotil au drièthe d'la maison fut d'serter.

 

Un cotil peniblye, et couvrant envers trente perques, i' 'tait rempli d'ronches, feudgliethe et d'autes sercl'yes, mais auve l'aiddge de son pethe Harold, i travaillites a tigre corps pour accomplyi la tache tch'il avaits entreprins.

 

Au d'sus d'trente viages de terre servites pour remplyi la basse d'herbage. La Maison d'Eté, la Serre et d'autres morcieaux futes ajouotées comme circumstances et finances pérmétées.

 

Parmi l'haûgard de matchiethe éyou q'l'herbage pousse, etait du bieau rouge granit tcha 'tait sauvé pour bâti les p'tites murailles du cotil. Ch'nna que j'viyons achteu est l'résultat d'un an d'travail, de Sheila et d'son pethe. Le cotil si pendant a 'tait transformer d'un fourré a un grand gardin attractif, quoiqu' qu'il est pus d'apliomb qu'horizontal.

 

Bein des pliantes et arbustes craissant si cououagement 'taits du réj'té d'pépiniethe, mais auve un certain soin d'tendresse ches Ermerquabl'ye ch'nna nou peut accomplyi. Etant situé dans une vallée et une pliaiche de trant'chil'té et hors du traffique; chutte contrée attithe toutes sortes d's'ouaiseaux, étchûteus, et même des cahouains sauvage, et au toup haut du cotil i'a une reserve pour la préservation de chés espéces de natûthe.

 

Credit a Harold et Sheila pour lus efforts et imagination dans la construction d'lus gardin. J'vos érquemande la prechaine qu'ou prennez une prom'nade dans l'moto de visiter chu p'tit coin d'Bellozane. J'sis seux qu'on sethez pas déchus.

 

Chés ichin l'temps d'l'année quand touos locataires ércheve une demande du Connétablye d'lus paraisse pour le rât tcha 'tait imposer sus lus propriétées. Dans l'temps passé en orde d'être principa d'paraisse, fallait payi au mins 50 quartiers de rât par année et ch'nna donnait drouait d'vouaix au principa quand v'nait l'temps d's'éléctions. Tout ch'nna a changi, et aujourd'aniet j'pallons en milles de quartiers, et on orde d'aver le drouait d'voter, chés nécéssaithes de remplyi une forme electoral. Le Connétablye de chaque paraisse est responsabl'ye pour prépathé une accoumte des balanches nécéssaithes pour garanti le bein d'la paraisse.

 

Tant pus qu'la paraisse a besoin d'sou, tant pus qu'el paroiassien paye d'rât, et chaque année le montant payablye augmente accordant es d'mandes.

 

Ch't'année a St. Sauveur comme la majorité d'paraisses, ch'est l'exceptionnel, car quoiqu' les quartiers ont augmenter, le prix du quart'tchi a diminuer, et d'même j'avons êrchu une demande tch'est mins qu'l'année passée, une chose hardi rare dans chés temps d'depen'sie a mau-gré.

 

Etout a St. Sauveur, accompagni par la d'm'ande du rât, j'avons êrchu une lettre du Connétablye t'ch'expliqu'ye les evenements, les roles des Officiers de la Police Honorifique, les gens d'contacte en cas d'besoin, et toutes sortes d'announces d'intethet concernant l's'affaithes de Paraisse, et i faut que'je félicite le nouvieau Connetablye Ph'lip Ozouf, tchi na 'tait d'quatre semaines en office d'pis s'n'élection pour aver composer et cirtchuler chés nouvelles si intéréssantes. Chés vraiment une chose bein importante au'jourd'aniet en orde de fortifier un bouon rapport entre habitants.

 

P't'etre un examplye a d'autres paraisses a fin d'améliorer un esprit communicatif. Assez pour aniet…

J'Vos souhaite a tous bouon viage dûthant la s'm'naine tchi suit.

A LA PRECHAINE.

 

Clifford Laisney