1952: Après l'show

 Après l'show.

Merrienne est têtoigne.

 

Moussieu l'Editeu,

 

Quand je r'vint du grand show d'la Ville Mêcredi au sé, j'avais dans l'idée, en b'vant l'tais, de dithe à la Merrienne tout ch'que j'avais veu, mais j'avais à peine qu'menchi qu'ou m'arrêtit.

 

“R'garde, Ph'lip,” ou s'fit. “Toutes les fais qu'tu vas à un show d'bêtes ch'est tréjous la même histouaithe des mêprinses que les Juges ont fait, d'la miyeu vaque sûs l'têrrain tchi n'a pas même tait r'gardée, d'une tchéthoigne tch'a fait l'preumié prix, et d'une bricole tch'éthait tait mûs à l'êtablye. J'en s'y engniée. Pâslons d'la politique; ch'est bein pûs intérêssant qu'des g'niches r'nouv'lées ou des boeux d'un an.”

 

“Che s'sa comme tu voudras, Merrienne,” j'l'y dit, pas trop content, comme ou pouvez craithe, “mais n'oublie pas qu'une bordée, ichin à Saint-Ou, une êléction fut décidée par une vaque et un bichot.”

 

“Ocquo de tan gniolin!” ou s'fit.

 

“Nouffé, ch'n'est pas du gniolin, ch'est la véthité. La vaque, tch'avait bétôt vingt ans, et tch'avait pérdu le lait de deux ou trais trans, et l'bichot, tchi tait vyi comme les routes, appartenaient à un certain honothablye êlecteur, tch'y n'savait pas de tchi bord voté. A la dérnié minute un honothablye Principa d'Paraisse le print d'côté et l'y fit une offre de vingt-chinq louis pour la vaque et djais louis pour le bichot. L'êlection fut gâgnie par deux vouaix! J'te dis chonna pour te dêmontré que les bêtes et la politique sont ins'pathablyes. Ach'teu veur-tu que j'te diche tchiquechose du show?”

 

“Nanin,” ou raiponnit, “j'en ai plien l'dos de tes shows. Pâslons d'autrechose. La cause à Jack Le Mérquand, comment qu'tu crai qu'ou s'en va fini?”

 

J'la r'gardit pour tchiques instants, épis: “Veur-tu m'vais en bouaite, Merrienne?”

 

Ou dit qu'ou n'comprenait pas tchèsque j'voulais dithe.

 

“Eh bein,” j'l'y dit, “j'm'en vais t'explitchi. Tu sais aussi bein comme mé que j'êcris à la Chronique, et qu'bein souvent j'raconte à l'Editeu des conversâtions qu'j'avons yeu entre nous, té et mé. Ach'teu si j'tais bête assez de distchuté ôv té l'affaithe de Jack Le Mérquand, et d'envié l'rapport de notre opinion, seux et certain que dans p'tit d'temps je s'sais traduit d'vant la Grande Cour et mint à l'amende ou même envié en prîson pour un mais ou deux.”

 

“Mais, Ph'lip,” ou dit, “tout l'monde en pâslent de chutte cause, et même hier arlevée, té et tan n'veu, le Frainque taient à dithe dans l'bel à haute vouaix tchèsque ous en criyaient.”

 

“Ch'n'est pas la même chose,” j'l'y dit. “Nou peux exprimé d's' opinions dans les clios, dans les routes, dans l's'auberges et même ès Assemblyiées d'Paraisse, mais l'moment qu'chonna pathait sûs une gâzette ch'est un crime.”

 

“Tchi drôle de louai,” ou s'fit. “P't'être bein, mais nou n'peut pas la changi. Quand la Cour étha décidé et qu'l'affaithe s'sa fini, nou pouôrra dithe chen qu'nou voudra sûs les gâzettes, mais pas ach'teu.”

 

“Oh bein, mais,” ou dit, “d'pis qu'ch'est d'même, tu f'thas aussi bein de m'dithe si tu'as veu tchiquechose de bouon au show. A qu'menchi, y'avait-y du monde?”

 

“Jamais j'n'en avais veu autant, au mais d'Octobre,” j'l'y dit, “et faut dithe étout que y'avait d'raides belles bêtes dans prèsque toutes les classes. Avec chonna, y n'faut pas qu'tu crai que j'ai tréjous accordé avec les Juges. Y'avait, par exemplye, dans les jeunes vaques -”

 

La Merrienne m'arrêtit. “Sans doute,” ou s'fit, “et dans les viaux d'un an et les g'niches pliènes, et tout l'restant. Si tu n'as rain d'autre à nos dithe, tu peut t'n'allé baillyi une poignie d'fain ès bêtes, et j'm'en vais m'mettre à rabillyi des cauches.”

 

N'y'avait qu'une chose à faithe, Moussieu!

 

Ph'lip.

1952