Lettre Jerriaise Samedi le 3 d' Juillet 2004

 Lettre Jerriaise Samedi le 3 d' Juillet 2004

 

Chés tchique temps d'pis qu' jai ieu l'opportunité d'vos addrechi sus Radio Jerri, mais circonstances au d'la d'ma responsibilité monts empêchi d'vos presenter mon discours normale dans nôt vielle et ancienne langue Jerriaise. Enfin me v'la aniet le 3 d'Juillet 2004, et chés Clifford Laisney tchi vos addreche.

 

Nos v'la deja arrivée au mié d'l'année, et la s'm'naine passée, le 24 de Juin 'tait la fête de la St Jean. Dans l'temps passé le 24 de Juin signifié le temps d'l'anée quand un locataithe d'une ferme payait son propriétaithe une mié année d'louage, normalement siex mais en avanche. Ch't'arrangement 'tait tout bein quand la saison d'patates 'tait heûsie et quel fermi avait érchu tchiques billet en paiement pour ses efforts. Pour le locataithe d'une maison etout ch'tait l'temps d'paiement avâu les quartchiers du 25 de Mars, la Saint Miché, et l'quartchi d'Noué. Aujourdaniet, y'n y'a pas grands locataithes de ferme etant tch'in y'a si p'tit d'fermiers de restant. Chés des grandes entreprinses, des co-operatives tchi gouvernes le marchi. L'ile a perdu s'n'individualité. Vos en rapp'lous quand duthant la saison d'patates, chaque jour sus l'journal du sé, y 'tait mentionné le nombre de viages de patates tch'avaits passé sus l'Bridge', le prix mouoyen du jour, et même le nom des batieaux tchi sortaits d'la cauchie destinées pour differents ports de l'Anglieterre, et même le tonnage de patates abord. Ah! Comme tchi q'les affaithes onts changi. Nou realise même pas tchi y'a une saison en forche. Les patates sonts transportées sus des vethûthes refrigeratées directement sus l'baté, et directement au supermarchi, Quouaiqu' la recolte est tramnsportée directe, j'ai mes doutances que les patates arrives sus l'marchi aussi fraiche que dans l'temps passé. Y'n y'a pas telle chose de traiter les patates comme j'faissaimes dans l'temps. Vos r'sov'nous comme tchi qu'aussitôt qu'el bathi 'tait remplyi, fallait une froût'chie d'vignes pour empéchi l'sol'e d'lés brulé.

 

Quouaiqu' j'ai p'tre condanmer les manniethes du defouage et vendablyement d'la patate Royale, y faut admettre que la qualité d'la patate a bein amender chés dreines années. Oulle a r'tenu sa doucheur et est bein appreciée sustout quand nou peut la mangi fraiche du clios.

 

Je sommes bein chanceurs que j'avons l'opportunité de l's'acater toutes fraiches, que s'sait du marchi ou des halles parsemées dans differentes contrées d'l'ile. Dépis l'c'mmenchement d'la saison j'avons fait nos achats d'patates directemen d'la ferme, et bieaux que j'devthaits pas faire ébalander ma source, j'vos r'quémande'thais d'visiter la ferme au Haut d'L'orme au Mont a L'Abbé, eyou qu'ou trouv'thez toutes sortes d'legumes, cabboches, salades, rhubarbe, tomates, oeuxs, frases, flieurs etc, et l'service est superbe.

 

Avous ieu l'tchoeu content, collés a la television chès dreines semaines a suivre le jeu d'football? Cha 'tait hardi interessant et excitant d'vaie les differentes etchipes eliminées d'la competition. J'avaimes tous bouonne éspethance que l'Anglieterre authait arrivé au finale. Mais j'en 'tait pas pour etre. Faudra attendre a d'main au sé pour vaie l'resûltat du finale.

 

Les gens tchi suive la 'Paume', le 'Tennis' comme j'l'app'lons authont 'tait d'ssapointées qu'el mauvais temps a Wimbledon a derouter la continnuation d'la gamme. Chés d'ssapointons etout pour les vendeurs tchi fonts lus commerce de vendre les d'lices de frases et crême és spectateurs. Y'a pus d'pliaisi d'lés mangi suous la chaleu du solé que d'suous un parapluie.

 

La s'm'naine passée etout, j'avons ieu not share de festivals. Pour les gens interessis dans l'histouaithe de Jerri Les Fêtes de Jerri, (Jersey Revels) onts demonstré en âcte de thêatre le combattement d'pis l'année 1204 tch'a t'nu not fidelité a la couronne de L'Anglieterre.

 

J'termine en envions nos pensées a tuous les malades et gens tchi lus trouve un miot sous l'temps, et a tous tch'onts perdu membres d'fanmillyes et anmins a ch´s drein, j'vos offre ma sympathie. Quouaiqu' j'passons en temps troubieux, j'avons l'assûthance que chaque nuage a une erdoublyieuse argentée.

 

A LA PRECHAINE..

 

Clifford Laisney