1949: Ph'lip Digs His Early Patch

 Ph'lip Digs His Early Patch

 

Moussieu l'Editeu,

 

J'ai tchiquechose à vos raconté, et y faut que j'vos diche que je n's'y pas content. Ecoutez que j'vos explique.

 

En drièthe d'la maison y'a un bétchet d'un doûzaine de pérques que j'avais plianté en patates de bouonne heuthe.

 

Ach'teu y s'adonnit qu'Lundi au sé, la Merrienne, tch'avait tait l'vais, chu bétchet, et tch'avait digoté ichin et là, m'dit en soupant qu'les patates taient bouonnes à fouï. "Y n'faut pas s'attendre tchi f'thont pûs d'un chent la pérque," ou dit, "mais au prix tchi sont y paiethont."

 

"Y n'sont pas à maintchi v'nus," j'l'y dit. "Y lûs faut ocquo tchinze jours au tout mains. Si seulement nou pouvait avé yeu une bouonne achie, mais y n'en est pas v'nu, et n'y'étha pas d'grôsseur."

 

"Tchèsque chonna fait?" ou dit. "Les marchands en ont besoin, et y n'sont pas partitchuliers. Y n'dithont rain quand y'éthait tchiques moyennes parmi les grôsses, et même deus-trais p'tites. Avec chonna j'en veur un fricot, car j's'y lâssée des vieilles patates."

 

Et don, Merrienne, j'nos y mîmes Mêcredi matin, et Jeudi me v'la hors ôv ma chérge. Je n's'y pas pûs menteux qu'chonna, et je n'm'en vais pas vos dithe tchi n'taient pas un mio mêlées, mes patates, car la Merrienne, tch'avait aidgi à gliénné, n'avait pas tait trop r'gardante.

 

"Si l'Inspecteur trouve à r'dithe," ou s'fit, "dis-l'y que j'sommes de pouôres gens, et paie-l'y un vêrre de bièthe.!

 

"L's'Inspecteurs ne sont pas des gâs d'même," j'l'y dit, "et tu dév'thais avé honte de pâslé comme chonna. Ch'est d's'honnêtes gens, et si j'avais l'toupé d'faithe ditet, je m'trouv'thais bétôt en embarras." Et me v'la hors au bridge.

 

En arrivant là j'vendit sûs coup à un marchand tch'y m'avait vendu du gouâino à credit au mais d'Novembre. Mais quand l'Inspecteur montit sûs la reux, et s'mint a pôtchi les patates j'vit tout-d'suite que j'n'en n'tais pas tchitte.

 

"Maître Ph'lip," y m'dit, après tchqiues minutes, "avous pas chance un p'tit-fils tch'a une êlîngue?"

 

"Pûs qu'probablye," j'raîponnit, "mais pourtchi qu'ou voulez savé?"

 

Y m'montrit une doûzaine de patates, grôsses comme des codrettes, tch'il avait trouvé dans yun des bathis. "Parsque y semblye que ne v'chin tchiquechose tch'y pouôrrait trouvé utile," y m'dit.

 

Mais ch'est un bouan garçon, ch't'Inspecteur-là, et après tch'il en avait hallée un d'mié-cabot ou d'même, y laissit man viage passé. Et j'rapportit les codrettes pour le fricot à la Merrienne.

 

Ph'lip

1949