1973: D'èrtou d'France

 D'èrtou d'France

 

Le Ménage ès Feuvres,

St. Ouën.

 

Lé 25 d'août, 1973.

 

Moussieu l'Rédacteu,

 

M'èrvélà en Jèrri auprès aver pâssé trais s'maines en France. Quand j'mé r'trouve tout seu dans l'vièr ménage ch'est comme si j'avais 'té soudainement transporté dans un aut' monde. La trantchilité m'frappe! Ch'est sans doute viyant qué j'sis ès Landes. Si j'tais en ville ché s'sait aut' affaithe. Ch'n'est pon qu' nou n'peut en trouver en France, d'la trantchilité, mais en général lé peupl'ye Français est bein pus excitant en li-mème qué les Jèrriais, et i' m'sembl'yent tous pâler à tue-tête, mème siez ieux. Nou dithait tch'i' sont mârris, mais ch'n'est qu' lus manniéthe dé d'viser. Y'a, sans doute, l's exceptions - comme dans toutes choses. J'ai 'té eune tchînzaine siez un anmîn dans l'Midi tch'est docteu. Il 'tait man compangnon d'viage en Tèrre Sainte en 1951 et en Grèce, en Turtchie, et dans l's Îles Dodécanèses en 1952, et j'avons tréjous 'té grands anmîns d'pis. Siez-li, s'i' n'y avait pon d'téléphone nou pouorrait dithe qué tout est trantchil, mais l'fichu téléphone sonne tréjous. Ch'est ravissant qu' sa danme n'en affole pon. Il a à peine lé temps d'mangi. Y'a tréjous des malades à l'attendre siez-li. Il en visite dans la campangne deux fais par jour et il est souvent appelé dans la niet.

 

I' d'meuthe dans l'pays du vèrjus, pas liain d'Cognac où'est qu' la fanmile Martell - des Martel dé Jèrri - aut'fais - ont lus grand conmèrce. L'fondateu d'la maîson avait ajouôté un “l” au but d'san nom pour n'êt' pon prîns pour un Français. Hardi des clios à l'entou qué j'viyais tchultivés en vèrjus y'a tchiques années sont en maïs à ch't heu. Les gens m'disent qué ch'est dév'nu profitabl'ye viyant qu' un tas d'maïs est fait sèrvi à fabritchi du plastique. Nou n'vait pon fort dé jannes dans les fèrmes et nou m'disait qu' ch'est seulement eune affaithe dé temps d'vant qu' la fèrme d'fanmile dispathaisse car i' n'restent pon siez ieux à aidgi péthe et méthe à la faithe valer. I' s'en vont dans les villes pour gangni lus vie pus aisiement, et la main d'oeuvre manque dans les fèrmes comme en Jèrri. À m'suthe qué l's anciens meuthent les jannes héthitchièrs vendent la fèrme à tchique sŷndicat tchi fèrme “en gros”.

 

L'Églyise Romaine en France en a pèrdu ches dreines années. I' y'a un manque dé prêtres. Dans les p'tites villes (“villages” en Angliais) qué nou trouve f'nées partout dans la campangne, nou trouve un tas d's églyises freunmées et néglyigies viyant tch'i' n'y'a qu' un prêtre pour souangni d'chînq ou siex églyises dé pâraisses, et i' n'peut pon tréjous célébrer la Mêsse dans toutes touos les Dînmanche. I' pathaît qu' l'affaithe empiéthe à m'suthe qué l'temps s'pâsse et qu'les prêtres âgis vont à lus r'pos êtèrnel car y'a un manque dé jannes prêtres pour les rempliaichi.

 

Mén anmin l'docteu m'dit tch'il eut un choc quand il 'tait en viage dans l' Massif Central dreinement dé vaie toutes sortes d'objets d'églyise à vendre dans les boutiques d' “antiquaires” dé chutte contrée là - des estatues, crucifix, changlièrs, candélabres, des “chapes, chasubles, encensoirs et même des calices.” Il en 'tait malade dé vaie qu' l'églyise pèrd ses trésors dé même. I' pathait qu' ch'est l's Espangnos tchi veinnent l's acater.

 

Eune entréprise tchi marche bein en France est l' “chemin de fer”. Les trains sont confortabl'yes, rapides et à l'heuthe. Mais s'i' s'adonne qué nou les prend dans l'temps des vacanches i' faut, s'i' y'a mouoyen, acater eune pliaiche dans l'train d'vant s'embèrchi d'dans, ou bein y'a la probabilité d'aver à sé t'nîn d'but dans l' “couloir”. Nou n'gangne rein d'mett' la tête dans l'entrée d'un “compartiment” et d'mander s'i' “y'a d'la place?” La rêponse est seûthe d'êt' “Non, Monsieur, c'est occupé!” Sans doute, nou peut vaie s'i' y'a eune pliaiche libre, mais quand nou-s-en vait ieune i' prétendent qué “c'est occupé” par tchitchun tch'est “absent pour le moment”. Ch'est drôle, mais ch'est d'mème. I' sembl'ye qué ch'est dans l'caractéthe des gens dans les trains d'êt' offruns quand i' sont d'dans, ouaithe tch'i' sont si hospitalièrs et av'nants quand nou va siez ieux!

 

Nou n'peut sénon r'mèrtchi tch'i' y'a eune prospéthité en France qué nou n'viyait pon pour eune volée auprès la dreine dgèrre. Ch'est seux tch'i' y'a pus d'sou par les c'mîns. Les maîsons sont nouvellement peintes, les gens sont bein habilyis et - chose tchi n'a pon changi - les cafés sont plieins d'gens à baithe et bagouler.

 

Eune chose à admither en France est qué l's autorités one pâssé eune louai ordonnant l'monde dé faithe sèrvi la “ceinture de sécurité” (“safety belt” en Angliais) dans touos les motos de ch't année et d'à l'av'nîn, et dé n'cachi pon pus vite qué chent kilometres à l'heuthe. La nouvelle louai est en forche dépis l'preunmyi d'juillet, et l'nombre d'accidents fatals a dêjà 'té réduit par vîngt du chent. Un bouan exempl'ye pour touos les pays!

 

George d'La Forge.