1958: L'Assembliée d'Jèrriais

 L'Assembliée d'Jèrriais

 

Appréchant dé 80 membres lus rêunitent Vendredi l'30 dé Mai dans les bieaux gardins du Magni d'Rozé qué l'Cap'taine et Mme. Bolitho avaient ieu la compliaisance d'ouvri pour ieux à vaie et admither. Ch'est presque împossiblye dé faithe à comprendre à personne qui n'les ont pas veus, combein bieaux qué les bouaix flieuthis dé tant d'couleures, les lîs et l's autres belles flieurs alentou du vivyi pathaissent. Ch'tait damage qué l'temps n'fusse pon pus bé, mais bieau qui tchiyait d'la plyie ch'tait eune séthée qué nou n'oubliêtha pas bein vite.

 

Pour c'menchi l's affaithes dé la séthée, lé Président, l'Sieur Chas. Billot èrmèrcyit l'Cap'taine et Mme. Bolitho pour lus învitation et Mme. Bolitho réponnit et fit la beinv'nue à tous. Quand la plyie vînt pus raide j'nos mînnes dans la Chapelle du Mangni et l'Sieur Ph. Ahier, B. ès S., nos fit un bein întérêssant discours entouor les rentes qué les t'nants d'vaient au Mangni et explyitchi comment qu'les difféthents Fiefs avaient ieu lus noms. Auprès chu bouan discours les gens dêhallîtent et l's uns prîntent couothage d'aller avau l'c'mîn qui mène jusqu'au rèservoir en d'sus du Moulin dé la Perrelle à la Mathe Ste. Catherine. Grâce au Sieur George Le Masurier qu'est ségrétaithe des t'nants, nou put ménagi lé c'mîn qui 'tait hardi mouoilli par taques. Chu moussieu-'chin avait prîns la peine dé mettre des pouques et à des bords des tôles et des plianches pour qué nou pusse gabather sans aves les pids mouollis. I' méthitait touos les r'mèrciements qui li fûtent accordés par lé Président pûs tard.

 

Pour les siens qui trouvaient la course trop difficile, lé Mangni 'tait ouvert pour ieux à lus assiéthe à vaie et admither les superbes touffets d'flieurs qué l'Sieur Cyril Le Brocq, du personnel du Mangni, avait arrangi. Pour fini la séthée y'avait du bouan café dé sèrvi par plusieurs des dames.

 

D'vant qu'les gens lus en fusent, lé Président èrmèrcyit lé Cap'taine et Mme. Bolitho acouo eune fais pour lus hospitalité et touos les siens qu'avaient aidgi sus autchun sens, et annoncit qué l'Service Annuel étha lieu l'29 dé Juin à l'Eglyise dé St. Louothains à 3 heuthes, et qué si autchun des membres veurt jouindre lé tchoeur pour chu jour-là dé contacter la ségrétaithe, Tél. Western 143, pour saver les jours des pratiques.

 

1958