1957: Excursion en Dgèrnésy

 L'Assembliée d'Jèrriais

Excursion en Dgèrnésy.

 

L'excursion annuelle dé l'Assembliée d'Jèrriais eut lieu Mêcredi, lé 4 Séptembre, quand 66 membres fûtent en Dgèrnésy passer la journée. En arrivant, i' fûtent rencontrés par à peu près eune trentaine de membres dé l'Assemblaiei d'Guernésiais, sous la direction dé lûs Président, Moussieu l'Avocat W. H. Langlois, qu'avait fait touos les préparatifs avec l'aide dé sa dame, et tchiq membres dé lûs Assembliaie.

 

Les vouaitures 'teaient à côté du baté, et Mme Langlois présentit à chaque membre un motif distinctif, et, eune fais qué nous avaient 'té inscrits n'ou's mint en route. A l'Eglyse dé la Ville, n'ou d'valit et l'Avocat Langlois fit la beinv'nue ès Jèrriais, dé la part des ammins Guernèsiais.

 

L'itinéraire.

 

I' fut annoncé qué n'ou pouorrait aver eune tasse dé café à la Maison Carré, et tout l'monde en fûtent contents et s'y trouvîtent pour en profiter.

 

N'ou s'ermint dans les vouaitures pour suivre l'itinéraire chouaisi par l'Avocat Langlois et n'ou montit par la belle route Le Val des Terres et par la route dé Sausmarez, en s'arrêtant pour vaie lé Manyi dé Sausmarez et en suivant la Grande Rue et la Route dé St. Martin, n'ou touônit dans la direction des Blicqs, jusqu'ès Vauxbelets. Pus tard, n'ou's arrivit ès Moulins du Rouai, et, en montant la Route Delisles, n'ou s'arrêtit eune minute pour vaie les Cours Féodales dé La Comte et St. George - hardi intérêssant. En continuant n'ou pâssit l'Eglyse dé Cobo, en route pour Albecq, en suivant la côte à Cobo, jusqu'au Parc dé Saumarez.

 

La belle maison est impôsante, auve ses grands gardins si bein soignis, et ch'est ichin qué n'ou visite lé Musée auve la vielle tchuisine Guernèsiaise. En faisant la visite des apartéments, n'ou vit les anciens qui sé sont réfugiés là pour passer lé reste dé lus vie paisiblyément en avant les soins qu'i' méritent à lus âge. Ils avaient l'air hardi confortablye et bein lus aise.

 

Lé R'pas.

 

Enfin, lé trajet continuant par l'Eglyse du Castel n'ou's trouvit à l'Hôtel Beaulieu, en bouan temps pour lé r'pas. Ichin étout, l'Avocat Langlois avait organisé l'affaire parfaitément, et les tablyes étaient magnifiquement décorées, en notre honneur.

 

La prière fut prononcée par Moussieu Langlois, et la santé dé Sa Majesté la Reine. Ensuite, la beinv'nue à tous les membres dé l'Assembliée d'Jèrriais. Le Sieur Chs. Billot (Président) réponnit, et dans son discours, i' r'mèrcyit l'Avocat Langlois pour tout ché qu'il avait fait pour not' Assembliée. Il invitit nos ammins Guernèsiais à v'ner en Jèrri l'année tchi veint. Eune courte rêunion eut lieu à la fin d'un fameux r'pas.

 

Visite à Hauteville.

 

N'ou r'montit dans les vouaitures en route pour Hauteville, la maison dé Victor Hugo. N'ou fit la visite dé touos l's appartéments, auve lus vièrs meubles, et fournies comme i' 'taient en 1878, la dernière fais qué Victor Hugo fut en Dgèrnésy.

 

N'ou s'ertrouvit en route, chutte fais, pour la maison de l'Avocat Langlois, “Highfield,” Rue de l'Or, et ch'est ichin qué n'ou's eut eune grande surprinse! Toute la compagnie fut erchue par Moussieu et Madame Langlois comme eune grande famille. Assises sus des tchaises dans l'gardin, n'ou fut conviés dé thée, auve gâches et galettes dé Djérnèsey. Eune telle libéralité n'existe qué rarement dans les jours d'ach'teu. Lé Sieur Langlois montrit des vièrs ôtis d'férme, et eune scène dé La Clameur dé Haro fut présentée par des membres Guernésiais.

 

Le Sieur Ph. Ahier, B. ès Sc., offrit les r'mèrciements dé l'Assembliée d'Jèrriais, auve lus apprêciation, à Moussieu et Madame Langlois pour lus générôsité, et lui aimabilité à notre égard.

 

Finalement n'ou's mint en route pour lé baté, dans les 5.30 heures, après eune magnifique journée, grâce à l'organisation si parfaite, dé nos ammins dé d'Guernésiais.

 

1957