2011: Lettre Jèrriaise

 Lettre Jerriaise Samedi l '8 de Janvi 2011.

                                             

BOUON JOUR a tous tch'écoute la Lettre Jerriaise aniet Samedi 1'8 de Janvi 2011, et chais auve pliaisi que me r'vela Clifford Laisney a vos la présenter.

 

J'pense bein que couomme mé la majorité d'vous lus d'mande ouaiq'u l'année s'ést passée. i me r'semblye que amsûthe que j'veillyie les années lus passe pus vite et chaque année ergriste un numero d'pus sus l'calendrier, et j'vos garantie bein que nou c'mmenche a senti l'éffêt. Enfin faut etre bein ermerciant de tuous les beins de tchi que Dgieu nos benits.

 

Dûthant l'année tchi vint d'se passe, j'nos r'souv'nons de plusieurs d'sastres tch'onts causé bein d'la detresse au peuplye de differents pays. Des millions onts souffert les consequences des innondations d'ieau sustout dans les pays de Pakistan et des regions D'La Polande, et Portugal et acquo aniet une partie du peuplye sonts déprivées d'une vie normale. Etout les trembliements d'terre en Haiti et d'autes parties du monde presente des problemes au peuplye. Chais problêmes sonts agrandis quand l'pays n'a pas les resources de cont'nin l'damage et d'même est forchi d'app'lé aide a ses vaisins. Differentes regions d'L'Amerique onts ieu des ouragons d'vent et tempêtes causant hardi d'domage es recoltes et habitaments du pays. En Europe etout et même ichin en Jerri j'avons ieu not chare de mauvais temps. Ch'est rare d'avait des bordées d'né comme j'avons ieu dans l'mais d'decembre.  AUTANT pour toup chu' GLOBAL WARMING' auve tchi qu'les proffesseurs de science continusses a nos bouôrreler l'chérvé..

 

2010 etout a veu le decés d'membres d'fanmillye, anmins et même des contributeurs de la lettre jerriaise, et a tous d'vous tch'onts souffert chutte detresse, j'vos envie mes sympathies.

J'espethons que la fin d'l'année autha veu l'finnissement du chapitre des injures causé par les cas d'abuse historique, une chose qu'a causé tant d'peine es victimes et a dominé les gazettes.

Enfin, une année s'passe et une nouvellé nos attend. J'nos pliaichons au porta d'une nouvelle année inconnue Ch'est a chatchûn d'nous d'pliaitchi nôt foûai solidement en Dgieu qui nos dgid'tha sus nôt viage.

 

Nos r'vela acquo une fais arrivées a la saison d'la toun'nie. Tchi difference aujourd'aniet quand nou vait un homme , tracteu et tchêthue a quatre rais, a compather du temps passé dans l 'temps des tchêthues a ch'vaux auve un homme dans les manchots , et un couplye d'hommes a chaque but du clios a fuit l'pitchage et r'habillyi am'sûthes. Et pis la plian'ntie s'en va r'commenchin dans rein d'temps, et tchi changements etout d'la manniethe de plianté les patates. Chaque année nou vait d'pus grands tracteurs et des machinnes a defoui pus modernes, Autrement q'dans les cotils ch'est rare de vaie panniethes et bathils dans les clios. Vos en r'souv'nous d'la dernié fais qu'ou vites un lorry chergi d'bathis d'patates? Tout change, mais homme n'a pas acquo menagi d'changi les saisons. Nou c'mmenche a vais les g'zettes tchi perche le crotin d'la terre, les p'tites bouonnefemmes sethonts pas longtemps d'vant montrer lus p'tits chapieaux, et même dans rein d'temps j'entend'dons le chant de l'oisé du matin announceant le r'nouvé. Même les bouais aupres avait prins lus r'pos sethonts bein vite a montrer lus bourgeons devant ecliater lus feuillage. Oui, le r'nouve est un magnifique examplye et spéctayle d'écliarté, de nouvelle vie suivant les sombres jours d'hiver.

 

Nos v'la deja une semaine dans la nouvelle année, et j'sis seux qu'une grand partie d'vous qu'avaits fait des promesses et resolutions le prem'ié d'l'an trouve l'effort acabliant et malgré toutes bouonnes intentions, l'idée 'tait bouonne mais trop exigante. Je sis dans vot compagnie.

 

J'ai un penchant pour la casserole et la douchin'nie et malgré toutes mes bouonnes intentions l'appetit survint mes ambitions.

 

Bouonnes gens, j'vos r'mercie pour vot attention, et pour ecouté la lettre jerriaise chaque semaine.

 

Veronica m'joins en vos souhaittons tous les complyiements d'la saison, éspethont que l'année 2011 vos apporthetha jouaie et bouonne santé. Puis_que Dgieu vos accompagnetha sus vot viage le travers de l'annee.

 

A LA PRECHAINE.

 

Clifford Laisney