1961: Chein Qu' Ph'lip Dit Des Etats

 Chein Qu' Ph'lip Dit Des Etats

Les candidats en Ville

 

à Portinfé, Saint Ou.

 

Moussieu l'Editeu,

 

La Merrienne ne s'trouve pas trop bein chais jours car oulle a attrapé une raide suée d'fraid, et ou dit que ch'est d'sa faute car, même dans la grande chaleu de la s'maine pâssée, ou n'éthait pas deu s'dêfaithe de yun de ses cotillons. Au moment oulle en a au mains quatre et p't'être même chinq, mais ou gronne lé long des jours, et n'me donne pas d'paix. Sans doute, le Bon Dieu avait dans l'idée quand I' donnit une femme au pouôre Adam qu'I faisait une bouanne chose mais ou qu'menchit par l'ruiner et li faithe la vie minséthablye. Parmi les d'scendants du couplye, y'a yeu des hardelles tchi n'valaient pas mus mème s'i' mettaient des cotillons au lieu de chein qu'Eve considéthait nécessaithe. Enfin, Moussieu, avec chonna nou n'voudrait pas s'en pâsser car i' peuvent tchiquefais vos donner hardi d'pliaisi.

 

Hier au sé sé trouvant un mio mûs après san tais, ou s'mint a pâsler d's Etats, et ou me d'mandit si j'criyais que tout îthait bein à ch'teu parmi les membres tch'avaient yeu chutte grande dispute la s'maine pâssée, "car" oulle ajouôtit, ""la Post" pathait aver acouo des doutanches."

 

"Et," j'li dis, "avec raison, car quant à mé jamais je n'craithai que l'Cyril Le Merquand et l'Sénateur Krichefski r'veindront bouons amîns après chein tchi s'est pâssé. Le gros Senateur est bein lien d'être satisfait d'la décision la s'maine pâssée, et i' n'est pas un homme pour oublier autchune personne tchi ly'a fait tort".

 

"Mais" ou s'fit, "j'ai tâchi d'comprendre tchèsqu'en fut la fin de chutte longue distchussion, mais j'n'y comprends rein. Peux-tu m'en dithe pûs long, Ph'lip?"

 

"Pas hardi," j'li raiponnis, "mais i' pathait qu'les Sénateurs Cyril Le Merquand et Rumfitt fîtent une manièthe d'apologie, et qu'à la fin de l'arlévée rein n'fut changi. Mais si je n'me trompe pas, la fanmeuse députâtion tchi 'tait pour aller à Londres n'existe pûs et tout ch'qui résulte dé tout chu train ch'est que deux membres tch'avaient 'té grands amins pour des années sont à ch'teu comme cat et tchian et nou crains pour de bon."

 

"Mais" ou dit, "lé Cyril garde san poste comme Président des Finances?"

 

"Véthe," j'li dis, "car autrement i' n'y a autchune doute que l'Senateur Krichefski l'éthait rempliéchi, et j'si pérsuadé que la majorité des membres n'voulaient pas chonna."

 

"Nan," ou s'accordit, "mais à ch'teu Ph'lip, i' pathait que j'allons bétôt perdre notre présent Bailli. Tchèsqu'i' s'en va l'rempliéchi?"

 

"Sans autchune doute," j'li dis, "si l'Sieur Harrison ne peut pas, j'éthons lé Sieur L'Mâsuthi avec le Sieur Ereaut comme Prochuleux et p't'etre lé Peter Crill Avocat-General s'i' veur la djobbe."

 

"Ch'est à li d'saver," ou dit, "mais il est temps d'dithe un mot ou deux au sujet dé chein tchi s'est arrivé sûs les cauchies. Si les fichus dockeurs n'veulent pas mettre les tomates à bord i' pouôrrithont sûs les pliantes. Ch'est honteux, tu sais Ph'ip. Est-che qué n'y a rein à faithe?"

 

"Oui Marrienne," j'il dis, "si j'en avais l'pouvé comme j'en ai la volonté y'a un certain individu tchi s'trouv'thait bétôt au fond d'la cauchie avec une bouonne grôsse pierre autou du co. Quant ès hommes i' sont comme un un fliantchet d'brébis. Nou dev'thait les envier an Russie, un pays tchi sais tchi faithe avec des hommes tchi n'veulent pas travaillyi. I' n'y a pas "strikes" là pour une bouonne raison."

 

"Pâslant d'la Russie" ou dit, "crais-tu que j'sommes en dangi d'une autre grande dguêrre? J'ai d'la peine à dormi quand j'y pense, car chutte fais nou n'éthait pas l'temps d'dithe ses priéthes, ou même de s'habillyi dans san dinmanche si yunne de chein bombes tchiyait sus l'Ile. Nou pâsle tchiquefais d'la fin du monde, mais oulle est p't'être pûs près que nou n'craie."

 

"Nennin, Marrienne," j'li dis, "je n'crais pas que y'etha d'la dguêrre, car les grôsses têtes d'la Russie savent bein tchèsqu'i' lûs arriv'thait, épis bein vite, s'ou laissait couôre la preumié bombe. Si l'Sieur Kruschev était seux d'gagni, il éthait qu'menchi y'a longtemps, car si Hitler n'avait pas hardi d'respect pour la vie humaine, ch't'ichin en a ocquo mains. Heutheusement lé Ouest est prépathé chutte fais, pas comme en quatorze et en trente-neuf quand, pour un temps l'Angliétêrre n'avait autchun aide. I' n'faut pas s'gêner, Merienne, car la Providence nos supportétha comme oulle a fait dans l'pâsse."

 

"Ch'est un grand confort de saver chonna," ou dit, "A ch'teu j'pouôrrai m'endormi sans crainte."

 

La préchaine chose que la bouonnefemme voulit distchuter ch'tait chein qu'la "Post" dit au sujet d'l'êlection dans p'tit d'temps pour Connêtablye d'la Ville. "I' pathait," ou s'fit, "que nou pouôrrait vais quatre candidats. Et tchèsqu'i' nos a dit que l'Sieur Pôdêtre ne r'prendra pas?"

 

"Quant à li Merrienne," j'li dis, "je n'sais pas, mais quant au restant i' pouôrrait y'aver deux candidats ou même trais. Lé John Richardson, lé Sieur Ryan, et l'Député Bathette éthaient tous du support, mais je n'peut pas craithe que l'ex Député Crenshaw est serieux. Ch'est un charmant corps mais i' i' m'semblye tch'il a assez à faithe chais jours sans s'mêler dans la politique."

 

"Et des autres," ou d'mandit, "tchèsqu'a la miyeu chance à t'n idée?"

 

"J'n'ai pas d'vouaix en Ville," j'li dis "et j'n'ai pour dithe autchune connaissance de chein tchi s'pâsse là chais jours. Au samedi tchiquefais j'rencontre des gens tchi d'meuthent dans la pâraisse et j'espèthe que la s'maine tchi veint je s'sais pus à même de former une opinion. Si j'tais forchi d'chouaisi à ch'teu j'métt'rais mes sous sus l'John Richardson mais sans m'faithe trop seux que je m'en allais pas être hors de pouchette. A ch'teu, Merrienne, j'en avons dit présque assez pour chutte sémaine. Nou pouôrrait mangi une bouochie épis au liet."

 

"Et Moussieu, en soupant, j'paslimes pour tchiques minutes de chais fermiers tchi vendent lûs bestiaux et s'mettent à craitre des tomates et des brécolis. Le grand avantage, i' m'semblye, est qu'au dinmanche nou peut se r'poser mais avec chonna j'si comme bein d'autres tchi maintchennent qu'unne ferme  sans bestiaux n'est pas une ferme du tout. Tchèsqu'ouos en dites. Moussieu: les brécolis et les tomates sûs une ferme, valent-i mûs qu'les vaques tchi fournissent lé lait?"  

 

Ph'lip

1961