1924: Ma chière couosine, Julie Cahuette

 Ma chière couosine, Julie Cahuette, de Cancale, m'a envièth une lettre la s'maine passée m'd'mandant si les grands d'la paraisse de St.-Jean sont de charme car en lièsant sus la gazette qu'ils s'n'allaient faithe un trip au Mont, en ayant assez des huitres de Cancale, chutte chière couosine s'en vint à St. Malo pouor vais nos grands.

 

Oulle s'd'mande s'il y en a qui ont une suée d'fraid, viyant que pus d'ieun ergrettait de n'pon aver sa grande casaque pouor s'abriter pendant l'motor ride.

 

Mais ma couisine est un miot tchutieuse de sa sorte car si Clifford fut bein surprins couomment qu'nous prépare les lits en France, n'v'la qui n'ly concerne pon de saver si la deuxième nièth y dormi mus.

 

J'sais bein èttout que l'p'tit Joe fut surprins car y savait fort bein que ch'n'tait pon la sueur mais pouor dithe tchès qu'est l'sien qui mint chu lincheux mouoilli au pid de son lit, et sous les couvertures s'il vos pliait, pouor seur j'aime mus taithe ma becque. Vais tu, mon Joe, ch'tait p't'être viyant qui criyaient que t'avais des frédeuses ès pids ou ch'tait p't'être èttout une farche de... que tu couonnais bein!

 

Nennin, j'n'en dirai pon pus long mains p'être que j'pouorrais en raconter bé d'autres sortes. Enfin, nous peut dire que touos les siens qui allites à chu pic-nique en eutes pouor lus sous et que touot alli d'charme.

 

 *   *   *

 

J'espèthe que les patates dans la paraisse au Captain qui n'a jamais été en mer s'en vont caboter dur et que les prix au bridge s'ront élevés car ch'est qu'il y en a de mârris d'aver à payi un rât à 2/7. Faut d'mander à Frainque du Manièth et à Charles des Six Rues chein qu'ils en pensent!

 

L'pus bé de l'histouèthe ch'est chein qui s'passi au meeting car d'vant chest qu'il y en avait qui avaient hardi de becque. Il y en avait ieun qui s'faisait qu'il allait proposer 1/8, un autre qu'était d'avis que 2/- s'raient suffisant et touos chès gens qui allaient capsizer touot n'fites rein en tout!

 

Es siens qu'avaient mâ à l'estomac, le grand docteu de chutte paraisse lus bailli un raide buan r'mède car pouor un temps y futes guéri d'lus démangeaison d'langue qui erprins oprès l'meeting et ch'est qu'il y en ieut de dit... pouor rein en touot puisque l'affaithe était settlée.

 

P't'être que d'settler avec l'Vingtegni s'ra une autre chanson mais comme les compliements n'remplaiche pon les sous, n'v'la qui s'ra encouore une fais des dithes pouor rein.

 

Caouain

1924