1957: Ph'lip va au Show d'l'Ile

 Ph'lip va au Show d'l'Ile.

Et pasle de Sénateurs.

 

Moussieu l'Editeu,

 

La Merrienne est au liét, avec du ma dans l'dos, et j'veins justement d'l'y porté une tâsse de tais. Chein qu'oulle a attrapé, ch'est du fraid dans les reins, et ch'est d'sa faute, car l'autre matin, quand y faisait grand fraid, ou s'en fut d'hors soigni les poules sans s'abrié. J'y'avais dit de mettre ma grand'câsaque, mais nânin, et ach'teu ou souffre, et entre nous, Moussieu, chonna l'y sert bein.

 

J'fut au Show d'l'Ile en Ville, et sinon pour une dem'ieuthe ou d'même, quand y vint une avérse tchi m'fit m'méttre à l'abri, j'vit toutes les clâsses dans l'ring, et j'eut des surprinses et des d's'appointements.

 

A qu'menchi la vaque au Sieur Hickey, tchi d'vait remporté l'championnat, souffrait d'une maladie tchi l'empêchait de s'montré comme oulle avait fait ou Show d'la Trin'té. Y m'semblye qu'oulle éthait peut arrêté un jour ou deux, mais j'pense bein que n'y'a pas grand'chose à faithe quand la natuthe s'en mêle. Avec chonna, y faut dithe que la vaque à tan couôsin, le Clifford Pallot, n'avait jamais pathu si bein dans toute sa vie comme ou pathaissait là. Chein qu'ou gâgnit, ou méthitait.

 

Dans les g'niches mèthes, la sienne au Sieur Le Brun, d'la Trin'té, avait pouôre mine, et à man goût, fut chanceuse de v'nin deuxième dans une forte clâsse. La g'niche que j'aimais l'mûs n'vint pas seulement rêserve, et je n'sais vraiement pas pourtchi qu'ou n'montit pas pûs haut. Oulle appartchein au jeune Laurence Le Ruez, d'Saint-Pierre et ch'est seux et cértain que s'ou n'est pas vendue, nou la r'vêrra, quand p't'être que les Juges y r'vêrront pûs cliait. Le jeune Ph'lip Mouothant en avait une bouonne étout.

 

Dans les boeux, la Frainque Avri n'eut pas d'chance, et n'fit qu'traisième dans une forte clâsse. Pour bein dithe, il est un mio trop grand pour s'n'âge. Clifford Pallot fit preumié, mais pûs tard, y fut battu pour le championnat par yun qu'j'aimais mûs, montré par le Sieur Basil Le Brun, d'Saint-Jean. Autres Juges, autres jugements.

 

Dans les p'tits viauds, le Sieur Carson, tch'y d'meuthe ach'teu à Saint-Jean, en montrit yun des pûs biaux que j'aie veu pour longtemps. Y avait deux ou trais mêssieux tch'éthaient voulu l'accâté et péyi un bouon prix, mais ils avaient affaithe à un homme tch'y n'a pas 'tait né hier et tch'y n'pathaissait pas prêssi d'vendre. J'y'en offrit vingt-chinq louis, payables après la saison, car j'avais idée que si j'pouvais l'avé à chu prix-là, j'l'enviêthais au “Homestead”, disant à Francis Le Ruez de me l'vendre pour un couplye d'chents louis aussi vite que possiblye. La raiponse que j'eut, ch'tait que m'n'offre s'sait considéthée, mais pour dithe vrai, Moussieu, j'n'ai pas grande éspethance de faithe chu bardgin-là.

 

Pour changi d'sujet, y faut que j'vos diche que j'ai déjà ouï pâslé d'une bouonne doûzaine de mêssieux tch'y veulent être sénateurs. Yun que j'trouvit hier, un Villais, me d'mandit si je f'thais d'man mûs pour l'y à Saint-Ou, car il avait ouï que pour faithe des vouaix n'y'en avait pas yun au Portinfé à m'touchi. J'fit la mine de considéthé pour une minute ou deux, épis j'l'y d'mandit tout net et cârré, combain tch'il 'tait prêt à m'péyi, ajouôtant qu'une somme en avanche ne m'f'thait pas de ma. Y pathut mârri, et me d'mandit pourtchi qu'je l'prenais. J'l'y raiponnit que j'l'avais print pour un homme tch'y n'tait pas bête asséz d'craithe tch'y pouvait dev'nin Sénateu, sans méttre sa main dans sa pouchétte, et avec chonna, y m'touônit l'dos et s'en fut. J'éthait p't'être pus d'chance bétôt avec tchique autre, et après tout, pourtchi pas. Y'a pûs d'un Sénateur dans l's'Etats agniet tch'y n'y s'sait pas s'y n'avait pas dêpensé tchiques hérpins.

 

Y faut attendre ocquo siez mais, Moussieu, mais si dans l'entretemps je n'peux pas profité d'l'occâsion et accaté un neu chapé à la Merrienne, man nom n'est pas

 

Ph'lip du Portinfé.