1960: Ph'lip va au “show” d'la ville

 Ph'lip va au “show” d'la ville

Et fait la Merrienne mârri

 

à Portinfé,

Saint Ou.

 

Moussieu l'Editeu,

 

Comme ou l'savez, j'ai tréjous yeu l'habitude d'aller ès “shows” d'bêtes, et comme j'vos l'ai dit pusieurs fais, la Merrienne a tréjous mînt objection, disant qué j'pèrdais man temps et que jé n'sais bein mûs otchupé ichin à faithe man travas. Mais, Moussieu, si la bouonnefemme est têtoigne, j'si étout, et j'n'mé r'souveins pas d'une seule occâsion quand j'ai yeu à cêder, sinon la bordée, qu'ayant 'tait à une Assembliée d'Pâraisse le sé dé d'vant, j'm'trouvis trop faillyi pour aller au “show” d'Saint Jean et Saint Louothains, et ou m'gardit au liet tout l'jour, mettant la porte à la clié de peux que, mé trouvant un mio mûs dans la matinée, j'm'écapp'thais quand jé s'sais seux qu'ou 'tait hors de la vaie.

 

Quand j'li dis, Mêcredi matîn, qué j'm'en allais au “show” d'la Ville, et que j's'sais content s'ou voulait bliétchiner mes bottes, ou n'dit rain pour un moment, et pis, ayant gaffé mes bottes, ou m'les fliantchit à la tête, sans faithe grand ma sinon un pot-à-tais, deux tâsses et trais assiettes dé bûchis. Heutheusement, ma Merrienne n'a jamais yeu l'nivé dans l'yi!

 

J'prînt la bus, et j'arrivis à Springfield pour vaie les Juges entrer dans l' “ring”, avec sûs lûs visages l'expréssion, comme à l'ordinaithe, de deux hommes tchi s'n allaient dêmontrer à tout l'monde la vraie maniéthe dé jugi un classe dé bêtes. Ils avaient qu'menchi avec deux g'niches r'nouv'llées, et même un aveuglye éthait peut vaie sûs l'coup qué yunne valait bein mûs qu' l'autre, et éthait fini la djobbe dans mains d'une minute. Mais, comme nou sait, Moussieu, ch'n'est pas d'même qu'nou fait les choses si nou veur êt'e considethé un bouon Juge, et j'eûmes à arrêter une pôse, tandis qu'nos deux Mêssieux examinaient lé d'vant, lé mitan et l'driéthe, tâtant la pé, m'suthant la coue et s'faisaient seux qué châtchune de nos deux bêtes avait un piechot avec lé nombre usuel de trans.

 

Dans les jeunes vaques, les Juges furent longtemps à tâchi de décider entre les deux preumiéthes, mais i' n'taient pas d'accord, et à la fin lé Sénateur Dorey, un couôsin à la Merrienne, fut app'lé. I' n'est jamais prêssi, lé Sénateur, mais i' peut tréjous vos dithe ses raisons pour aver fait san chouaix.

 

J'trouvis un nombre de mes vièrs amîns au “show”, et j'eus grand pliaisi d'vaie qué l'bouonhomme Ph'lip Mouothant, du Mont au Prêtre, qué j'ai connu à bein près toute ma vie, 'tait ocquo là comme exhibîteur. Il est r'mèrquablye, lé Ph'lip, car i' pâsse quatre-vîngt-quatre, et a 'té membre d'la Société Agricole dé Saint Hélyi pour souësante-chînq ans, et i' va ocquo quédaine quand il est prêssi.

 

“Et pourtant,” j'dis à la Merrienne, quand jé r'vint, “ch'est un homme tch'a travaillyi bein dû toute sa vie. Il a 'té un exemplye à bein d'autres, et surtout ès pièrcheurs.”

 

“Si ch'est d'même,” ou dit, “ch'est grand dommage que cèrtains qué j'connais n'ont pas profité dé s'n exemplye.”

 

Né sachant pas tchi raipondre là-d'sûs, Moussieu, j'changis d'sujet et j'li dis qu'après l' “show” j'avions yeu un excellent r'pas à l'hôtel Royal. “Vraiement, Merrienne,” j'ajouôtis, “j'n'sais pas quand j'en avais jamais mangi un miyeu, ou même un si bouon.”

 

Si j'avais réfliêtchi pour un moment, Moussieu, j'n'éthais pas dit une si bête dé chose, mais avec chonna j'n'criyais pas qu'la Merrienne se mârrithait comme ou fit.

 

“Oh!” ou m'dit, sé t'nant en d'vant d'mé, avec ses mains sûs ses hanques. “Eh bein, man Ph'lip, dépis qu'j'ai prépathé tan dêjeuné, tan dîné, tan tais et tan soupé toutes chais années sans pouver t'pliaithe j'm'en vais t'dithe tchèsque tu peux faithe. Dès agniet tu peux les prépather té-même, et j'vêrrons si tu peux faithe mûs. Jamais de ma vie j'n'avais 'té si insultée!” Et là v'là tchi s'assied dams sa grand'tchaise, et s'met à lièthe un sèrmon sûs l'tchoeu dû et ingrat d'l'homme.

 

Mais, Moussieu, j'savais bein que chonna n'pouôrrait pas duther longtemps, car la Merrienne n'peut jamais garder autchune rantchune, et l'préchain matîn tout était comme dé couôtume, et oulle a prépather touos nos r'pas, sans dithe un mot au sujet de chein qu'j'eus à mangi à la “Royal”.

 

I' y'a deux choses qu'ou veur faithe. Ou veur aller en Ville la s'maine tchi veint pour vaie lé “Muratti”, et ou veur dithe au Doyen tch'il a 'té longtemps à dêcouvri chein qu'les tchans vont faithe dans san chim'tièthe. Quand ou m'en pâsli j'li dis qué, sans doute, ou pouôrrait s'protchuther un titchet pour lé “Muratti”, mais qué j'n'criyais pas que l'chim'tièthe d'la Vielle Églyise nos concernait. J'ajouotis qué dans m'n opinion lé Doyen avait dé pûs importantes tchestchons à considether qu'les tchans à banon dans son chim'tièthe et lûs sales habitudes parmi les tombieaux.

 

J'pense bein que j'ithai étout à chu “Muratti”, mais j'n'peux pas dithe qué j'ai l'même intéthêt comme aut'fais quand nou n'tait pas en seûzeté d'sa vie si fallait aller en Djèrnêzi. Nou m'dit qué chutte fais j'avons une bouonne chance dé gâgni, mais j'en doute, car j'n'avons pas les grands joueurs du temps pâssé et Springfield n'est pas Westmount d'un bieau but.

 

Une bouonne achie éthait fait grand bein à ma bordeuse, Moussieu, mais à matîn j'ai 'té digotter ichin et là, et s'ou vouliez v'nin siez-nous, chu Dînmanche pour diné, j'peux vos promettre un fricot d'nouvelles patates et un bouon morcé d'lard bouoilli qu'la Merrienne étha dêhalé.

 

Ph'lip.

1960