Tout va bein au Portinfé.
Mais Pas d'Resolutions.
Moussieu l'Editeu,
Y faut que j'vos diche, à qu'menchi, que les preumiers jours de la Nouvélle Année ont passé assez ben siez nous. Il est vrai qu'la Merrienne se pliaint d'ses cors et d'ses r'frédeuses, et que quant y veint un achie d'grillye ou me r'garde de travers, comme si ch'tait d'ma faute. Etout ou va dans poullâlyi une doûzaine de fais par jour sans trouvé un oeu, et ses lapins ont attrapé une maladie de tchi qui crèvent d'une minute à l'autre, mais, comme j'l'y dit, à la saison tch'il est, faut s'attendre à tchiques p'tits malheurs.
Quant à mé, y faut qu'j'avoue que d'pis l'Jour de l'An, que j'passîmes siez notre biau-fils, le Bram, j'ai souffert dans ma tête et dans m'n'estoma. La Merrienne, ben seux, m'dit qu'ch'est d'ma faute, et q'j'éthais deu avé honte de mangi comme si j'n'avais pas veu d'nouôrrituthe pour siez mais, et d'bèthe chu gin-caud que l'Bram me bâillit en sortant, pour me garanti contre la fraid. Mais j'n'y fais pas d'attention, car les femmes sont tréjous d'même. Si j'n'avais pas mangi, oulle éthait creu que j'tais malade, et si j'avais r'fûsé le vêrre de gin, oulle éthait tout-d'suite envié pour le docteu. Impôssiblye de lûs pièthe, ès femmes.
Y faut qu'j'ajoûte que man vier bidet a des rhoumatices dans ses gambes de drièthe, qu'ma miyeu vaque a attrapé du fraid dans l'épiéchot, qu'man clos eûsi est souos l'iau, et qu'la muthâille du bel ecrouôlet hier matin, les fondâtions ayant donné, mais autrement, Moussieu, tout va bein au Portinfé.
Man marchand m'ayant fait crédit pour un d'mié-tonne d'chérbon, et ayant tout-plien d'chouques souos la tchérquéthie, j'faisons un bouon feu touos les siers, et j'convérsons d'une chose et l'autre. La Merrienne fait sa couôtuthe, et mé, j'fume ma pipe, et j'vis en espéthance, car, comme ou l'savez, ch'est ma natuthe, de n'laissi rain m'dêrangi, quand y n'y'a pas d'cause. J'dis ben souvent à la Merrienne que ch'est là la vraie manièthe de faithe de viers ôs.
Hier au sé y fut tchéstchon d'faithe des résolutions, et en qu'menchant j'objectit.
“Tchesque nou gâgne de faithe de bouonnes résolutions touos l's'ans?” j'l'y d'mandit. “Tu sais aussi ben comme mé qu'nou n'y tcheint pon. L'année pâssée, par exemplye tu d'vais coyé sûs l'tais, et tchèsque-y s'arrivit. Au but d'trais jours tu b'vais de tais par la bouq'tée, et ch'est ocquo d'même agniet. Sans pâslé d'autre chose ch'n'est pas patriotique, car j'ai tréjous comprint que l'tais veint d'la Chine, et toutes les fais qu't'en bé tu' encouorage chais fripons-là tch'y sont à tué nos braves soudards là-bas.”
“Ch'n'est pas vrai,” ou dit, toute mârrie. “Le tais que j'bé veint des Indes, car man marchand m'la dit, et si j'en ben une tâssée ou deux par bordée, le docteu m'a dit qu'ch'est bouon pour mes rignons. Quant à té, tu ne d'vais pas fumé ta sale pipe pour un mais, mais la minute que j'eut l'dos touoné, tu r'quémenchit pièthe que jamais.”
“Tu t'trompe, Merrienne,” j'l'y dit. “Ch'tait pas la même pipe, car j'avais tait à la boutique en accaté une autre. Ma seule vieille pipe j'la fichit dans la citèrne à êpu.”
“La Merrienne ne pu pas s'empêchi d'souôrithe. Je sommes comme la chaudièthe et l'ticlye,” ou dit. “Yun vaut l'autre. Mais ach'teu, Ph'lip, est-che que tu n'crai pon qu'nou pouôrrait r'quémenchi? N'y'a pas d'ma, après tout à faithe de bouonnes résolutions.”
“Et n'y'a pas d'bein si nou n'les garde pas,” j'l'y dit. “Une résolution d'la sorte ch'est une promêsse tchi dév'thait valé tchiquechose autrement ben mûs n'en faithe pas. Allons, Merrienne, ès-tu prête à prométtre que tu n'béthas pas tant d'tais?”
“Et té,” ou dit, “es-tu prêt à envié chutte pipe dans la citérne, et d'n'en r'accaté pas une autre?”
“Damme, nânin,” j'l'y dit, “pas pour autchune personne!”
“Bon,” ou dit, “d'pis qu'ch'est d'même, j'béthai man tais et tu fum'thah ta pipe, et les résolutions peuvent allé lûs faithe quatorze!”
1952
No comments:
Post a Comment