1952: La S'maine Victor Hugo

 L'Assembliée D'Jèrriais.

La S'maine Victor Hugo.

 

I' s'adonnit bein qu'la rêunion mensuelle du mais d'Juîn eut lieu l'Vendredi (27 dé Juîn) d'la s'maine des célébrations du chent'naithe du séjour dé Victor Hugo en Jèrri, car lé Docteu A. L. Carré, du Collège Victoria, nouos fit un bieau discours sus l'célèbre êcrivain.

 

Moussieu Carré a eune maniéthe si charmante dé d'vîser, et san sujet 'tait si bein prépathé et si intérêssant, tch'i' fît les membres présents èr'vivre dans l'temps qu'Victor Hugo marchait nouos c'mîns et allait s'assiethe sus l'Rotchi Besnard. A la fîn du discours nou-s avait mème l'împression d'l'aver connu!

 

Les r'mèrcîments et félicitations d'l'Assembliée fûtent accordés au Docteu Carré à l'unanimité, et en lé r'mèrciant, lé Sénateu Hedley Le Riche Edwards, tchi présidait la rêunion, li fît part dé la r'connaissance dé touos les membres à s'n'ègard, et i' r'mèrtchit qué ch'tait la séthée la pus intérêssante et magnifique qué j'avions ieu.

 

Lé Disque qué Moussieu Oliver Mourant fît à Londres à l'occasion d'sa visite à la Sociêté Jèrriaise la-bas, fut r'produit et hardi apprécié, et un vote d'ermèrcîments fut accordé à Moussieu Mourant pour aver ieu la bonté d'nouos l'prêter.

 

Nouvieaux Membres.

 

Les nouvieaux membres êlus chu mais sont: Me. et Mme Max Lucas, Me. Philip Ahier, Mme A. M. Cabot et Mlle Amy Noel.

 

1952