1957: Rêunion Mensuelle

 L'Assembliée d'Jèrriais

Rêunion Mensuelle.

 

La dernière rêunion mensuelle eut lieu en pliein air, lé 19 dé Juilet et ch'fut pour touos les 150 membres présents eune occasion dé grand pliaisi et dé jouaie. Lé lieu chouaisi fut la maison du Président (Holmdale, St. Martin), et j'fûmes grâcieusement erchus par lé Sieur Chs. Billot et sa charmante dame, Mme Lilian Billot, qui nos fîtent la beinv'nue en arrivant.

 

La rêunion eut lieu en d'vant d'la maison et le Sieur Chs. Billot explyitchit comment qué les membres du Comité Dramatique l'i'avaient d'mandé la pèrmission dé faire usage dé ses clios pour l'organisation dé lus sérée.

 

Divèrtissements.

 

Ch'est qu'ch'en fut eune sérée extraordinaire!

 

Ses mystères, des d'vinâilles, des courses après des objéts muchis dans les vallettes, chèrchant les directions écrites sus papi, souos les bouais; dans des creux d'lapins; souos des pièrres; drière des choutchets; à travers les brèques, crouaîsant l'cané; grimpant les fossés; chèrchant pour instructions parmi les cannibottes et dans les creux d'un géant d'bouais mort pour lé sécret à la fin d'la touânée.

 

Flieurs Saûvages.

 

En route, i' fallait ramasser étout des flieurs saûvages, un mèrgot, eune chênelle, eune fielle dé housse, dé la canmière, des potirons, eune canne à lait, eune flieur dé ronche, un rouoge soudard et un vier garçon.

 

Un grand souper.

 

A neuf heures, n'ou's trouvit au bas du clios, et ch'tait là qué nos ammins du Comité Dramatique avaient préparé comme surprinse et avec lus générosité habituelle, un grand souper, al-fresco. Un feu d'bouais avait 'té bein bâti déhors, entre des briques, et les bouannes odeurs dé la fricacherie d'saûsiches et d'oignons nos don'nîtent un appétit à y faire justice. N'ou n'mantchit pas dé s'rigaler étout du bouan café tout caud. Ch'fut pour tous un vrai festin!

 

La Musique.

 

Pour bein fini la sérée, i' fallait d'la musique et Mme E. Le Sueur, auve s'n accordéon, sé mint à jouer des airs bein connus et illuminés par les lanternes d'êtablye qui 'taient là, prêtes à n'ou chantet les chansons jèrriaises dé tout tchoeur!

 

Ermèrciements.

 

Lé Sieur Richard (Président du Comité Dramatique) ermèrcyit lé Président pour nos aver prêti ses clios, et ensuite les dames qu'avaient travaillyi dé si bouan tchoeur, en faîsant lus préparatifs les jours dé d'vant pour en faire un si grand succès.

 

Lé Président ermèrcyit touos les braves travailleurs étout, en les félicitant sus lus excellente organisation. Vraiment, rein n'avait 'té oublyié.

 

L'esprit dé fratèrnité, dé bouanne camaraderie et d'amiétchi 'tait bein évident dé touos les bords, et ch'est quand n'ou's a ches sentiments-là entre tous, qué n'ou peut pâsser dé si heûreuses sérées avec les membres dé l'Assembliée d'Jèrriais.

 

1957