2007: Lettre Jèrriaise

Lettre Jerriaise Samedi l'11 d'Aout 2007

Bouon Jour a tous tch' écoute la lettre Jerriaise aniet Samedi l'11 d'Août 2007. Chés auve pliasi, comme normale pour mé Clifford Laisney d'vos la présenté.

 

Finnalement, suivant la mouillyie'tûthe j'avons endûther les dreins mais, i'a appathence que ch'est possiblye que j'allons rejouithe d'un p'tit Eté d'st Martin. Quouaiqu' j'nos plain'nions, j'n'avons pas souffert les d's'astres que nos anmins dans l'centre d'l'Anglieterre onts souffert cause des rivièthes tch'onts débordé lus banques. Ch'est impossiblye de s'imaginer les consequences d'aver sa maison innondée d'ieau, ieau d'égoût et toute la minsèthe de vaie ses possessions a fiot. I'n i'a pas d'doubte que chais pliasant de d'meûther prés des rivièthes, mais tout ch'la vint a un prix.

 

I'a tchique semaines, sus iun des rare bieaux jours de juillet, j'décidimes d'organisé une sortie des habitants de nôt résidence. Et d'même une douzaine de nous embartchimes en môto et fites not route pour Gourray ouaiqu' q'rejouimes d'un superbe r'pas es Pot'ties. J'decidimes que j'fethaimes nôt prechaine réunion au Café a Portinfer arrivant d'vers quatre heûthes. Chaque côcheux 'tait a libérté d'choûaisi sa route. J't'aimes chinq de nous dans mon môto, et parmi nous i'avait une danme de la belle age de nenante septtch'in sort pas trop souvent, mais tchi s'porte et raissonne comme une personne la maintchi de s'n'age. Nôt route nos an'mni l'travers des ruettes passant l'mangni des Prés jusqu'a leglyise de Grouville. Suivant la grande route j'nos trouvimes a Bâgot, passant l'Havre des Pas, et en route pour l'empliachement d'La Collette. J'arraitimes en fâche du Chaté Elizabé, une p'tite entendue d'ieau sepathait, cause du terrain d'ércliamme. J'me d'mande combein d'temps d'vant tchique 'expert' d'hors pays autha l'audace de suggether un pont pour joindre au Chaté.

 

J'continnuimes nôt route et en passant la cauchie Victoria, j'dits a mes passagiers qu'un 'expert' d'import aver suggether d'remplyi la cauchie d'matchiethe, et un jour che sethait un bouon empliachement pour bâti pus d'maisons. I'N 'taits pas trop amusées d'penser qu'acout pus d'maisons voulait dithe pus habitants, pus d'traffique. En route achteu pour le Terminal Elizabé. Not ancienne passagiethe n'avait pas fait chutte toun'née pour pusieurs années et ou'nne pouvait pas ervenin d'vais toutes les maisons et batiments d'differentes couleurs. Vos ont r'app'lous quand nou pouvait aller sus l'bût d'la Cauchie Albert vaie les batieaux sorti et entrer en port, quand nou pouver l'ver l'bras disent A Bétot, et faisant la Bein v'nue es passagiers abord. Tout ch'la est dans l'passé, ch'n'est q'des memouaithes que j'avons d'chés temps quand Jerri etait Jerri. J'pouvaimes pas mant'chi d'visiter chutte fameuse Hôtel de Radissons, Ch't 'Hôtel, le Cinema les Cafés, les Clobes de Niet, tout ch'la 'tait trop pour not ancienne danme, ou'lle avait presque les lermes dans l's'iers quand ou s'rapp'lait des temps d'sa jeunesse quand la belle Facade de l'Esplanade seur'vait la Baie auve une veue intacte du bieau Chaté Elizabé.

 

Ayant veu assez du moderne, j'pensi qu'une prom'nade dans l'naturel rêcompens'sait pour les bétisses de nos experts, et d'même j'continnuimes nôt course le long d'la Vallée des Waterworks. J't'aimes sus une differente Planette. L'Etang d'ieau présenté un air de trantchil'té, d'rpos, d'relaxation. Puis que chutte vallée peut ertenin s'n'air de bieaute naturelle, et qu'ou peut evader les aspirations d's'entrepreneurs. Arrivont au nord d'la vallée, la belle maison et batissements d'Hamptonne dominer auve sa presence entou'thée d'la verdûthe des prés d'la vallée. Suivant les ruettes dans la region d'La Ville au Veslet, j'nos trouvimes en fâche de la proprieté 'THE ELMS', une ancienne ferme admins'trée par le Fond Nationale de Jerri. En route achteu pour Portinfer ayant d's'cendu l'mont d'La Greve de L'ecq, en route pour not destination passant les deux anciens Mangniers de Vinchelez.

 

Ayant rejoui d'raffraichements au Café, i 'tait temps d'ertoun'ne a nôt demeuthe. Not p'tite toun'née nos avait donner grand pliaisi. Es ti vraiement nécessaithe de viagi hors pays quand i'a acquo tchique pouchettes de l'ile tchi reste intacte.

 

Ayiz tous une bounne semaine.

 

A LA PRECHAINE.

 

Clifford Laisney