Lettre Jerriaise Samedi l'6 d'Novembre 2004

 Lettre Jerriaise     Samedi l'6 d'Novembre 2004.

 

Aniet Samedi l'6' d'Novembre 2004 et ch'èst auve plaisi que merv'ella Clifford Laisney a vos presenter tchiques p'tites histouaithes dans not ancienne langue Jerriaise.

 

Avous ieu l'tchoeu content de toute chutte ecliat'tie d'combat tchi acquo une fais a troublié la trantchil'té d'gens, sustout l's'anciens, tchians et ch'vaux ches dreines semaines? Tout chennechin pour rammemouaither un evenement tchu lieu dans l'année 1605, quand un epouvantail app'lé Guy Fawkes eprouvi auve poudre d'canon a faithe sauté le Parliament. Bein seux chés hardi excitant pour les mousses de vaie les feus d'artifice et d'vaie l'éffigie D'Guy Fawkes brulé sus la fouaie d'jouaie. Mais i'a trejous l'dangi d'accident sustout dans d's'evenements pas controllés. J'en sait pas si mes pathents 'taits considethées rabat d'jouaie, mais j'me r'souvins pas jamais d'aver ieu autchun feus d'artifices siez nous quand j'tais mousse. J'pense peut etre la raison 'tait tch'ils n'avaits pas les sous a 'fliamber' comme ils ont aujourd'aniet. Auprés quatre chents ans j'crait tch'il est temps d'mettre le Moussieu Guy Fawkes a l'histouaithe.

 

Ichin a not résidence a Oaklands i nos manque pas d'vaisins, actuellement i'a vingt huit apartments suous l'même lief et i'n faut p'tite extchuse en orde d'organisé un evenement, normallement un r'pas. Je sommes chanceux d'aver un salon communalle tch'assiet une chinquantaine de personnes, et j'sommes trejous assuthés d'une sethée auve bouon mangi. Hier, etant l'5 de Novembre, et etant qu'lés residents sonts passée les fouaies d'jouaie, j'decidimes d'organisé une sethée jerriaise. Le conmité fut enchergi d'fourni des pliats du temps passé. Y'avait d'la soupe d'angulle, et d'la soupe de legumes comme entrées suivit par fricot d'pais d'mai et jambon feunmé, casseroles de viandes auve carottes et vert pais, accompagni par pain d'caboche. Le d'ssert consisté d'podin d'pain, bourdelots, et paté d'pommes. Beinseux j'tait important d'l'aver tout chu fricot auve bev'thage jerriais, et tchi meilleu qu'une bouonne verrée d'cidre. Suivant le r'pas plusieurs des gens racontites des histouaithes de lus jeunesse, et j'vos assuthe tchi y'on avait capablyes de r'tououné l'houlouge bein des quartiers. Ah! Les bouons temps du passe.

 

Comme tchi qu'lés jours onts accourchi d'pis qu'l'heuthe fut changie samedi passé. Nos v'la arrivées presque dans l'fond d'hiver. Ch'est la saison des chataignes, et tcheque i'a meilleu d's'assiethe au d'vant d'un bieau feu auve la pele a tcherbon dans l'atre remplyie d'chataignes a roti…Paslant d'chataignes, la s´m´naine passée j'en ramassi, mais cause du vent ils onts tchaie trop vite, et d'même ch'n'est pas une saison d'marrôns. Quouaiq' mon sujet aniet a appathence d'etre centré sus l'mangi, une chose bein prés d'mon tchoeu, j'en peut pas laissi l'occasion s'passé sans refletchi sus l'superbe Bantchet d'Avout servi Vendredi passé dans la Salle de St Louaithains par le Conmité Sociale de l'Assembliée Jerriaise. Au d'ssus d'chent personnes s'mintes a tablye dans un environment decorer pour la saison d'avout. Le conmité avaits engagi des renforts de garcons et filles de service, et ch'tait vraiment un spectaclye de les vaie tous hasbillyis et servi comme professionels.

 

Auprés qu'la Presidente de l'Assembliée avait fait la beinv'nue, ou donnit la priethe de grâce. J'c'mmenchimes auve d'la bouonne soupe tch'avait l'gout d'r'vasi, suivit par un gigot d'poulet, purée d'patates, carottes et pais verts. Le d'ssert consisté d'paté d'pommes auve glâce. Tout chennechin arrosé auve bouon cidre et cafe. La qualité du mangi et service 'tait exceptionnel et authais mins bein des r'pas d'Tennerfest a l'ombre.

 

Suivant le r'pas j'fumes conviés auve recitations et chants, et toute l'assembliée joignites en chancons angliaiches et jerriaise, capablyement introduits par le President du Conmité Sociale. Une telle sethée n'est pas compliete sans une raffliethie, et au mins vingt personnes ertounnites a lus siex ieux bras chergies. I faut que j'felicite David et Ruth Perrée, les Presidents du Conmité pour aver organisé une raide bouonne sethée. Tandis q'j'avons de telles gens a la barre, l'Assembliée continnu'tha d'forche en forche.

 

Extchusée mé, mais auprés tout chu discours en tuours le mangi j'c'mmenche a avait l'fliâtchet, et i'a umne bouonne odeur tchi sort de la tchuisinne.

 

Mercie d'm'aver ecouté, et a tuous d'vous malade et un mio suous l'temps, j'vos envietchique mots d'encouragement en vos assuthant que chaque nuage a une erdoublyieuse argentée. Ayiz tous une bouonne semaine.

 

A la prechaine.

 

Clifford Laisney