Les Neûches d'Or à Ph'lip et Mèrgot

 Lettre Jerriaise Samedi l'13 d'Août 2005.

Les Neûches d'Or à Ph'lip et Mèrgot.

 

Couomme d'habitude ch'est un pliaisi pour mé Clifford Laisney, d'vos addrechi, et aniet j'voudrais vous raconter une sornette que j'avaits écrit depis tchique années. Ou s'appelle, 'LES NEUCHES D'OR A PH'LIP ET MERGOT'.

 

Samedi l'14 de Fevri 1948 (jour de St Valentin) fut l'occasion des neûches de nos grands anmins Ph'lip et Mèrgot Hacou, et d'même suivants chinquante années de revers d'la vie, ch'tait auve grand pliaisi que j'les joignimes dans les célebrations d'lûs neûches d'or.

 

Le Ph'lip n'est pas la sorte de gas tch'organise les choses a miè-m'suthe, et d'même il avait chouaisi seulement l'meilleu pour sa Mèrgot, La Grand Hotel a West Park. Les invitations avaits 'tait postées au mins siez s'm'naines d'avanche, le menu avait 'tait bein considethé, et ils avaient decider que chinquante années d'mathiage et d'heutheusté auve sa Mèrgot methitait une celebration de grande manniethe.

 

En arrivons a l'hotel, les garcons d'service offraits des raffraichements, une chose bein acceptablye etant qu'el temps avait touonner gentiment fraid. Ayant cirtchuler et souhaiter l'bouon jour a hardi d'gens que j'n'avaimes pas rencontrer pour une pose, l'announce fut faite tch'il 'tait l'temps d'assiethe, et auprés avait prins note des arrangemens d'tablye, j'en fimes autant.

 

Y'avait envithons une chentaine d'invitées, et apart de la fanmillye immediate de Ph'lip et Mergot, la majorité d'gens 'taits d'une certaine age de maturité. Assis a la tablye d'haut, nos hôtes att'lées dans lus belles finesse du Dinmanche, avaits l'air bein heûtheux, et auprés qu'el frèthe a Mèrgot, tch'avait 'tait l'garcon d'honneu a lus neûches, avait offri la priethe d'èrmerciéments, les garcons d'service arrivites en facon réginmentaithe et c'mmenchites a servi l's'entrées. Si l's'entrées 'taits une indication de ch'la tchi suivait, j'vos garantie que j'fumes pas d'ssapointées. Le r'pas 'tait par excellence, rein n'mantchait, et l'gerant d'l'hotel methitait nos r'mèrciments.

 

Am'sûthe qu'el r'pas s'avanchait, le catchet dev'nait pus fort, pa-ce-que auprés deux heuthes a tablye et plusieurs verrées d'bouôn vin, les gens c'mmenchaits a lus exprinmer auve une certaine redgeu.

 

Le temps arrivit pour le premier discours de la sethée, et auprés que j'avaimes 'tait servis d'gâche et d'champagne, Henri Vautchi, maitre d'cèremonie, introduit l'Député Lesbithé.

 

I c'mmenchit par nos raconter couomme tchi qu'les affaithes avaits changi a compathaitre d'l'année 1948 quand Ph'lip et Mèrgot decidites d'attatchi l'nœud d'amour. Pour plusieurs années suivant la dgerre ch'tait acquo difficile d'ob'tenin autchûnne chose de qualité, et l'argent n'sortait pas d'nos ouotheilles couomme ia des gens tchi voulaits nos faithe comprendre achteu. Le Député n'est pas driethe la porte quand l'occasion s'presente d'recité d'la bandinn-thie, et auprés aver ieu s'n'audience en ecliats d'rithie, le temps vint pour èrmercié nos hôtes pour toute lus hospitalité, et d'lus souhaiter la bouonne chance et bouonne santé dans l's'années a v'nin, une chose que j'accordimes en l'vant l'verre et offrants nos felicitations.

 

Ach'teu ch'tait l'tou a Ph'lip de repondre, et i c'mmenchit par exprinmer ses r'mèrciments au Député pour tuous les bieaux bieaux tch'il avait dit concernant Mèrgot et d'li-même. Etant un vier compagnard de L'Eta, Ph'lip authait 'tait pus a s'n'aise d'addréchi ses anmins en jerriais, mais l'occasion n'permetter pas, et d'même i fits d'son mus en angliais.

 

I nos raconti les diffichultées d'lus premiers années d'mathiage. I printes une petite ferme dans l'Fond d'L'Eta, une ferme peniblye mais assez heûthive, les cotils etants tous tchultivées a la main, pas couomme aujourd'aniet quand la belle partie d'cotils sonts laissis a petre es coûcous.

 

Grâce a Mèrgot tch'avait 'tait une bouonne menageiethe, ils avaits parvenu d'faithe succées d'lus travaux, et i 'taits ordgilleux d'avait él'vé trais efants. Ch'tait si pliaisablye d'avait une fanmillye si afféctionée, et ch'la lus donné grand pliaisi d'avait l'tou d'ieux etout lus quatre p'tits éfants a célebré lus neûches d'or.

 

Ph'lip fini son discours en r'merciant Dgieu pour toutes ses bountées, et d'lus aver accorder bouonne santé duthant lus vie ensemblye. I 'tait plein d'éloge pour sa Mèrgot, pour tout tch'oulle avait accomplyi et contribué envers le succées d'lus chinquante années d'jouaie.

 

Accompagnies d'la musique, Ph'lip et Mèrgot condites lus anmins dans la valse anniversaire et les pus actifs continnuites a danser jusqu'és p'tites heûthes du matin.

 

Auprés avait donner nos A Bêtots, je r'touonnimes a not siez nous lassées, mais rejouaissant d'aver passer une sethée memouaithablye.

 

A LA PRECHAINE, et mercie pour vot compagnie.

 

Clifford Laisney