1964: Rêunion mensuelle

 L'ASSEMBLIÉE D'JÈRRIAIS

 

Rêunion mensuelle

 

 

Au mains 120 membres lus rêunitent pour la rêunion mensuelle, vendrédi passé, dans la Salle Publique dé St. Martin.

 

L's affaithes fudrent courtes; lé rapport du jeu d'cartes à St. Pierre fut liu et accepté, la correspondance fut liue et quatre nouvieaux membres futent êlus.

 

“AUTCHUNNES TCHESTCHIONS”

 

Lé divèrtiss'ment pour la séthée fut arrangi par lé Conmité Dramatique, qu'avait d'mander ès membres d'y apporter des Tchestchions. Il' en avez apporter d'raides bouannes étout! I'y en avait sus bein des sujets, par examplye, la preunmiéthe - Ch'est qu'i' vallait mus aver - la santé l'amour, ou des sou? Les jannes d'à ch't heu' sont t'i' pus êchervélés qu'aut'fais? Les membres d's Etats dévthez t'i' être payés? Lé 9 dé Mai dévthait t'i' être garder comme un jour dé fête? Pourtchi qu'des merveilles soullaient être faites reinque à Paques? Tchi personne qué les membres dé la dgainge aim'thaient à entrét'nin siez ieux pour un jour? L'Assembliée avait t'alle fait un succès d'preserver la vielle langue? - et bein d'autres, p'têtre pus risiblye mais enfin, sus des sujets bein variés.

 

Les membres dé la dgaingue, Mesdanmes P. Green et M. de la Haye, l'Connêtablye Le Marquand, et l'Senateu P. Romeril avaient dé bouannes rêponses à donner, pas tréjous d'accord, mais quand même, lé Sieur G. Perchard qui 'tait en chèrge n'eut pas d'embarras à garder tout trantchille.

 

Dé vièrs neuf heuthes et d'mie, les danmes du Conmité Dramatique, et plusieurs autres à lus aidgi, lus mintent tout-d'suite à passer du thée et des galettes à tous.

 

ERMERCIÊMENTS

 

Lé Sieur Perchard ermercyit les membres dé la dgaingue pour aver prînt part, et rêponnu les tchestchions si bein, et les membres qu'en avaient apporter tant.

 

Mme. Priaulx, d'la part des membres, ermercyit l'Sieur Perchard et la dgaingue, et l'Conmité Dramatique pour nos aver donner eune si bouanne séthée.

 

Lé Député Quérée ermercyit l'Connêtablye Billot, qui 'tait là auve sa danme, pour nos aver prêter la Salle, et Moussieu Billot en rêponnant, dit qu'L'Assembliée s'sait tréjous la beinv'nue à St. Martin.

 

1964