1961: Ph'lip et l's Etats

 Ph'lip et l's Etats

Ils ont la tête cratchie!  

 

À Portinfé,

Saint Ou,

Jeudi au Sé

 

Moussieu l'Editeu,

 

Comme ou pouvez craithe, du temps tchi faisait, je n'fus pas au “show” d'l'Ile à Springfield hier, mais dans l'arlévée yun d'ides viers amins vînt bèthe du tais, et m'racontit chein tchi s'etait arrivé. J'avais prédit la s'maine pâssée que l'championnat des vaques ne s'sait pas gâgni par une jeune vaque ou même par yunne des vielles, mais par une g'niche r'nouvlée du Ouest, et ch'fut d'même, comme, sans doute, ous avez veu par la gâzette.

 

À cause du temps un nombre dé bouonnes bêtes que nou-s-avait veu dans les pâraisses ne dèshallitent pas d'l'êtablye, et i' n'y avait pas la compétition que nou-s-ethait veu si y'avait yeu du bieau solé. Mais avec chonna, il éthait fallu tchiquechose d'extra pour battre la g'niche r'nouv'lée que l'Francis Le Ruez montrit. Je n'm'en vais pas dithe que j'n'avons jamais veu miyeu, car ch'n'est pas la preunmiée fais que l'championnat a 'té gâgni par une bête de ch't'âge-lá, et je n'doute pas que l'Francis a ouï pâslé de yunne montrée par le bouonhomme Frainque Le Brô, et d'une autre au Sieur Billot, d'Saint Martin, tchi remportîtent lé grand prix. Ch'est dommage que nou n'peut pas vaie chais trais-là ensemblyes, mais y'a longtemps que les deux que j'ai mentionnés sont à lus r'pôser dans l'royaume des taupes. Quant au temps, j'me r'souveins d'aver 'té trempé jusque'â la pé pûs d'une fais, et p't'être la plièthe occasion 'tait à un “show” des Trais Pâraisses siez l'Sieur Ecobichon, à Saint Pierre, quand sûs la fîn, i' n'y avait qu'les deux Juges et mé tchi 'taient d'hors. Et pûa d'une fals étout j'ai yeu de bein rude temps a Saint Martin. Mais ch'tait ma djobbe d'être ta et j'n'avais jamais mantchi d'vant ch't'année.

 

Changement d'sujet, la Merrienne, ayant liut la gâzette à ces sé est convaintchue de deux choses - que l's Etats ont complietement perdu la tête, et que ch'n'est pas yeux tchi gouvernent l'Ile à ch'teu mais l'Comité du Tourisme. Et ou s'est minse à pâsler des vièrs temps, et ichin j'ai yeu tchiques mots a dithe.

 

“Il est vrai, Merrienne,” je qu'menchis, “que dans chais temps-là Jêrri n'tait pas parfait, mais sûs l'principe que chein qu'nou n'a jamais yeu nou n'a jamais mantchi, j'tiomes bein pûs heutheux et pûs contents que les gens d'agniet. J'n'avions ni radio ni télévision, ni autos et bein d'autres choses, mais nou s'en pâssait. Quand nou n'avait pas d'vétuthe, nou-s-allait à pid. Quand vint un temps, la haute bicyclette fut inventée et, un jour, quand j'd'vallais lé Mont Rossignô, en d'sous d'la ferme au Sieur Avri, la fichue machine qua j'avais empruntés l'vit l'drièthe et m'fliantchit sûs ma tête, de tchi que j'en eus pour un mais au liet ! Et quand y'avait d'la né sûs la têrre, nou d'vallait les côtils à grande vitesse sûs une espèce de p'tite pliat-forme en bouais. Nou tchulbuttait dé temps en temps, mais nou n'se faisait pas grand mâ, et au mains nou s'gardait caud. Dans les routes y'avait d'la pierre câssée à bein des bords, mais nou-s-allait pûs douochement, et nou-s-arrivait là quand-même. Un bouon bidet vos ram'né au raide trot, et si par chance i' vos arrivait tchique accident, nou n'craignait pas d'vaie un 'policeman' là tout-d'suite pour vos entrainer à la stâtion et vos faithe examiner pour être seux qu'ou n'aviez pas bu un p'tit vêrre dé trop.”

 

“Et,” ou s'fit, “i' n'y avait pas tchestchion d'un tunnel souos l'Fort et d'autres grands travaux à un couôtage si immense que nou n'aime pas à y penser, Peux-tu m'dithe ouesque i' s'en vont trouver les sous?”

 

“Dans mon temps,” j'li dis, “un propriétaithe tch'avait yeu yunne ou deux mauvaises saisons, et tchi voulait emprunté tchiques sous pour sé haller d'embarras, pouvait, sans autchune diffitchulté, les trouver à trais du chent, mais ch'n'est pas d'même à ch'teu, et l's Etats éthont à péyi au mains sept ou huit s'i' veulent emprunter et l'intéthet n'se trouv'tha pas facilement. Mais l's Etats n'se fichent pas mal de chonna, et chein que j'trouve bein drôle ch'est que pas un seul membre de Campagne a voté contre. I' semblye qu'au moment i' sont paralysés. Et n'peuvent même pas vaie jusqu'au but d'lus nez. Mais après tout, Merrienne, ch'est pûs qu'pôssiblye que j'sommes a nos gêner sans cause."

 

“Et tchèsque tu veu dithe par chonna?” ou d'mandit.

 

“Chein que j'veur dithe”, j'li raîponnis, “ch'est que yun d'chais bieaux jours la Russie pouôrrait dêtruithe la maintchi du monde dans tchiques minutes avec yunne de chais bombes. Il est vrai que l'Améthique raîpondrait d'la même fachon immédiatement et dêtruithait la maintchi d'la Russie, mais i' n'y a autchune doute que chu Krushchev est fô et jamais nou n'peut dithe chein qu'un patheil monstre pouôrrait faithe. Quant à mé, je n'crais pas que l'Bouon Dieu permettra la destruction tchi pouôrrait tchais sûs l'monde dans tchiques instants, et ch'est sûs Li tchi faut s'fier. I' nos sauvit dé Hitler. Et I' n'a jamais permînt à un seul homme de dominer l'monde. Ch'est pourtchi, ma vielle, i' n'y a qu'une chose à faithe, et ch'est d'vivre en espéthance, comme té et mé, j'avons tréjous fait”.

 

“Amen et ocquo Amen à chonna, man Ph'lip,” ou dit. “A ch'teu, peux-tu m'explitchi chein qu'chu rapport Barrett veur dithe?”

 

“Pas trop cliéthement, Merrienne, mais chein que j'envisage ch'est que dans les préchains d'jais ans Jêrri s'en va tant changi que nou n'la r'connaîtra pas. Y'etha d'neuves maisons dans toutes les parties d'l'Ile, mais surtout en Ville ouèsqu'i' même pâslent de prêserver la Rue d'Driéthe pour les piêtons. Pour le moment, i' n'y a pas d'tchestchion de réduithe lé trafic jusqu'à chein au la neuve route s'sait finie. Si ch'tait me j'ne f'thais rein du tout, car je n'peux pas vaie tchi f'thait grand ma à autchune personne d'aver un mio d'délai, en crouaisant la Ville. Les gens sont trop prêssis d'nos jours, et chonna lûs donn'nait l'temps de penser à tout l'ma tch'ils ont fait dans l'couothant d'lûs vie, et de promettre de l'amendement à l'av'nin. Tchêsque tu'en crais de ch't'idée-là, bouonnefemme?”

 

“Pas grand'chose,” ou raîponnit. “Les gens tchi voudraient se r'penti le f'thaient mûs à l'églyise ou la chapelle que dans l'mitan de la Rue d'Driéthe. Ocquo mûs, siez-yeux à g'nors supi d'lûs liet, mais chonna ch'est une bouonne vielle habitude que prèsque tout l'monde ont abandonné.

 

“Véthe,” ou finit, “même un bouon St. Ouënnais que j'connais est si lassé tchi ronflye dêjà en ramontant les d'grès!”

 

Ph'lip.