Lettre Jerriaise Samedi l'16 d'Avri 2005

 Lettre Jerriaise Samedi l'16 d'Avri 2005.

 

Couomme d'amors, ch'est un pliaisi pour mé, Clifford Laisney d'vos addrechi aniet l16 d'Avri 2005 auve mes pensées sus l's'evenements des dreines semaines.

 

Quouaiq'u nous s'i'attendait, suivant les bull'tins sus l'radio, la television et les gazettes, ch'tait quand meme auve sympâthie que j'entendimes les nouvelles du 2 d'Avri announcant que l'Pape Jean Paul IIième avait trépasser a l'éternité.

 

Né dans son pays d'Polande, i 'tait hardi respecté d'son peuplye, et l'examplye tch'il a exprinmer au monde sans r'gard de religion, vivra couomme testament a son couôthage et sincerité pour bein des décades a l'av'nin.

 

Nou n'peut selon felicité l'eglyise de Rome et l'Gouvernment pour lus expertise d'organisé les arrangements nécessaithe pour la suth'té et l'soignage des foules tchi descendites sus l'Vatican et L'capita Rome duthant les jours menant a l'enterrement. Ch'tait vraiment touchant etou d'vaie Rouais, Présidents, Princes et Membres du Publique s'entre offrant la main en acte de paix duthant l'service.

 

La mannièthe d'élithe un nouvieau pape a appathence assez complyitchi, Le Candidat chouaisi est élu par les Cardinales tchi prendes sêgret, et ch'est seulement quand la fumée blianche sort de la chim'née d'la chapelle, que l'announce s'appathe qu'un Pape a 'tait élu. Ch'est bein assuther qu'el rempliachant de Jean Paul IIième autha une acte forte a suivre.

 

Auprés bein d's'années d'déchiffrement envers la legalité d'lus mathié, le Prince Charles et sa pretendue Camilla, onts finnalement atint l'nœud. Ayant demint le noeuces d'un jour cause de l'enterrement du Pape, la céremonie eut lieu Samedi passé dans le r'griste civil a Windsor. Suivant l'mathiage, l'Archevèque de Canterbory condit un service de priethes et dedication dans la Chappelle de St George. Une congregation de huit chents 'taits en attendance, et a l'invitation de la Reine, les invitées lus assemblites a un buffet royale, auprés tchi les nouvieaux mathiés embèrtchites sus lus leune de myi en Ecosse.

 

I'a une certaine contreverse parmi l'peuplye envers la position du Prince d'éthiter la succession d'la trone suivant sa methe, et j'sis certain quels officiels responsablye lus gratt'tons la tête plusieurs fais devant arrivé a lus decision. Dans l'entretemps, j'souhaitons le Prince et sa Princesse toute jouaie et bouonheu.

 

Pour bouonne mésuthe, la s'm'naine passée a etout veu le lanchement des manifestes des differents parties en prépathation des elections tch'ethonts lieu le 5 de Mai. Pour les prechaines trais s'm'naines, la television, le radio et les gazettes sonts vonts etre remplyie d'correspondence envers les differents candidats tch'aspithe élection. Couomme tchi qu'la mode d'obtenin les vouaix onts changi dernierement. Chais par helicopteu que les chefs des parties traverse un but du pays a l'autre. Chaque parti est si certain que sa manniethe de gouverné est correcte. J'lus souhaittons tous bouonne chances dans lus effort d'aspither au numero 10. Mais a la fin du compte, ch'est l'pus fort de la pouque tchi gagn'tha.

 

Sus la tchêstchion d'élections, les affaithes c'mmenchent a s'ecauffer ichin dans p'tit Jerri. Le s'm'naine passée j'avons veu le lanchement d'un parti politique. I'n i'a pas d'doubte que j'verrons des changements quand veind'ra l's'elections a la fin d'l'année. Le tempéthement d'politiques a changii ches dreines s'années, pour meuilleu ou autrement. Etant d'la vieille ecole auve pensées penchant vers conservateu, je réserve m'en opinion envers chés passagiers de niet. Onts ti vraiment la solution.

 

Nos v'la deja arrivées a la mié Avri, tout a appathence de prendre nouvelle vie. Les herbages erverdissent, les oiseaux nos revillye bouonne heuthe le matin, et l'temps s'ecauffe. Puis-que nous etout, et sustout les malades et les gens tchi lus trouves un mio suous l'temps, peuvent rejoui d'la saison et d'sés bénedictions.

 

Ayiz tous une bouonne semaine.

A LA PRECHAINE.

 

Clifford Laisney