Lettre Jerriaise Samedi l'19 d'Octobre 2002

 Lettre Jerriaise Samedi l'19 d'Octobre 2002

 

Ch'èst un pliaisi, comme trejous, pour mé Clifford Laisney d'vos presenter tchiques patholes dans ma premier langue, aniet Samedi l'19 d'Octobre 2002. Ch'ést incriyablye que nos v'la deja dans l'Autônme, auve pensées des prépathathions d'Noué dans neu s'm'naines d'ichin.

 

J'espethe qu'ou fites la prom'nade au Bureau d'Scrutin Mercredi passé en orde d'enregistrer vôt vouaix dans l'éléction d'Senateurs. La tchestion est, avous êlu les siez r'presentants tchi sonts vont travaillyi et prendre responsibilité d'nos d'gider sus l'bouon c'm'nin dans l'futûthe. J'avons tous ieu l'opportunité d'attendre les estrades ou'esq'ue les candidats onts harangi l's'assembliées en pleine air. J'attendit une telle sethée dans ma paraisse de St. Sauveu. Tuous les candidats 'taits si pleins d'promesses et avaits l'air de saver la solution a tuous les problemes t'ch'existe. Accordons, j'allons aver une assembliée d'érpresentants tchi sonts vonts resourdé toutes choses. Comme tchi que j'sommes chanceux. Comme le diton. 'Tchi vivtha, vetha'.

 

J'avons etout d's'élèctions pour Député d'paraisse. Acquo une fais j'allons etre inondées d'papiers singnifions l's'intentions et capabilitées des candidats. Et comme prinme j'avons même une election pour Connetablye a La Trin'té. Ch'est hardi important d'prendre avantage d'utiliser vôt vouaix et j'vos avise tous d'prendre l'opportunité d'pliaichi vôt croaix d'une manniethe democratique.

 

Le mot 'crouaix' m'fait penser a une p'tite histouaithe tchu lieu I'a bein d's'années. Ch'tait suivant l'otchupation quand j'travaillais auve mon pêthe sus la ferme au Marinel. Ch'tait la couteunme dans chés temps la d'payi une visite au boeu quand nou's avait une vaque chaude, pas comme aujourd'aniet quand toup est accomplyi a l'artificiel. Enfin, j'tais en route pour la ferme 'Le Catelet', a St. Jean tchi 'tait dans les mains de Moussieu Frank Lucas. En passant la ferme du 'Carrefour', auprés du chinm'tchiethe, j'entendaits un brit terriblye tchi v'nait de la direction des bâtisses d'la ferme. Ch'tait la saison d'la mat'tie d'patates, et ch'tait le fermi et sa missis tchi 'taits en dispute. En orde de prendre avantage du jour des f'nêtres du solyi, le bouon_homme 'tait d'l'idée d'arrangi les casses sus l'long, mais sa bouon_femme insister d'les pliaichi sus l'travers. Larguement conntinuit j'usqu'a l'temps qu'el domestique tout innocentement lus dit: 'Nayis pas d'brit, j'ai la solution, Pliaichis les en crouaix, comme ch'la ou sethez les deux satisfées'. Au meme temps, le maitre perdant son temperament l'attrapit par les épaules et l'flianchit a la route. J'vos laisse a d'viner l'resûltat d'l'argument.

 

En r'tournant au sujet d'élèctions. L'intèthet d's'élèctions a dinminnuer ne v'la plusieurs décades. En géneral un moyen d'envers trente du chent d'élècteurs prendes avantage de r'corder lus vouaix. Dans l'temps passé septante du chent authai 'tait erconnu un chiffre acceptablye. Malgre les cherges d'papiers livrées dans la poste exprinnons les manifestos des candidats, les assembliées d'paraisse, les candidats sus la television, rein a l'air de créer intêthet, sustout parmi la jeunesse. J'crai tch'il est temps d'ramn'er d'l'animation dans s'l'élèctions. Vos en souv'nous des temps quand les bandes musicales faisaits appathence, sustout dans les paraisses de compagne. Ch'tait l'parti tchi pouvait faithe le pus d'brit et en meme temps aninmer les voteurs de prendre intêthet et l's'encouothagi d'voter. J'me rappelle d'une instance dans la paraisse de St. Jean. J'travaillais pour un certain moussieu tchi 'tait candidat pour connétablye. Etant que j'aime le chant, i me d'm'andit de formé une bande musicale en orde de tachi d'aninmer du support.

 

J'en fits autant, et meme j'composi des chancons exprinnons les vertus du candidat. Pour tchinze jours devant l'jour de l'élèction j'traversimes la paraisse d'un but a l'autre jouants et chantons. J'perdi l'usage de ma vouaix pour tchinze jours suivant l'élèction, mais tout fini bein. J'gagnimes l'élèction pour connétablye. Assez sus l'sujet d'élèctions.

 

J'voudrais achteu vos faithe r'app'lé que l'Comité Sociale de L'Assembliée d'Jerriais vos invite tous d'lés supporté a une bordée d'niethe beurre tch'autha lieu Vendredi l'premi d'Novembre. La v'nue es 'Les Potirons a Ste Marie. I'a besoin de pleurs de pommes et d'raboteurs du bachin. Contactez Mme Margaret Perrée pour pus renseignements.

 

Nos priethes et pensées reste comme trejous auve les malades et les gens tchi lus trouve un mio suous l'temps.

 

De d'Guernesey ouaiq'ue qu'sommes a passer le weekend parmi nos couôsins, Veronica m'joint en vos souhaitons l'bonjour et une pliasante semaine.

 

A LA PRECHAINE.

 

Clifford Laisney