2011: Lettre Jèrriaise

 Lettre Jerriaise Samedi l'18 de Juin 2011.

 

Bouon Jour a tous tch'écoute la lettre jerriaise. Chés Clifford Laisney tch'a l'pliaisi d'vos la présenté aniet l'18 de Juin 2011.

 

Comme tuous bouons compagnards de ma géneration, chés ma couteûnme chaque jour de lièthe les nouvelles dans la gazette du Sé. Ichin a St. Saveu je sommes chancheux d'érchever la gazette chaque jour envers une heuthe et d'mie de l'arlevée, et d'même aussitot fini d'mangi j'touonne m'n'attention a la gazette.

 

Tchique fais j'en menage pas d'couvri toutes les nouvelles a cause d'assoupi dans un p'tit somme, une chose acceptablye a m'n'age. Comme la majorité d'mes auditeurs, j'ergarde premièthement les nouvelles en tête sus la premié page, et pis j'touonne a la dreine page pout m'informer des affiches de fanmillyes announcant les 'coués', 'noués' et 'passés'. Quand nou s'arrive d'une certaine age, la colûmne de decés fait rammemouaither d's'anmins d'école, anmins du temps passé et des gens auve tchi qu'nou s'avait perdu contacte. J'compte que la gazette nos donne un bouon divertissement de nouvelles. Les editeurs sont bein savant auve les mots en tête en orde d'attither le lecteu. J'sis trejous interessi d'lièthe tch'aisque que nos politiciens ont 'tait a distchuter dans la grande maison. Souvent ils ont appathence de passé lus temps en repetition du même sujet l'un auprés l'autre finnissant simplyiement en bavardage du sujet. Maie en autre temps ils ont 'tait connues d'distchuter auve raison. Une chose certaine. I sonts bein offets a depenser nos sou. J'sis trejous interessi d'd'prendre nôte d'la manniethe de lus vôte.

 

Des pages que j'trouve hardi interessante sont les lettres ecrites a l'editeur. Ch'est amusant tchique fais d'lièthe les differentes opinions d'corréspondence couvrant l'même sujet. Etout dans la gazette publiée chaque lundi nou lié les pensées de Helier Clement couvrant les evenements d'la s'm'm'naine. Tchiquefais faut prendre une p'tite verrée d'calvados en orde de comprenre son raisonage. Et pis i'a les p'tites histouaithes du Château Rhodes, une colûmne que j'trouve hardi amusante. La correspondence de suous l'horlouge presente de l'appréciation ou avis suivant le point d'veûe de l'editeur.

 

Mais une colûmne que j'manque janmais sonts les evenements des dernier chent ans. Nou lié d's'accountes d'accidents de ch'vaux et les premier vetûthes sus les routes. I me r'semblye que la manniethe que les gens lus erdgethissaits veuthe dithe tch'ils 'taits bein pus robuste qu'aujourd'aniet.

 

I' a tant d'proprietées a vendre que ch'la otchupe au mins quatre pages de la gazette. I'a d'la proprieté pout tuous les gouts que s'sait l'travailleux ou l'millionaire. Le chouaix est enorme. Et pis i'a une abondance de vetûthes a vendre, neu ou s'conde main dependons la bourse. I'a trejous un bouon couvrage du sport que s'sait la football, sport sus ieau, boules, ch'vaux d'course et bein d'autres. Les affiches publiques concernant l's'affaithes de paraisses et tchultes sonts bein eprimées, comme sonts tuous l's'avertissements de pêque-mele, divertissements etc.

 

Etout i'a la Gazette de S'maine publiée tuous les huit jours announcant les nouvelles et evenements de la dreine semaine. Hardi d'gens d'autes pays, des gens tch'avaits lus rachinnes en Jerri et onts decider d'cherchi lus fortunes ailleurs paie un abonnement a la gazette en orde d'erchever les nouvelles de l'ile. Ches bein que pour la moyenne somme de 45 sou par jour j'pouvons nos garder au cououathant de toutes les nouvelles locales et internationalle.

 

Tuous les methôdes de correspondence moderne tch'ils appelle auve lus nouvieaux môts comme l'internet', 'twitter', 'skite', me disent absolument rein. Quand a mé, j'm'envais continnuer a lièthe ma gazette.

 

Achteu en finnissant, j'veurt souhaitter a tuos pèthes, et grand-pèthes un buoun jour demain etant la fête des pèthes. Ch'est not tou a etre gaté. Tchi sait! P'tête nôt tôu a rejoui d'un bouon dejeuner fricachi au liet.

 

A LA PRECHAINE ET MERCIE POUR M'AVAIT ECOUTE.

 

Clifford Laisney