1964: La Gâzette Hebdomadaithe

 La Gâzette Hebdomadaithe

Eune Appréciation

 

 

En Améthique.

 

Lé 24 d'Avri, 1964.

 

Moussieu l'Rédacteu,

 

Pèrsonne vouos ont-i' janmais complyimenté au sujet d'l'excellence dé la “Jersey Weekly Post”? Nannîn? Du mains, pon en Jèrrais? Eh bein: Tant pus qu'j'y pense, tant pus j'pense qué ch'est man d'vai dé l'faithe! Oulle est supèrbe! Pour un Jèrriais à l'êtrangi i' n'y a rein d'pus pliaisant qué d'èrchéver chutte gâzette-là s'maine auprès s'maine, et dé pouver s'garder au râs dé chein tchi s'passe en Jèrri.

 

À c'menchi, faut dithe qué la rédaction, est parfaite. L's articl'yes d'fonds sont bein à propos et donnent dé fanmeux avis ès lecteurs. Ch'est vrai qu'un tas d'run est accordé à eune grand' quantité d'voleurs et d'malfaiteurs présentés d'vant la P'tite Cour, mais ch'est la mode dé nouos jours d'en aver parmi les braves gens. Les courtes heuthes dé travas, les hauts gages, et la “Sécurité Sociale” à prendre souain d'la vieillèche, ont fait naître eune pièrcheuseté tchi n'tait pon connue quand j'tais mousse et qu'nou 'tait accouôteunmés à vaie péthes et grand-péthes marchi chînq ou siex milles à lus travas, siez jours la s'maine, pour gangni dgiex-huit ch'lîns ou un louis au grand pus. À ch't heu, ch'est la mode d'êt' portés en moto partout, même en travas. J'pense bein qu'nou dév'thait en êt' contents. Ch'est rein qu'des vièrs comme mé, tch'ont connu eune aut' vie, tchi craient qu'nou 'tait pus heutheurs et trantchils lé temps passé quand nou n'avait pon l'temps d'faithe aut' chose qué d'travailli, mangi et dormi!

 

Mais r'vénons au sujet d'la gâzette. Quandis qué j'tais hors en Australie, man fréthe Fraînque ichîn en Améthique l's avait mînses dé côté pour mé, viyant tch'i' savait bein qué jé n'les vèrraient pon en viage. Ch'est-en-tchi, j'veins d'les liéthe ieune aprés l'aut' dépis l'mais d'Novembre dé l'année passée jusqu'à ch't heu. Janmais nou n'créthait tchi difféthence tchi y'a entre la lectuthe d'eune gâzette au taux d'ieune par sémaine, ou ieune auprés l'aut' sans arrêter. Dé même, ch'est comme si nou liêsait un livre tchi raconte l'histouaithe d'eune êpoque.

 

Duthant les chînq mais d'pis Novembre, un tas d'choses importantes pour les Jèrrais sont v'nues sus l'tapis. V'là tchi fait pliaisi d'liéthe qué quâsi touos l's êvénements ont, d'en par ichîn, ieu un rêsultat favorabl'ye pour l'Île. Les candidats r'quémandés dans l'articl'ye d'fonds d'la gâzette du neuf dé Dézembre fûdrent êlus, et cèrtains des nouvieaux v'nus ont dêjà montré lus valeu dans l's Êtats. Heutheusement, les communistes n'ont pon 'couo rêussi à entrer dans la Chambre, mais y'en a iun tch'a quâsi mîns au pid sus l'pas d'la porte. I' n'pathaît pon êt' un mauvais garçon. Il a la langue bein pendue, et ch'est grand danmage tch'i' prétend êt' du parti communiste. Il éthait p't êt' fait un bouan député, mais en prîncipe ch'es'sait eune grand' mêprînse dé pèrmett' un membre dé chu parti-là d'entrer dans l's Êtats viyant qué la tchulbute du gouvèrnement “Du Peupl'ye, par lé Peupl'ye, et pour lé Peupl'ye” - comme lé dit la Constitution dé l'Améthique, et comme est la bâse du Parlément Angliais et d'nouos Êtats - est l'êvangile avouée du Communisme. I' n'faut pon oublyiyer ch'la, êlecteurs dé Jèrri. Séyiz sus vouos gardes!

 

Eune aut' chose tchi m'a fait pliaisi est lé vote contre lé paiement des membres dé la Chambre Législative. À m'n idée, si chu projet-là 'tait adopté y'éthait dangi d'vaie la fîn du vièr systeme honorifique tch'a si bein sèrvi nouot' p'tit pays avau les siècl'yes et v'là tch'ouvrithait la porte à toutes sortes d'aventuthièrs tchi sont trop pièrcheurs pour gangni lus vie. I' né d'mand'daient pon mus qué d'lus assièthe dans la Chambre à passer des louais pour hauchi lus salaithes. Il est tout probabl'ye tch'i' c'mench'chaient à un paiement annuel raisonabl'ye, mais qué v'la tchi finnithait par êt' un salaithe formidabl'ye! S'ou n'mé criyiz pon ou' n'avez qu'à r'garder la gâzette hebdomadaithe du quatorze Dézembre tchi nouos dit qu'eune augmentation, montant jusqu'à huit louis la s'maine dans certains cas, fut accordée par l's Êtats quâsi sans commentaithe, ès grosses têtes dé nouot' Êtat Civil! Si des membres d'la qualité qu'j'avons à ch't heu peuvent faithe d'ité, tch'est tch'i' pouorrait en couôter à l'Île si chînquante-deux députés - attithés à la bourse du publyi pûtôt qu'au sèrvice du peupl'ye - lus décidaient d'augmenter lus salaithes dé même touos l's ans? Car ch'est appathemment l'ambition d'un cèrtain Sénateu dé vaie les Connêtabl'yes fliantchis à la porte et rempliaichis par des députés. Tchi mauvaitchi qu'cèrtains peuvent aver dans l'idée?

 

I' faut êt' èrconnaissants, étout, qué l'jugement d'la Cour Rouoyale a empêchi la tête dé La Tchébault, à l'Êta, d'êt' abattue par des cârrieurs. Nouot' belle petite Île a déjà 'té d's'ahontée assez par la construction d'maiethons d'toutes les sortes et d'toutes les faichons sans aver ses bieautés naturelles dêtruites!

 

Et, en fîn d'compte, i' faut mentionner la bouonne nouvelle qué la vielle Reine Victoria s'en va continnuer à orner lé bieau p'tit gardîn sus la cauchie!

 

George d'La Forge.