1957: Merrienne et la visite

 Merrienne et la visite.

La mêprinse de sa vie.

 

Moussieu l'Editeu,

 

“Si fait aussi caud l'jour que la Reine veindra,” s'fit la Merrienne hier arlevée, “je n'sortithai pas d'la maison. J'n'ai pas oublié la Visite Royale de vingt-yunne, quand j'êvannit trais fais dans l'couothant d'la journée, et je n'vit rain d'la procêssion.”

 

“Damme!” j'l'y dit, “ch'est vrai qu'y'avait hardi à enduthé chu jour-là. Dans l'mitan d'l'arlevée je m'trouvit si fâilli que si j'n'avais pas print la précaution de mettre tchiquechose dans ma pouchétte d'vant sorti, j'éthais yeu une djobbe à m'ravigotté. Avec chonna, Merrienne, si nou n'voudrait pas une grande chaleu l'vingt-chinq du préchain mais, y faut éspethé que l'temps s'sa bé.”

 

“Ah mais vèthe,” ou dit, “mais même le Connêtablye d'la Ville, avec tout l'pouvé tch'il a, n'peut pas gouverné l'temps. Même le Sénateur Le Mérquand ne peut pas l'faithe.

 

“Aussi bein,” je m'fit, “car autrement jamais nou n'séthait d'un jour à l'autre à tchi s'attendre.”

 

“Mais ach'teu, Ph'lip,” ou dit, “as-tu considéthé la route tch'a 'tait chouaisie pour l'arlevée? A qu'menchi, ch'est tout dans l'Ouest, et j'comprends que l'Est en est bein mârri. Il est vrai que l'Ouest est pûs bé et pûs important que l'autre côté d'l'Ile, mais avec chonna nou éthait creu qu'la Reine éthait peut vais les biautés d'Saint-Cliément et Grouville, ch'est-à-dithe si y'en a. Je n'sais pas, car j'n'ai pas 'tait par là d'pis la bordée que j'fûmes au lanchon sûs les Cauds Sablions, et qu'jeûmes un si bouon tais siez la Mary Jane Le Vesconte. Y dait y'avé bétôt trente ans d'chonna.”

 

J'l'y dit que y'en avait au mais quarante et qu'sans doute y'avait yeu des changements ichin et là, mais rain d'une grande importance, sinon qu'y'avait hardi pûs d'maisons.

 

“Oh!” ou s'fit là-d'sûs “et hardi pûs d'Angliais sans doute. J'comprends ach'teu pourtchi qu'nous a chouaisi l'Ouest, car ch'est là qu'nou trouve les vrais Jêrrais. Mais, Ph'lip, ch'est prèsque sûs toutes les grandes routes. Pourtchi pas nos belles ruéttes et des bords comme la Ville-au-Bas, la Ville-au-N'veu et l'Clios Baillot? Tchèsqu'y y'a à vais le long des grandes routes?”

 

“Pas grand'chose,” j'l'y dit, “mais nou cache pûs vite sûs les grandes routes et y n'y'étha pas d'temps à pérdre, car y faut qu'la Reine se r'trouve sûs la cauchie en temps pour r'prendre le baté.”

 

“Et j'garantis qu'ou s'sa bein lâssée, la pouôre pétite,” ou dit, “ch'est asséz pour la faithe avé r'grét qu'oulle avait jamais ouï pâslé d'Jêrri. Ou n'étha pas une minute de paix dans toute la journée.”

 

“P't'être bein, Merrienne,” j'l'y dit, “mais pense au pliaisi qu'oulle étha en chatchant-d'mains avec nos Jurés avec lûs nouviaux toppeurs et les Députés d'la Campagne avec lûs bôleurs et lûs neuves tunéttes.”

 

“Et lûs femmes,” ou s'fit. “J'ai ouï dithe que siez Gruchy et Vouaisin y'a tant d'neuves robes à faithe tch'ils y sont niet et jour.”

 

“Et mé,” j'l'y dit, “j'ai ouï d'un férmyi tch'y veur savé si ch'est la peine d'avé une bouonne saison si les sous s'en vont être gaspillis dans les boutiques. Ch'n'est pas seulement la robe, y dit, mais y faut étout un neu chapé, des cauches en souaie, des souliers de siez Béghin et d'autres articlyes que nou n'vait pas, mais tchi sont, accordant à la femme, indispensables. Y dit qu'la pûs grande mêprinse de sa vie, ch'est d'n'avé pas résté vier garçon.”

 

“Et mé,” s'fit la Merrienne, “quand j'pense à chutte femme-là, j'vais bein que la pûs grande mêprinse de ma vie ch'est d'n'avé pas mathié un homme tch'y s'sait membre des Etats agniet.”

 

Ph'lip

1957