1978: La Milice Rouoyale dé Jèrri

 La Milice Rouoyale dé Jèrri

 

 

Trenton, Michigan,

USA.

 

Lé 18 dé novembre, 1978.

 

Moussieu l'Rédacteu,

 

Dans la gâzette dé Jèrri du chînq d'octobre, qué j'veins d'èrchéver à matîn, j'vai un bieau portrait tchi montre les soudards dé la Milice Rouoyale dé Jèrri rangis en parade et obéissant l'ordre dé “Eyes right!” Et j'vai qué l'Sèrgent des Couleurs à la drouaite du preunmié rang est l'Révérend Peter Manton, présentement Recteu d'St. Jean. V'la tchi montre tch'il 'tait un bouan soudard - comme il est un bouan minnistre au jour d'aniet, car il a tréjous 'té prêt à prendre d'la responsabilité.

 

I' pathaîssent bein, ches bieaux soudards dé nouot' vielle et fanmeuse Milice Rouoyale dé Jèrri, et v'la tchi m'ramémouaithe la matinnée d'ma preunmiéthe arrivée au camp des Tchennevais, tout près des Rouoges Maîsons, quand j'fus accoutré. Ch'tait en mil neu chent huit. Etant né lé vîngt-neu d'septembre, 1891, j'n'avais pon seize ans d'vant septembre, 1907, trop tard pour êt' appelé faithe man sèrvice d'èrcru ch't' année-là, ch'est en tchi ch'tait au c'menchement d' 1908 qué j'eus l'ordre dé m'présenter à l'arsénal dé St. Pièrre. Jé d'meuthais à St. Brélade (à La Mouaie) dans chu temps-là.

 

J'fus mîns dans les Sîngaleurs, et à la fîn du tèrme d'înstruction j'eus la chance dé gângni la tchulyi d'argent présentée par L's Etats pour lé miyeu sîngnaleux d'ma classe. Etant à court dé Sîngnaleurs dans l'Bataillon du Ouêst, i' mé d'mandîdrent si j'voulais êt' accoutré sus l'coup et aller au camp dans l'bataillon. Man bouanhomme! I' n'mé prîns pon longtemps à dithe “Oui!” Et la matinnée qué j'mîns l'uniforme d'kâki et qué j'm'en allis dé Haute Place (à La Mouaie) lé long d'La Route Orange, l'arme à l'êpaule et la baïonnette au côté, j'tais l'pus ordgilleux cotchet au monde! J'marchais drait comme un pitchet, et j'éthais donné tchiquechose pour qué ma janne fille m'éthait rencontré en c'mîn. J'tais seux en mé-même qué j'pathaissais aussi bein comme les rédgulièrs!

 

Hélas! En a-t-i' pâssé, d'l'ieau par La Corbiéthe, dépis chu jour-là! Et j'ai ieu man tchèr content d'soudardéthie. Comme j'vouos l'disais dans ma lettre la s'maine pâssée, j'ai sèrvi dans l'Artil'lie (Royal Field Artillery) d'l'Armée rédguliéthe (dans la dgèrre dé 1914-1918), et pus tard dans lé Royal Canadian Army Medical Corps et dans les Princess Louise Dragoon Guards du Cannada. Et j'sis acouo d'avis qué v'la tchi f'thait du bein à touos les garçons d'au jour d'aniet d'êt soudards. V'la tchi vouos apprend d'la disciplinne, à obéi eune ordre sus l'coup et sans ardgûment, et à n'êt' pon haînitcheux. Et ch'est eune vie saine.

 

Nouos officièrs dans l'Bataillon du Ouêst 'taient des charmants mêssieux. Lé Lieut'nant-Coronel 'tait l'Avocat Maurice Alavoine, et j'm'èrsouveins tch'i' vînt nouos faithe des rouaux sus l'co - en Jèrriais - eune fais quand j'avions voulu nouos dêfaithe d'un sèrgent nommé Alldridge tch'avait rempliaichi l'Sérgent-Majeur Horwood tch'était un fanmeux vièr corps. I' comprannait bein qu'la grand' partie des miliciens 'taient pus accouôteunmés à mannier la frouque qué l'arme à feu. Nouot' Mâjeur 'tait Moussieu Robert de Vismes, et l'Agîtant 'tait Cap'taine (pus tard Coronel) Albert George L'Estrange Le Gallais, et l'Cap'taine dé la Compangnie d'St. Brélade 'tait Cap'taine Hugh John Dalrymple Tennant.

 

J'tions eune mangnifique dgaîngue dé Sîngnaleurs dans nouot' tente au camp des Tchennevais, et j'accordions comme des clioches. Nouot' Sergent 'tait l'Sieur William John Thelland tchi travaillait dans eune banque en ville. Nouos compangnons 'taient Walter Chapman, dé d'Hôtel Somerville à St. Aubîn, Arnold Maugi et Harold Dart, dé St. Aubîn étout, John George Malzard, bieau-fis du Chent'nyi Carrel, des Ormes, à St. Pièrre et, pus tard, man fréthe Fraînque. Hélas! i' n'y'a qu' Fraînque et mé d'la dgaîngue en vie à ch't heu. Et j'avons dêpâssé la huiptantaine.

 

I' n'faut pon penser, sans doute, qué la soudardéthie dans la Milice Rouoyale 'tait aussi stricte en disciplinne comme dans les rédgulièrs, mais v'la tchi n'empêchait pon l'milicien d'apprendre à êt' bouan soudard. Les “Drill Sergeants” 'taient des Rédgulièrs et i' connaîssaient lus mêtchi et nou-s apprennait bein l'exèrcice. Et i' fallait aller tither au blianc à Crabbé eune fais la s'maine pour deux ou trais mais touos l's ans, et y'avait des fanmeux titheurs dans nouot' bataillon.

 

Et m'en allant à Crabbé - ch'tait en bicyclette dans chu temps-là - j'allais par siez l'Chent'nyi Carrel, ès Ormes, à St. Pièrre, qu'si m'n anmîn John George Malzard, et j'faîsons c'mîn ensembly'ye et pis j'restais à dîner siez li en r'vénant dévant continnuer c'mîn pour La Mouaie.

 

J'ai tréjous pensé qué la Milice Rouoyale dé Jèrri n'éthait deu êt' abolie, et j'avais au bouan support dans ch't' idée-là dans la pèrsonne du Mâjeur Francis Arthur Labey de Gruchy, dé mémouaithe respectée, longtemps Député d'St. Ou dans L's Etats. Et janmais j'n'oubliethai mes heutheux jours comme soudard dans chutte Milice tch'avait l's honneurs dé dgèrre de “Jersey 1781” sus sa couleu régimentale.

 

George d'La Forge.