Lettre Jerriaise Samdi l'18 de Mars 2006

 Lettre Jerriaise Samdi l'18 de Mars 2006.

 

 

Couomme d'habitude, ch'est un pliaisi pour mé, Clifford Laisney de vos présenté une p'tite histoûaithe dans man premié langue, aniet Samedi l'18 de Mars 2006. J'dit couomme d'habitude, pac_que ayant garder compte de chaque preséntation qu'j'ai contribuer avaut l's'années sus Radio Jerri j'vai qu'aniet est la septentième episode de mes discours.

 

J'mande apologie és gens tch'inne sonts pas trop au couôthant d'la férmethie, car aniet j'voudrais ertag'gi la couoteunme du fermage jusqu' au d'vant d'la dertnier dgerre, les temps d'ma jeunesse.

 

Ch'est m'n'intention d'écrithe une histouaithe en deux episodes, la férmethie agricole, et l'férmage de bêtes. Aniet j'allons concentrer nos idées sus l'coté l'agricultuthe. Les ôtis nécessaithe ne'taits pas si nombreux et complyitchis couomme aujourd'aniet. J'authait 'tait nécessaithe d'avait un ch'va bouon d'collyi, une vainne, hernais et un trac'teu, grande tchêthue, et ésselet, tchêthue a brisi, griffon, hèrches, traits et bat'tchus, rouôleux, chievièthe, chievièthe a bras, tchêthue et griffon a patates, un suit d'trais hoûettes, hoûette a bras, vaporisateurs pour les patates, bêcques, frouques, grapins, hoûettes, frouques a vraic pour les vraitcheurs, panniers a patates, faucillyes, faux, bringe a caillas, etc etc.

 

La majorité d'fermiers engagais un domestique pour aidgi l'travas. Lus domicile n'etait pas trejous le pus moderne, souvent le solyi servait d'chambre. J'sis seux qu'les autoritées d'aniet authaits tchique_chose a dithe envers lus conditions de d'meuthe, mais tandis tch'ils avaits une barrique de bouon cidre et tchique herpins dans la pouchette, ch'tait satisfaction.

 

A m'seûthe qu'els efants tchittaits d'l'école, la majorité filles et garcons restaits sus la ferme, les filles aid'gais dans la maison et les garcons sus la ferme. Y'n y'avait pas telle choses que d'gages, l'idée d'aidgi, etre habillyi, et p'tetre une montre si ch'tait une bouonne saison donner satisfaction.

 

Ayant chiergi les clios et coppé les herbages de fossé dûthant l'Autonme, la saison d'la toun'nie c'mmenchait au mais d'Janvi. Premièrement, fallait ouvri les raies, que s'fuse a deuch'té ou Fété. Fallait l'énergie, pour poudrer les raies, sustout quand ch'tait un betchet d'crûethe tchi s'n'allait etre rompu.

 

L'avanchement du tracteu pour tou'nné 'tait un grand changement du férmage. Le tracteu et grande tchêthue a t'nin, auve un homme a chaque but du clios a fouit l'pitchage et rabbilyi 'tait un grand avanchement du temps d'la tchêthue a siez ch'vaux. Un coup l'clios toun'né, fallait foui les carres, coppé l'pid du fossé et bein remplyi les raies, pas une bett'chie d'terre 'tait perdue. Hélas, si nos anchêtres viyez l'travas du jour d'aniet. Si ch'tait l'intention d'plianter des patates, le guaino 'tait mins en pliaiche auve le ch'va et hernais et s'mé a la main. Le tracteu auve griffon et hèrches authait prépather l'betchet en long et travers.

 

Le jour de plian'ntie authait veu préferablyement chinq plianteurs, normallent femmes du vaisiné, a suivre le tchêthue. Un coup les patates en pliaiche, le bidet tch'avait 'tait bein soigni d'fain et d'avaine, c'mmenchait sa tâche a bouon pas. Ch'tait un jour satisfant d'plianter chinq vregies. Quatre ou chinq s'maines pus tard, dependant sus l'temps, nou s'authait auve l'aidge du ch'va, griffoner les patates, ran par ran, une tache enn'yante, assez pour s'endormyi, sustout si le sethée de d'vant avait 'tait tard. Suivant la griffon'thie, fallait érpasser tout en ordre de remouer l'haut du ran et d'en l'ver l'jeune pepin d'sèrcl'ye, et dérnierement, auve le ch'va , fallait bantchi auve les trais hoûettes. Une p'tite priethe de'capper une nêthe gelée n'etait pas trejous er'chue auve une reponse positif.

 

La main d'ouvre pour la défouithie v'n'ait en géneral du coté d'la Bretagne et tchiq'suns d'Irelande. Les seules ôtis nécessaithe pour la foutt'hie 'taits un couplye d'panniers, une bouonne frouque jerriaise, et du bouon cidre. Une bouonne frouque compliete pouvait defoui envers 25 a 30 pêrques dans sa journée. Devant l'arrivée du 'lorry', le ch'va 'tait la môde de transporter les patates au 'bridge'. Les bathis d'quat cabots bein remplyies présentées un bieau spectaclye. Ayant fait les caltchûles, malgré tout l'travas, ch'tait pas trejous une année profitablye, et l'temps jus'qua la prechaine saison pover présenter bein des mal de la tête.

 

La saison finnie, i 'tait temps d'en smenchi le deuxième recolte pour le bestchias, consistant, d'raves, navaits, et normallment un betchet d'nouvelle herbe. La saison du fronment au mais d'Aout/Septembre 'tait étout une tache tchi d'mandait d'la main d'oueuvre. Suivant la sciéthie d'l'avout, la dgerberie, et les longues rangies d'binots, v'nait l'temps d'la batt'tie. Chez ichin l'temps quand les fermiers lus entre aid'gais a ercolter la moisson. Ch'tait un temps d'camarderie entre vaisins, et l'jour se finnisait trejous auve un bouon r'pas prépather dans l'grand fou. J'vai acquo l'jigot d'lard, les patates rôtis, bouonne ledgumes d'la ferme, paté d'pomme, et bein seux du bouon cidre. Ah, si nou pourrait értagi l'hoûlouge a chez bouons temps.

 

Le mais d'Octobre 'tait la saison d'la matt'tie d'patates, et une personne tchi pouvait accomplyi ses chent cassées dans son jour avait fait une bouonne journée.

 

Nos v'la arrivées vers la fin d'l'année d'travas, et j'compte que mon temps d'ércordage est echu étout., et d'même jusq'ua la prechaine episode, j'vos souhaite a tous, bounne santé, et jouaie.

 

    Ayiz tous une bouonne semaine.

 

            A BÊTOT.

 

Clifford Laisney