1957: Le grand dîné (2)

 Le grand dîné.

Et du troublye à Saint-Ou.

 

Moussieu l'Editeu,

 

Quand je r'vinmes, la Merrienne et mé, du grand dîné des Trais Pâraisses, j'tiomes un mio lassés, mais d'vant nos couochi, la bouonnefemme avait ocquo tchiques mots à dithe.

 

“Un grand succès,” ou s'fit, “ést'che que tu n'crais pas, man Ph'lip?”

 

“Oui, bein seux,” j'l'y dit, “et y faut félicité les Sécretaithes de Saint-Pierre, Saint-Ou et Sainte-Mathie, tch'avaient 'tait mint en chérge des arrangements. Vraiment, ils en ont fait une bouonne djobbe.”

 

“Vèthe,” ou dit, “mais ils ont raison ach'teu d'savé que la djobbe a 'tait bein faite. Tchèsque tu crai des discours?”

 

“Y'en avait d'pûs d'une sorte,” j'l'y dit, “mais à les prendre yun dans l'autre, nous a veu pièthe. Le Gouverneux fit d'san mûs, et Moussieu l'Baillyi, comme de couôtume, paslit comme un vrai orateur, mais tu sais, Merrienne, quand nou va à un dîné y n'faut pas prendre les discours trop sérieusement. Enfin y'a une autre chose, bein pûs importante de tchi que j'voudrais t'pâslé.”

 

“Oh bon,” ou s'fit, “et tchèsque ch'est?”

 

“Ch'est chein que Moussieu d'Cart'ret dit au dîné d'la municipalité l'autre sé. Y m'semblye que chonna s'en va causé du troublye dans la pâraisse. Y dit que quant un homme atteignait l'âge de séptante ans, y n'dév'thait pas s'mêlé dans la politique. Si chonna est vrai, il est bétôt temps, ma vieille, d'allé té et mé, souos les mérgots.”

 

“Oh, tu crais,” ou s'fit, “eh bein que l'Seigneur de Saint-Ou diche chein tch'y voudra, je n's'y pas ocquo prête à m'n'allé. J'éthais creu tch'il éthait yeu pus d'avis. Le temps veindra tch'y pouorrait changi d'opinion sûs chu point-là.”

 

“Vèthe,” j'l'y dit, “mais dans l'entretemps, as-tu considéthé que l'Jim Le Bro, tch'y prend pour Connêtablye, pâsse séptante ans par tchiques années? Ch'tait p't'être l'y que l'Seigneur avait dans l'idée quand y dit chonna.”

 

“Ah!” ou s'fit, “ch'là s'pouôrrait, mais dans les circonstances, crais-tu que notre vier amin, le Jim, craithe tch'y f'thait mûs d'abandonné?”

 

“Grand doux nânin,” j'l'y dit. “Tu dév'thais l'connaître et savé que ch'n'est pas un gâs d'même. Il a dit tch'il est candidat, et à ma veue n'y'a pas un homme dans toute la pâraisse tch'y peut l'châtchi. Y'avait un Bro Connêtablye de Saint-Ou y'a passant quatre chents ans, et y étha ocquo un Bro Connêtablye de Saint-Ou quand veindra l'mais d'Févri, et ch'est mé tch'y te l'dit.”

 

“Mais ach'teu Ph'lip, tchèsqu'en est pour le Député? Nous a ouï que l'Mâjeur s'en va être oppôsé.”

 

“Y s'pouôrrait,” j'l'y dit, “mais sûs un sens j'en doute assèz. Après tout, le Mâjeur de Gruchy a tait là pour siez ans, et pourtchi l'méttre à la porte? Je sais bein tch'il a d'bein droles d's'idées, mais y veur continué, et je n'sais vraiement pas tchèsqu'y voudrait l'oppôsé.”

 

“Y'a tout-plein d'temps,” ou s'fit, “et à Saint-Ou, quand l's êlécteurs attrapent la fièvre y sont capablyes de toutes sortes d'bêtises. Mais ach'teu, Ph'lip, quand tu fut au grand show d'la Ville, Mêcredi, criyais-tu qu'la vaque à man couôsin Richardson méthitait l'championnat?”

 

“Bein seux qu'oulle méthitait,” j'l'y dit. “J'avais r'grét, sûs un sens, pour le Sieur Brée, mais s'y m'avait êcouté sa vaque éthait résté à l'êtablye. Oulle en avait dêjà fait asséz, pourtchi l'y d'mandé d'en faithe pûs?”

 

“Et pour la Show and Sale?” ou d'mandit.

 

“Quant à chonna,” j'l'y dit, “tant mains qu'n'ous en dit, tant mûs. Allons bouonnefemme, allume ta chandélle et au liet.”

 

Ph'lip.

1957