1963: Merrienne et yun d'ses anchêtres

 Merrienne et yun d'ses anchêtres

Ph'lip et les grandes chaleurs

 

à Portinfe,

Saint Ou.

 

Jeudi au sé.

 

Moussieu l'Editeu,

 

J'crais hardi que ma lettre chutte sémaine s'en va vos desappointer, car i' n'sarrive, rein à Saint Ou chais jours, et le vrai est que tout est bein trop trantchille. Nou-s-avait ouï qu'un bouon citoyen et Principâ d'Pâraisse avait tchitté sa femme et sa fanmille et s'était êvade avec une drinette de djais-sept ans, mais i' pathait à ch'teu' que ch'n'est pas vrai. Ch'est dommage, sûs un sens, mais p't'être aussi bein sûs un autre.

 

La Merrienne, ayant entendu que j'allons aver ocquo un grand nombre dé visiteurs, a print des précautions pour s'asseuther que nos deux au mains, à Portinfé, éthont assez à mangi quand ou n'pouôrra pas aller en Ville, ch'est-à-dithe jusqu'à mié-septembre. Oulle a ordonné tout-plien de mangeaille, mais pour le béthe i' pathait que j'éthons à nos contenter avec d'la limonade, car si ch'est vrai chein qu'nou ly' dit, que l'êté tchi veint s'sa un êté de grandes chaleurs, ou n'crait pas que l'rhum, fraid ou caud, nos f'thait grand bein. Ou se r'souveint de chein qu'nou disait de yun d'ses anchêtres, tch'avait avalé tant d'rhum qu'un bouon jour, en satchant une allumette, i' print à feu, et tout ch'qui restit ch'tait yunne ou deux onches de chendres. Les docteurs de chais temps-là ditent tch'il avait crevé d'une combustion spontanée, mais j'ai d'la peine à craithe chonna. Si ch'tait la vraie raison, j'n'éthais pas à tchitté la pâraisse de Saint Ou pour trouver deus-trais vièrs riboteurs tch'éthaient deu être réduits en chendres y'a longtemps.

 

Quand ès grandes chaleurs, Moussieu, j'avons veu chonna d'vant. J'me r'souveins d'une année quand la Merrienne fut réduite à un seul cotillyon, tandis qu'mé, j'tais à la qu'minse l'long des jours, et pûs d'une fais couochais dans notre chambre sûs l'plianchais pour aver un mio d'air. Nou-s-avait à tchithier l'ieau dans les clios pour les pouôrres bêtes tchi crevaient d'sé, et même les p'tits ouaisieaux, comme les rouoges-gorges et les linnots, v'naient dans notre bel pour bèthe l'ieau d'la pompe. Mais, Moussieu, j'en pâssimes à travers quand-même, et j'sommes ocquo là.

 

I' faut admettre que, n'ayant pas yeu d'exercice pour si longtemps, nos vièrs membres sont un mio engourodis. Je d'sends sans grande diffitchulté pour dêjeuner, mais ch'est difféthent quand il est tchestchion de ramonter les d'grès pour me couochi, mais la Merrienne me pousse de par en drièthe, et jusque-ichin j'n'avons pas yeu à crier pour assistance. J'ai dans l'idée que quand veindra l'mais d'avri je r'prendrais des forches assez pour me trouver ouèsque lé pouôre vièr Ph'lip pouôrra bèthe un vêrre ou deux de biéthe avec ses parchonnièrs, et, quand chu jour-là veindra, j'espèthe d'être r'venu en temps pour man fricot d'nouvelles patates avec yunne ou deux tranches de gras lard. Y'a dêjà tchique temps que j'y pense à chu fricot là, et j'peux vos promettre que si y'a ocquo d'chutte saleté-là tchi s'nomme la limonade, oulle îtha bein vite déhors pour arrôser les flieurs à la bouonnefemme.

 

J'ai liut dans la gâzette que des joyaux à la valeur de djais mille louis ont 'té volés d'la maison tchi s'appêle Les Grandes Rues, à Saint Martin, sûs la route de Faldouet. J'en ai des mémouaithes, mé, de chutte maison là, car y'a bein d's années oulle avait une licence. Nou pouvait aller à la “Royal”, épis quand par la louai i' fallait sorti nou d'vallait jusque ès Grandes Rues, ouèsque nou pouvait rester aussi longtemps comme nou voulait si nou-s-avait les sous pour payi ses rondes. Ou voudrez sans doute saver pourtchi qu'la police n'arrêtait pas chu commerce-là, mais le fait est que, par bordée, un bouon nombre d'la police 'taient parmi les clients. Avec chonna, je n'crais pas que chonna payait, car un bouon jour la licence fut abandonnée.

 

Comme nou s'y attendait, lé John Dorey Germain a 'té élu Chantgni à Saint Martin, sans oppôsition, pour rempliéchi lé Tom Billot. I' n'y avait autchune crainte tch'i' s'trouv'thait oppôsé, car, comme dit san propôsant, il est membre de yunne des miyeu familles d'la pâraisse. Il a 'té dans la police pour des années, et est actuellement Surintendant de l'êcole du Dimanche à la chapelle. Il a donné ses preuves dans l'pâssé, et i' n'y a autchune doute que Saint Martin a trouvé un bouon Chantgni. En l'félicitant, la Merrienne espèthe tch'i' n'a pas oublié tch'il est ocquo yun d'ses couôsins, du bord d'sa mèthe.

 

Nou-s-est bein content d'entendre que Moussieu l'Baillyi va sûs l'mûs, car tant pûs vite tch'i' se r'thouv'tha dans l's Etats et la Cour Royale tant pûs que toute l'Ile s'sa contente. Je n'pouvons pas nos pâsser d'li, Moussieu.

 

Quand j'entendis sûs l'radio qu'en Ecôsse un boeu avait 'té vendu pour pâssant souesante mille louis, j'me dis que ch'tait sans autchune doute une erreur tchi s'sait corrigie l'préchain matin, mais, à ma grande surprinse, ch'tait vrai et chein que j'trouvis ocquo pûs drôle ch'tait d'entendre, le jour d'après, que l'fréthe de chu boeu avait fait septante-chînq louis, et pas un sou d'pûs. Vethitablyement, Moussieu, y'a ocquo des gens dans la commerce des bêtes qu'ont perdu la tête! Je n'sais tchèsque les Le Ruez, le Oswald Brée, le “Jack” A'court, le “Bill” Perchard, le “Jack” Rondé et l's autres en pensant de chais transactions là!

 

R'venant à chein tchi s'pâsse ichin, nou vait que l'Sénateur Krichefski a obtenu un vote de trais chent mille louis pour l'aéroport. Les Etats n'ont pas d'sous et y'a hardi d'gens tchi craient qu'assez a 'té dêjà dêpensé sûs l'aéroport, mais l'Sénateur n'est pas l'homme pour abandonner un projet tch'il a dans la tête.

 

À bétôt, Moussieu, et tout ch'que y'a d'miyeu.

 

Ph'lip.

1963