1957: Merrienne et san p'tit ouaisé

 Merrienne et san p'tit ouaisé.

Ph'lip veur le tithé.

 

Moussieu l'Editeu,

 

Bein des fais je m's'y dit à mé-même; “La Merrienne ne sort prèsque pas, et ocquo oulle a tréjous des nouvélles à m'raconté quand veint l'sé. Ou sait tout ch'que s'pâsse dans la pâraisse et étout dans d'autres parties d'l'Ile. Comment qu'chonna s'fait?”

 

Hier au sé, j'l'y d'mandit, tout nét et cârré, pour une explicâtion, et ou s'mint à rithe. “Man pouôre Ph'lip,” ou dit, “est-che que tu n'as jamais ouï d'un p'tit ouâisé tch'y veint vos dithe, quand nous est touôseurs chein tch'il a ouï en volant ichin et là? Et bein, j'en ai yun, mé, tch'y veint m'vais prèsque toutes les s'maines, et le canârien en est si jalou qu'j'ai à couvri sa cage.”

 

“Oh bon,” j'l'y dit, “et t'n'ouâisé, est-che un mouësson, un êtourné, un vert mignon, ou tchi?”

 

“Nânin,” ou dit, “ch'est tchiquefais une rouogegorge. Agniet ch'tait l'rêté et y m'a raconté des choses bein intérêssantes, mais d'pûs qu'tu n'y crait pas, ch'n'est pas la peine d'allé pûs lien. Tu pouôrrais allé vais ès bêtes en t'passant l'temps.” Et ou fit la mîne de se r'méttre à lièthe la gâzette.

 

Ach'teu, Moussieu, comme ou l'savez, je n's'y pas tchuthieux d'ma sorte, mais pourtant, j'viyais bein qu'la Merrienne avait tchiquechose qu'ou voulait m'dithe. Après avé cliérgi ma gorge deustrais fais et allumé ma pipe, j'l'y dit que y'avait ocquo l'temps pour les bêtes et qu's'ou voulait pâslé j'tais prêt à l'êcouté.

 

Pour la deuxième fais ou s'mint à rithe. “J'l'pensais bein,” ou dit, “car j'n'ai jamais connu un homme si tchuthieux. Eh bein, pour quémenchi, le p'tit rêté m'a dit que l'Juge Dorey à décidé de se r'tithé à la fin d'l'année.”

 

“Nous avait dêjà ouï chonna,” je m'fit.

 

“Vèthe, mais chutte fais ch'est pour de bon et n'y'a pas grand temps pour trouvé un rempliéchant. Etout y m'a dit que l'Baillyi est dêterminé d'avé un Député et chonna d'vant long.”

 

“Il en méthite yun,” j'l'y dit, “et sans doute che s'sa tchique homme de louai tch'y veindra d'Angliétèrre, car je n'connais personne ichin tch'y pouôrrait faithe la djobbe.”

 

“Si-fait, y'en a yun” oulle objéctit, “mais y ne s'sait pas considéthé. Ach'teu pour le Juge de la P'tite Cour, tchèsque tu'en pense?”

 

“J'ai grand peux,” j'l'y dit, “que che s'sa la même chose, car souos les conditions actuélles un candidat dait avé 'tait membre du Bârreau pour au mains djais ans, ou être un Juré-Justicier, et y m'semblye que j'n'avons pas chein tchi nos faut parmi autchun d'yeux. Mais enfin, Merrienne, as-tu ouï aut'chose?”

 

“Sans doute,” ou dit, “par exemplye, y pathait que l'Charles Cabot n'veur pas prendre pour Sénateur parsque ses sêrres l'y donnent trop d'travas, et qu'man couôsin, l'Député l'Cornu, n'y tcheint pas pus qu'chonna. Man rêté n'savait pas pour le Sieur Gaudin, car y n'aime pas la pâraisse de Saint-Cliément. Trais ans d'siéte ses nids ont 'tait dêchithés par des mousses, et pas un oeu d'réstant. Pas êtonnant tch'il est mârri. J'y'ai dit de v'nin au Portinfé l'année tchi veint. Mais Ph'lip, y m'a pâslé étout d'la Sociêté Royale.”

 

“Et tchèsqu'y t'en a dit?”

 

“Y m'a dit qu'à la fin d'l'année, les deux vice-présidents, le Sieur Egré et m'n'autre couôsin, le Fred Dorey, abandonnent. Il a ajouôté que dans chu cas-là, y' étha un candidat de Saint-Louothains.”

 

“Ecoute, Merrienne,” j'l'y dit, “tu'as donné un mauvais avis à tan rêté, car s'y veint par ichin et que j'l'attrape, je l'pliumethait, le p'tit menteux!”

 

Pour la traisième fais ou s'mint à rithe. “Attrapé-le, d'vant pâslé de l'pliumé,” ou dit.

 

Ph'lip.

1957