Lettre Jerriaise Dinmanche le 5 d'Aout 2001

 Lettre Jerriaise Dinmanche le 5 d'Aout 2001

 

J'vos offre les apologies a matin de ma bouonne_femme Veronica tchi d'vait vos addréchi. Ou n'est pas dans ses cannettes, et d'même chés me Clifford Laisney tchi vos souhaite le bouon_jour en vos presentons d'més pensées et opinions en géneral.

 

Premièthement, j'ai une announce pour tuous les Membres de L'Assembliée d'Jerriais tchi d'eve faithe la traversée a St. Malo Samedi tchi vint le 11 d'Aout. Vos pliait_ti assemblé a la cauchie de départ a huit heuthes et un quart le matin, et n'oubliez pas vôt passe-port.

 

Ne v'la presque deux tchièrs de l'année passée, ch'est la saison d'vacances. Les mousses sonts tchittés d'l'école pour lus vacances d'été, hardi d'gens sont en prepathation d'arrangi lus tchinze jours dans un climat pus exotique, et même nos Membres d'Etats sont en recess en orde de r'chergi lus pensées en prepathation pour l'année tchi vint.

 

Sus l'sujet d'vacances, j'sis seux qu'ou s'etes d'accord que j'n'avons pas le nombre de touristes dans l'ile que j'avions dans l's'années 1970-1990. J'viyons pas l'traffique sus les routes causer par les vetûthes de touristes. Oui, le Tourisme a souffert une décadence enorme, causer principallement par le couôtage du viage d'entrée dans l'ile, et le couôtage de toup essentiel un coup arrivé. La traversée par air es iles de la Mediteranée est d'avantage a la pochette, et l'temps est pus ou mains garanti. Même la traversée a l'Amerique et l'Canada est gentiment competitif. Dans mon jeune temps une visite a Sercq ou d'Gèrnesy etait toup a fait une experience, mais aniet les gens onts d'differents intentions. Viagi l'globe est dev'nu une aventûthe accepté comme un privilege d'explôrer, nécessaithe pour gens d'toutes classes.

 

Ch'est p'tre une bouonne chose que les gens n'visite pas l'ile comme dans l'temps passé. A la manniethe et vitesse que l's'hotels et pliaiches de louogement freunmes, en orde de converti lus premises en apartments, i'n setha pas longtemps d'vant qu'el Tourisme ne pourra pus acc'moder les visiteurs a l'ile. Déja j'viyons que l'ile n'est pus attractif es jeunes, la grand majorité d'touristes sonts d'une certaine age.

 

Tandis que j'sis dans une humeur grémulante, j'en peut selon commenter sus la condition des routes. Janmais j'me r'appelle d'avait veu la condition d'routes que j'avons aujourd'aniet. Y'a tchique années ch'tait un pliaisi que nou prennait l'môto le dinmanche arlevée pour faithe une tour'née d'l'ile. Achteu quand nou traverse sus les routes nous est confronter a toutes les carres auve des veûes inditchons que la route est en r'pathe, la compagnie a ieau ou l'éléctricité sont a pliaichi des tuilleaus ou cablyes. Oui, nou s'est boul'vérsé d'un coté et d'l'autre, ch'n'est certainement pas un pliaisi d'viaigi au moins nécessaithe. Quand a condithe dans la ville, chaque fais que'ji vais, les directions d'viagi change, et quand es dreins changements dans la contrée d'la Parade, j'crai qu'les autorités onts réuissi la premier ronde de freunmer la ville au motoriste.

 

Avous prins d'avis le nombre de boutiques et d'commerces tch'onts freunmer dreinment. Tout ch'lla est l'resûltat des couotages des louages, rétranchement d'traffique et manque de transport publique. Oui, Jerri est dev'nu une pliaiche de progrés en r'tchulons. Y'en v'la assez d'ma pliand'rie et gronn'thie pour a matin.

 

Achteu tchiquechose pus aimablye pour vos mettre en bounne humeur pour fachi la s'm'naine. Hier, etant le 4 d'Aout comme ou s'avaits tous bein, etait la célebration du jour de naissance de la Reine Methe. Une danme réspectée par son peuplye. Je li souhaittons jouaie et bouonne santé dans l'temps a l'av'nin. Mais ch'tait pas seulement la reine tchi 'tait en fête hier. Une danme tch'a contribuer ses efforts sans cesse a l'Assembliée d'Jerriais et d'autres Societés 'tait etout a celebrer un jour de naissance d'importance.

 

A matin, j'envions nos félicitations et meilleurs souhaits a Joyce Gilbert. Puis_que tu continue a t'réjouithe de bouonne santé et d'jouaie entouonée par ta fanmillye, pour bein d's années a v´nin.

 

I'm reste que d'vos souhaiter a tous une bouonne semaine remplyie d'pliaisi et d'bouonne santé. I faut éspether que comme d'habitude le solé erlitha aprement Jeudi pour la Bataille de Flieurs, et sustout sus tous tch'onts donner d'lus temps en effort du succéss du jour.

 

A LA PRECHAINE

Clifford Laisney