2010: Lettre Jèrriaise

 Lettre Jerriaise Samedi l'2 d'Octobre 2010.

Couomme normale chais mauve pliaisi que me r'vela Clifford Laisney a vos présenter la Lettre jerriaise aniet Samedi 2 d'Octobre 2010.

 

Nos v'la arrivées a la saison d'Aûtomne, les jours onts déja bein r'app'tichi. Nou sen la fraicheu d'la saison, les rousées s'appâthes et dans trais s'm'naines s'l'houologes ethonts avantchi d'un heûthe et j'c'mmenchons a nos prepather pour les tempêtes d'la saison, et les longues sethées autou d'l'atre.

 

J'en pouvons pas nos pliaindre trop ch't'année car j'avons rejoui d'un assez bouon été, la pluie est v'nue quand i i'on fallait resûltant que l's'herbages et flieurs onts bein survit la saison. Nou m'did que l'avout d'tardive patates, fruit et sûstout les pommes est hardi productive ch't'année. Quand a l'avout d'frement et blié ch'est difficile a jûgi car nous ont vait bein p'tit d'cru chés jours. Une recolte en prominence est l'grain d'Espagne, cru spéciallement pour supplementé le regime de nouôrrituthe des bestieaux dûthant l'hiver. Je sommes entouothées d'au mins vingt vregis de chutte magnifique recolte. J'entendais l'aute jour sus l'radio tchi i'a une écarcité d'blié dans les pays d'la Russie et Pakistan causé par les feus et delûges d'ieau de tchi tch'ils ont souffert ch't'année, et d'même l'export setha limité ch't'hiver. Sans doubte j'verrons les consequences pus tard dans les boutiques quand les prixs d'pain gach'innie, viande etc fethonts acquo un saut. Mais j'pouvons etre bein ermerciant d'pouver acater a not aise en compathaison des gens tchi perde tout cause du temps dans aute pays couomme j'viyons sus les portraits d'la television.

 

Dreinment nos Etats onts 'tait en déliberathion envers differents moyens d'etreindre sus l'écenomie. Plusieurs departments d'l'Administration ont 'tait persuadées d'ajusté lus depens en orde d'aidgi a remplyi l'nier cachot causé par la recession et des bouon temps quand l'argent 'tait en abondance. Bein seux chés bein important d'économisé, une chose bein fanmilyi par les gens d'ma generation tch'enduithides chinq années d'otchûpation. Vivont sus une ile veurt dithe que j'nos fions sus l'import pour hardi d'not marchandise, hélas iune des raisons pour les gentiment haut prixs dans nos boutiques. Malgré toutes les d's'avantages j'avons etout hardi d'bénefices. Couomme pensioniers je somme en r'chette d'une raisonablye pension, souscriptions au pharmacien sonts gratuis, les gens tch'in peuve pas arriver a resoudre lus comptes cause de maladie, fanmillye ou d'aute raisons onts accés a un support d'érvenu, et même a matin j'ai r'chu dans la poste un memento m'avissant que ma carte de circhulation sus la bus m'attend a la station. Couomme pensioniers a Noué j'sommes en veue d'érchever un prinme de Noué, et j'compte qu'un certain moussieu sont va acquo offri sa génerosité.

 

Quand nou pense au temps passé, quand les gens avaits besoin d'aidge que j'fusse pour payi pour nourrituthe, le docteu ou d'aute nécessitées, i 'tait nécessaithe d'aller a l'office du connétablye d'la paraisse et y'exliaitchi les raisons et circonstances de la nécéssité. Les pus anciens des gens tchi m'écoute aniet sethonts bein au couôuthant d'l'introduction auprés la dgerre de la Sédurité Sociale. Y'u hardi distchussion et d'confrontation parmi les membres d's'Etats envers l'introduction d'chu projet. J'em rapelle si bein quand les opposeurs du projet paradites en demonstration en d'hors de l'Assembliée d's'Etats. Les temperaments taits écauffés et resultit presqe en dgerre civil. Eventuallement, suivant bein d's'assembliées dans les salles de paraisses et ailleurs, le projet fut accepter et même la Sécurité Sociale fut introduite.

 

Au c'mmenchement, la souscription et bénefices payi etait p'tit, mais graduallement comme toute aute choses l's'affaithes onts augmenté et aujourd'aniet quouaiqu' les contributions payablye par l'employeur et employi sonts haut, j'me d'mande dans tchi position que j'nos trouv'thaimes quand maladie ou accident s'presente, et quand les gens arrive au moment d'ertraite, si j'n avaimes pas la Sociale.

 

J'crai qu'si j'avaimes suivit l's'idées et princiolyes d'un certain moussieu d's Etats du jour, j'en sethaimes pas dans la position favourablye que j'nos trouvons aniet.

 

Mercie pour vôt compagnie aniet.

J'vos offre mes meilleurs souhaits en vos souhaittons tous bouonne santé et une bouonne semaine couonmme trejous.

 

A LA PRECHAINE

 

Clifford Laisney