1949: Merrienne makes a prediction

 Merrienne makes a prediction

Too many visits to London

 

Moussieu l' Editeu

 

L'autre sé, étant assis la Merrienne et mé aupi du feu pour nos gardé cauds, car y faisait une fraid d'tchan en d'hors, ou m'dit comme chonna:

 

“Y'a une chose que je n'comprends pas, Ph'lip. Pourtchi qu'nos grands mêssieux sont tréjous hors en Angliéterre? Y m'semblye que toutes les fais qu'j'ouvre la gâzette, y'a la nouvelle qu'une députation est horte ou s'en va à Londres pour consulté tchique Ministèthe.

 

“Le Baillyi en est prèsque tréjous yun, et j'crai ben qu'à maintchi du temps il aim'thait ben mûs être siez-l'y; epis y'a l'Senateur Edwards, et l'Ph'lip Le Feuvre, et chu gros Député Krichefski, et j'viyons mème que chutte semaine le Connêtablye de Saint-Pierre en faisait yun. Y faut t'ch'il aie du couothage a s'n'âge de ristchi sa vie dans chais machines-là.”

 

“Oh, ne t'gène pas,” j'l'y dit. “Il est comme touos l's'autres, ben asseuthé.”

 

“Vèthe,” ou dit, “mais v'la tchi n'l'y vaudra pas grand'-chose quand y s'sa au fond d'la mé, avec les baleines et l's'autres grands paissons à l'y catouollyi l's'ortets. Mais ch'n'est pas là l'affaithe. A m'n'idée ils y vont ben trop souvent à Londres, nos mêssieux. Ch'tait pas d'même dans les viers temps, pourtchi ach'teu? A qu'menchi, tchès-que-y paie pour tout chonna?”

 

“Té et mé,” j'l'y raiponnit, “ch'est à dithe le publyic.”

 

“Mais y dait en couôté!”

 

“Ben seux qu'il en couôte,” j'l'y dit, “mais l's'Etats ont tout plein d'sous, et ch'n'est pas gènant. Tchiques chens louis d'pûs ou main n'font autchune difféthence quand la bourse est tréjous pliène.”

 

“Nan,” ou dit, “mais dans man temps j'ai connu des gens tch'avaient tant sous tch'y n'savaient pas tchi en faithe, mais tch'y s'trouvaient souos l'fou à la fin. Mais enfin, ch'n'est pas chonna. Y'a tchiquechose de ben pûs sérieux.

 

“Et tchèsque ch'est?

 

“Ch'est chonnechin. Aut'fais nous enviyait une deputation à Londres quand il tait tchéstchon de d'fendre nos drouaits. Si l'Gouvernement voulait s'mêlé dans l's'affaithes tchi n'le concernait pas, nous allait l'y dithe tout net et carré de taithe sa bèque et d'allé s'faithe quatorze. Mais d'nos jours y m'semblye que l's'Etats n'ont autchune confiance en yeux-mêmes, et qu'toutes les fais qu'tchique p'tite diffitchulté s'souôleve, y faut tout-d'suite allé à Londres pour d's'avis et des conseils.

 

“En faisant chonna,” ou continuit, “j'admettons que je n'sommes pûs capablyes de nos gouverné, et yun d'chais jours, crai-le ou non, j'allons nos trouvé en embarras.”

 

“Dans tchi sens?” j'l'y d'mandit.

 

“Dans chu sens ichin. Tchique biau jour y nos veindra une lettre du Gouvernement nos disant tch'y vaient ben tchi faut tch'y veinnent à notre aide, et nos informant, qu'à cause de chonna ils ont décidé qu'à l'av'nin je f'thons partie d'l'Angliéterre.

 

“Chonna, Merrienne, ch'est du gniolin,” j'l'y dit.

 

“Eh ben,” ou dit, “tu me r'dithas. Mais je n'crai pas qu'i'ai ocquo perdu la tête. Ramâsse une pal'tee d'cherbon et digote chu feu-là. J'ai les pids g'lés.”

 

Ph'lip

1949